::{ مجالس قبيلة هذيل }:: موقع يهتم بتراث القبيلة ومفاخرها

ثم عاد سحلول الي بيته وباله مشغول بما قاله الجيران فذهب الى غرفته ونظر الى المراه
واذا به يرى حبات الشيب المنتثره هنا وهناك فذهب الى الحلاق وصبغ جميع شعره
وعمل صنفره كامله في صالون العنايه بالرجل((والتي انتشرت في بلادنا اكثر من صالونات
النساء))

وعندما دخل بيته تفاجاء الجميع واخذ ابنائه يداعبونه ايش الجمال هذا يابابا ايش الحلاوه
هذي ياعم ..فقال ابد ياعيالي الواحد كم مره بيعيش ان الله جميل يحب الجمال
((اخس يالطلي)) قالوا اكيد يابابا لو شافتك ماما حتطير من الفرح .يوم شافته
ام سحلي ..قالت ماني مصدقه ياسحلو ياحبيبي ايش الحلاوه هذي ايوه ياشيخ من
زمان ياراجل خلينا نتكحل ياهووووووووه!!!

قال عجبتك ياأم سحلي قالت عجبتني وبس تعجب بلد يابن الذينا ..قوم يابو سحلي
خلينا نطلع غرفتنا ابقاك في موضوع مهم..قال مايصلح هنا قالت مايصير العيال
يسمعوا ..قال ايوه فهمتك يانمسه قومي قومي مشينا ؟

صكت باب غرفة النوم وقفلت بالمفتاح وقالت سحلوني قال ياعيون سحلونك قالت
تفقعت عيونك بلا لف ودوران ايش وراء الكشخه هذي والشياكه المفاجئه ((ماكنت
تحلق دقنك الا في العيد))على ايش ناوي انت من يوم جيت من عند الجيران
وانته ما انت على بعضك !!!!يمكن نقزك ابليس ولا واحد من الطليان الجيران
اقنعك بشئ اسمع يابن الحلال انا جايبتك هنا بعيد عن العيال عشان نتفاهم على
راحتنا واحذرك ياسحلول لاتتركب اي حماقه ..خلك سحلوني على خبري احسلك.

قال يابنت الحلال شيلي الافكار هذي من راسك وانا اقدر على زعلك ياأم سحلي
كل مافي الامر شفت الجيران كاشخين وانا من زمان مشغول فقلت اهتم بنفسي
الا ابسألك فيه واحد كل يوم يأكل موووووووز قالت اكيد هذا قرد قال هيا
عن الغلط قالت غلط ايش سالتني وجاوبتك ..قال طيب والي يشكل يوم كمثره
ويوم خوخه ويوم تفاحه قالت هذا ذويق قال يعني مافيها شئ ..قالت بالعكس
كذا احلى شئ ..قال يعني اسويها !! تسوي ايش ..اكل يوم كمثره ويوم خوخه
ويوم تفاحه ..قالت احنا الحمدلله تقريبا نأكل الفواكه هذي باستمرار ..قال
ايو والله الحمدلله على النعمه كيف فاتتني هذي ..انا الحمدلله اكلها باستمرار
يعني مو بس مووووووز قالت اشبك انته انهبلت يابو سحلي ..قوم الله لايهينك
على سيرة الفواكه انقز الحلقه شكللنا خضار وفواكه وجيب أمي على دربك احسن
من كلامك هذا الي لايودي ولا يجيب ياسحلوني ..قال طيب ابشري قالت لاتتأخر
وانته كاشخ كذا ذكرتني بالفنانه((صباح))..

وعند الباب ولا جاره في وجه ماشاءالله يابو سحلي ..ايش الكشخه هذي شكلك
نويت نقول مبروووووك قال الله لايبارك فيك قصر حسك لااحد يسمعك ..انا رايح
اقضي واجيب عمتي ..وامرك القاك شوفت لنا جارنا الي تقول عليهم بيت طيب
واخذت رائهم في زواجي من بنتهم الله لايهينك ياجاري!!!!!

في الطريق وهو راجع قال لعمته ياعمه تتوقعي ام سحلي ايش راح تسوي لو تزوجت
قالت ياولدي ماراح تسوي شئ اصلا النسوان مغلوبين على امرهم ..بس اذا
لقيوا زيكم يالسحلان مايرحمونهم ..بس ليه تتزوج ياولدي هو ناقصك مرمطه
قصدي ناقصك شئ ..قال والله ياعمتي الجيران يقولون فله !!!! قالت
اسمع مني ياولدي دام ربي مكرمك ببنت حلال صاينه بيتك وعيالك احمد ربك
ولاتخرب على نفسك ..انا انصحك لوجه الله مو عشان بنتي .
قال والله انك صادقه ياعمتي..بس حبيت ادردش واسولف معاك علومك ماتنمل
ولا زواج ايش ياليت بحمالها تقوم ياعمتي قالت على سيرة السوالف هذي اذكر
جدك الكبير الشيخ مسحلل السحلان كبير الطليان اقصد كبير السحلان الله يرحمه
فكر مره انه يتزوج على جدتك تدري ايش سوت فيه مسكته ليلة زواجه وجمعت
نسوان القبيله وضربوه ضرب الله لايوريك وخلته جدنك مربوط في شق الحريم
شهر كامل لايشب نار ولايستقبل احد لين صار سالفه بين العربان!!!
وهذا سبب شهرتكم وتسميتكم بالسحلان الطليان؟

قال هذا الي قاهرني ..وابقى اغير التاريخ والي يسير يسير ياعمتي قالت الله
يوفقك ياولدي وانا من ناحيتي ماراح اتدخل بينكم الا بالخير ((بكاشه))..

دخل سحلول وعمته البيت وسلموا على ام سحلي والعيال ..قالت ام سحلي
وين الخضار والفاكهه انته وكشتك هذي ..قال الله نسيتها سوالف عمتي الله
يطول في عمرها نستني كل شئ راجع اجيبها .

قالت سوالف ايش ياأمي قالت لا يابنتي بس الطلي هذا يفكر انه يتزوج وذكرته
بالتي هي أحسن وبماضي جده الطلي الكبير لعله يرتدع واذا استمر في غيه
اعطيه على راسه بلا في شكله خصوصا بعد ما تصنفر كذا مايذكرني الا بسيارات
قديمه قبل الكرسيدا والكامري يسمونها((الماركتو)) قيرها علاقي!!!!

قالت بالله ياأمي هذا الحيوان ناوي يتزوج عليه ..قالت يابنتي كلام في الهواء
قالت مجرد تفكيره في الموضوع مصيبه بحد ذاتها لازم اشوف
ايش اخرتها معاه كله من الجيران الشرهه عليه فلته في الاونه الاخيره قلت يمكن
كبر وعقل لكن ((الطلي طلي والسحلي سحلي)) ...

راح سحلول للسوق وفي طريقه مر جاره قال بشر ياجاري اش سويت في موضوعي
قال ابشرك الربع وافقوا ماباقي الا نمرهم اليوم العصر ونتفق معاهم على موعد الزواج
وفي العصر مروا ارحامه الجدد وحددوا الزواج الخميس القادم ..وفي الطريق قال
سحلول لجاره كيف الدبره ذلحين مع ام سحلي قال ولا عليك منها ادخل بحرمتك
الجديده واثبت يومين((الشجاعه صبر ساعه)) وتشوف اذا مانخت وانا اخوك بس
اصحك تضعف ولاشئ... قال ازهلها ويوم الخميس تزوج ابو سحلي ورجع البيت
بحرمته الجديده ويوم شافته أم سحلي قالت سويتها ياطلي ..قال سويتها وانقلعي
عن وجهي ذلحين ماني فاضيلك شغلك بعدين ..تفضلي ياحبيتي ((ياكمثره))
نطلع غرفتنا ولا تفكري فيها وانا سحلول طلع لغرفته رجل وراء ورجل قدام
ماهو مصدق الي حصل ويوم وصل الغرفه قال والله صادق جاري اوريك ياأم سحلي
والله ((يالي اكلتينيه بيض لااطلعه فراريج))..

نزل يصلي العصر وشافته ام سحلي قالت تعال ياسحلول ابغاك قال روحي عن وجهي
ذلحين وبعد الصلاه خير يالله لااطسك كف اخليكي تبرمي يالله بلا دلع ويوم طلع
مع الباب قال اخس يابو سحلي والله الرجاله ما يبغالها شئ مع النسوان انفخ واشخط
فيهم ولا تكثر في الكلام عشان مايصيدون نقاط الضعف عندك وتمشيهم على العجين
ما يلخبطونه ..ومشت الحكايه مع صاحبنا سحلول زي الحلاوه واستقر في حياته

وفي يوم اخذته العزه بالاثم وقال لزوجته كمثرى اش رائك في واحد يوم ياكل موووز ويوم
كمثرى بس قالت حاجه طيبه ..قال والي ياكل كل يوم كمثرى وتفاحه وخوخه..
قالت شكلك نويت الثالثه ياسحلي ابلع العافيه واحمد ربك دام مشت معاك لانخلي
عيشتك انا وام سحلي سوداء قال اش تقولي ياحرمه قالت حرمة عليك عيشتك
ان شاءالله انت صدقت عمرك ياطلي وابتسوي فيها ((الحاج سحلولي))...
وتروح لغرفة أم سحلي وتقولها بالسالفه قالت أم سحلي من زمان انا استني اللحظه
هذي وتمر المطبخ وتأخذ الصاج وهات يادبج في ابو سحلي واصيب بعدة اصابات
متفرقه اخطرها ضربه على راسه فقد الوعي شهريين ..وعندما فاق وجد ابناءه
وزوجاته حوله فقال الحمدلله ياعيالي على العافيه وصحيح مو كل مره تسلم الجره

وهكذا استطاع سحلول ان يصنع لنفسه وللسحلان مجدا ولو كان محدوداً ..واصبحوا
يلقبون بالسحلان الثيران نسبة الى الثوره التي قام بها سحلول .

وتقبلوا تحياتي والى اللقاء في مسلسلات اخرى قادمه