نموذج مشرّف لمحاورات أعضاء اللجنة
 

رشيد الزلامي وفيصل الرياحي .

شاعرين من أعضاء لجنة التحكيم طالما سمعنا أحكامهم على

المحاورات من خلال مسابقة شاعر المعنى .

ولكن هذه المرة سوف يكون الحكم لنا .

فما رأيكم نتابع المحاورة ونصدر الحكم سويّة .

علماً بأن المحاورة لها تقريبا ًسنيتن أو أكثر .




رشيد الزلامي


مرحبا في حفل ربعي ذخر أبوي وذخر جدّي = عزوة عتيبة ليا مادارت

الدنيا رحاها

شفت لي وجه ابقمي وأنا على الدرب امتعدّي =والبقوم أصحابنا

وعيوننا دايم وراها


فيصل الرياحي

البقا ياللي ترحب وأنت في وضع التحدي = لاتحدالك رجال ٍ ماحد ٍ

يلحق مداها

العتيبي كل ماشاف ابقمي قفى وصدي = صد وأقفى والعلوم اللي

على باله نساها


رشيد الزلامي

لو تحدانا الرياحي وش يجيب ووش يودي = أنت جاري من زمان

ونعرف البير وغطاها


آصل الصبّة ليا شفت العرب ماهم بقدي = ناس نتركها وناس ٍ غيرها

نلعن ثواها


فيصل الرياحي


ياقصيري قبل تغلط شد والا عنك أشدي = العلوم اللي تنوش

اخشوم ربعك مانباها


صد وأبرك لك ترى كسر العصا ماهو بودي = كم رجال ٍ ياوسيع

المعرفة نكسر عصاها


رشيد الزلامي


دام صاحبنا يريد الصلح ماني بمتردي = وان نفخ ذربه ترى

ماللعيون الا ملاها


البقوم الله خلقني ضدهم والوقت ضدي = مير جعل يصير فرصة

علها والا عساها


فيصل الرياحي


الزلامي كل ماشاف الخطر لازم يهدي = واعذابه كان روحه

(غشّها ) الله ماهداها


أنت من هم العرب ماترقد الا بالمهدي = لا تلفّت للبقوم ورح

لكشب اكشب حصاها


رشيد الزلامي


الخطر مامن خطر لكن خلك مستعدي = وأنت عارف صاحبك

لن قال له كلمة حماها


خف ّ دمك لا تواخذني على مزحي وجدي = لك من الثنتين وحدة

مرّها والا حلاها


فيصل الرياحي


باح سدّ اللي تحداني وأنا ماباح سدي = العلوم اللي تضرّك

يالزلامي وش وراها


أنت فسقان امتريّح وا متعشّي وامتغدي = مير قلبك عنصري !!

والنار ماتصبر علاها

...............................................


أخوكم واحد من الناس

رد: نموذج مشرّف لمحاورات أعضاء اللجنة
 

رد: نموذج مشرّف لمحاورات أعضاء اللجنة
 

معركه حامية الوطيس بين لجنة التحكيم
ههههههههههههه
سارت فلسفه هذي

الله المستعان

عزالله انك تجملت ياواحد امن الناس

على النقل الجميل
،
،
،
،
جوهرة هذيـــــــــــل

رد: نموذج مشرّف لمحاورات أعضاء اللجنة
 

جوهرة هذيل الله يعافيك سعيد جدا ً بمرورك الرائع .

رد: نموذج مشرّف لمحاورات أعضاء اللجنة
 

المحارب بيض الله وجهك وبارك الله فيك .

رد: نموذج مشرّف لمحاورات أعضاء اللجنة
 

دائما هذي معاني الزلامي

بس ابو بدر شوكة نحر مثلي خخخخ


تحياتي 000

رد: نموذج مشرّف لمحاورات أعضاء اللجنة
 

قوية وفتل ونقض بس الرياحي ضيق عليه الخناق

والزلامي عنده ما عنده بس الله يكفه لين يعدون عيالنا على خير

رد: نموذج مشرّف لمحاورات أعضاء اللجنة
 

شوك النحر

الزلامي خطير وماسمع نصيحة الرياحي يوم قال له

لا تلفت للبقوم و رح لكشب اكشب حصاااها

والعلوم اللي تضرّك يالزلامي وش وراها

أعتقد هذا البيت رجح كفة الرياحي على رشيد .

رد: نموذج مشرّف لمحاورات أعضاء اللجنة
 

المدير العام سلطان السويهري بارك الله فيك .

رد: نموذج مشرّف لمحاورات أعضاء اللجنة
 

السلام عليكم ورحمة الله وبركاته

أولا : المعنى بداه الزلامي بقوله "عيوننا دايم وراها" قالبها على الرياحي لكن رد الرياحي عليه بقوله "صد واقفى والعلوم اللي على باله نساها" نقض ولا أروع

ثانيا : كان هناك تكرار في القافية كلمة وراها تكررت

كل الشكر لك واحد من الناس

رد: نموذج مشرّف لمحاورات أعضاء اللجنة
 

أحب ربعي مثل ماتفضلت لكن البيت بشكل كامل

شفت لي وجه ابقمي وأنا على الدرب امتعدي

والبقوم أصحابنا وعيوننا دايم وراها

بارك الله فيك ويشرفني مرورك .

رد: نموذج مشرّف لمحاورات أعضاء اللجنة
 

صح لسان الشاعر الكبير فيصل الرياحي البقمي

وصح لسان الشاعر الكبير والمعروف رشيد الزلامي العتيبي

محاورة رائعة وصورة مشرقة لمحاورات المعنى بارك الله فيكم .