|
مقال طريف جداً مكتوب بلهجة
قال حقوق المرأة .. قال
ما يرفع ضغطي شَي زَي كلمة حقوق المرأة .. وبالذات في السعودية .وهادي المشكلة طلعت متى؟ بعد 11 سبتمبر ... سبحان الله .. يعني كانوا من ألف وأربعمية سنه نايمين .. وفجأة كده صحيوا وقالوا: وه ياندامة .. إيش هادا؟ أتْـرِنُّو إحنا لنا حقوق؟! مادام كده ... الإنتخابات البلدية ليه ما نشارك فيها؟ وليه ما نروح هناك ونرقع بالصوت؟ يا أختي حلال عليكم البلدية كلها .. يعني إيش تبغوا تسووا؟ تحطوا ضوابط إصدار الرخص لمحلات الحلاقة مثلا؟ والا تناقشوا سفلتة الشارع اللي يودي على بيت أم إبتسام؟ والا ليه الشارع الفلاني ما فيه كوفيرة مغربية وكل اللي فيه مصريات؟ يا أختي ريِّحي راسك .. اذا كثير من الرجال ما سوُّوا حاجه ... بالله عليكي حتسيبي بيتك وعيالك وشغلك ... عشان تناقشي مشروع إنتخابي؟ هادا من تمام الفضاوه. طيب قولوا لوحْدَه زواج أختها الليلة: بلاش تروحي للكوفيره اليوم يا مدام وتعالي نناقش حقوق المرأة أو نحضر المجلس البلدي و نتخذ قرارات مهمة .. وأترك لكم جوابها .. إيش يكون أما عن حقوق المرأة في السعودية .. فياسيدي الست هنا لها حقوق وواجبات ما تتنازل عنها. مثلا: في بلدان كثير عربيه وأوروبيه تلاقي شحط طويل عريض جالس في الباص ..وقدامه وحده في الشهر التاسع واقفه على رجولها وشايله طفل تاني على كتفها ... إن الشحط يتحرك؟ .. أبدا...إن الثور يحس؟ ....لايمكن. لكن هل يمكن يحصل هادا في السعودية؟ أبدا .. واللي يبغى يجرب ... الطريق قدامو .... يا عمي العملية كلها دلع حريم في دلع حريم .. رايح أعطيكم بعض الأمثلة وقولوا لي مين اللي آخِد حقُّو بالكامل وزياده؟ وهل عندنا المرأة متساوية مع الرجل .. والا هي أحسن مِنُّو؟ قال حقوق المرأة .. قال. منظر عام رجال محترمين زي الورد واقفين أمام صراف في بنك .. وتِجي أختنا في الله (اللي يقولو إنها مهضومة الحقوق) تتقدم للصراف مباشرة ولا على بالها من الطراطير اللي واقفين من ساعات .. وبعضهم مستأذنين من عملهم. طيب ليه ما توقِّف تِمسك سِرا ورا عشرين بنغالي... وثلاثين باكستاني... وخمسين سعودي... واثنين معقبين معاهم شوية فواتير مقاس إكس لارج .. وإذا أحد كلمها وقال لها أتفضلي يا أختي ترد عليه وتقول: لا، معليش. المرأة زَيّ الرجال ... خليني في الطابور ... زَيِّي زيكم؟! ... ليش ما تقول كده؟! ... والا هي تماحيك وبَس! ونفس المنظر في الجوازات .. والأحوال .. والتأمينات .. ويقدر أحد ... يقول إنه من ظهر أبوه ... يفتح فمُّه؟ ... على طول يسمع العبارة الشهيرة .. ( عيب عليك .. إنت ما تستحي؟ .. هذه حرمة...إنت ما عندك أهل!)) ..ويضطرالراجل إنُّه ينكتم ويسكت .. بل إن المرأة تشفع للراجل جوزها عشان يتقدم على الرجال الباقين. في المطار .. مثلا .. ما تشوفهم يطلِّعوا العوايل أوَّل .. وبعدين بقية الركاب؟ قال حقوق المرأة ... هه! اقتصاديا شوف الراجل... السبع... الغضنفر... المفتري...له ثوبين أو ثلاثة في السنة .. يروح بها العمل، ويحضر بها عزايم وزواجات، ويقابل بها كبار المسؤولين، الخ، الخ، الخ. والمرأة بسلامتها .. بقيمة أدوات مكياجها فقط... تقدر تفتح محل خياطة رجالي محترم. ويا ريت تحط من مكياجها في البيت .. لأ. دا بَس للخروج ... وقيمة صباع روج والا علبة بودره تساوي قيمة جوال جوزها ... وكمان ازيدك من الشعر قصر .. مو بيت ... من حقوقها فستان لكل فرح... و مكياج... و كوفيرة...وجزمة ...وشنطه. وكمان خُدوا هادي .. سابع بنت عمي ... ملكة أخت جارتنا .. ولازم هديه ... واللطخ يدفع .... مو مهم الفلوس جات من فين ... المهم يدفع ... والدنيا ممكن تنقلب على الراجل واللي خَلَّفوه علشان موضوع (مهم وحيوي) زي كده ... قال إيه! حقوق المرأة. نفسيا الزوج مطالب يكون أربعة وعشرين ساعة رومنسي ومبتسم، ولا يبقى جلف وإبن ستين في سبعين. ويعني إيه عنده مشاكل في العمل؟! والا أقساط متأخره؟! والا فواتير؟! والا مقاضي ما يعرف كيف يجيبها؟! مو مهم .. واجب عليه إنه يرجع من العمل للبيت مروِّق ومبسوط وبَس .. كإنه كان في شرم الشيخ مصيف مع نانسي عجرم .. ((مجرد مثل .. تف .. بره وبعيد)) ... والست بسلامتها من ساعة ما يرجع من عملو .. وقبل ما يفصخ حوايجو: شوف بزورتك ( لاحظوا .. بزورتك) طفَّشوني .. إيش رأيك نغير غرفة النوم؟ التلفون ما فيه حراره .. جاتني رساله على الجوال يقولوا الفاتوره طلعت .. أَلحق سّدِّدو قبل ما يوقفوه عن الخدمه ... ... ... ... ومع هادا كُّلو ..لازم يبقى رومانسي. بينما هي وبكل سهولة تصحى بسلامتها في الضُّهر...وتجد الكارثة الكبرى....يوه ...ما عندنا صلصه...وبكل رقة تتصل...ألو ألو ..أبو خالد موجود؟ ممكن أكلمه لو سمحت؟ ألو .. إيوه... أنا .. حتكون مين يعني؟... المهم .. جيب معاك غدا ... ماهو إنت يا فالح نسيت تجيب صلصه معاك أمس. ولإنه موفاضي.. و قرفان من العمل.. يصدق المسكين إنه هو إللي نسي ويقول بكل شجاعة ..... طيب. وفوق هذا كله آخر السنه: طفشانه ...فين حتودينا ...والله بنت خالتي راحت أمريكا .. وبنت عمي ما تصيف إلا فْ أوروبا... يا عيني علينا إللي ما نروح غير يا مصر .. يا سوريا ... والسنة اللي غيَّرنا فيها .. رحنا ماليزيا. وفي رمضان: تعبت ...أوف ....إنت داري عن حاجه؟ أنا أبغى خدامة... أنا خلااااااااص .. ومن ثالث يوم رمضان ...مقاضي العيد من جده ...أختي جابت ملابس لها ولعيالها .. إيش أقولَّك بس ... وخُد مشاوير لليييييييييييل ... والراجل المسكين لما ينزل السوق مع مرته ما يقدر يشتري ولااااا شَي لنفسو، لأنو طول الوقت ماشي وراها من دكان لدكان، وشايل زنابيل إلين ما كتفو يتخلع. وهي تطالع فيه وهو يتطوَّح من ثقل الزنابيل .. ولا تقول لُو فزعه .. حتى لو بالكِدِب. وآخرتها بعد ما يرجع البيت تقول لو إنها لِسَّه ما أشترت ملابس العيد!!!!!! وإذا فكَّر ينزل السوق لحالو عشان يشتري شي لنفسو ... على طول يكون مشبوه .. إيش ينزلك لوحدك وسط الحريم؟ .. طيب إنت مو كنت معايا في السوق .. أحد قال لك لا تشتري؟ قال إيه؟ .. حقوق المرأة. شرعا المرأة لها حظ من أبوها .. وحظ من زوجها .. هادا غير أمها .. وأخوانها .. وأبناءها .. والراجل مطالب إنو هو اللي يصرف عليها مهما كان عندها فلوس. وثانيا: الرجال لازم يروحوا للمسجد خمس مرات في اليوم .. جمع وجماعات .. حر وبرد .. ليل وصبح .. لازم يروحوا ... بينما الست تصلي تحت المكيف .. في غرفتها .. وأجرها زي الرجال تماما ... ياعيني .. يا عيني .. والله الإسلام أعطاكم كتير ... وياريتو يِبان فيكم. إجتماعيا الست كل أسبوع تخرج عند صاحباتها وما ترجع إلا متأخره .. وطبعا جوزها هو اللي يوديها ويجيبها .. (يعني تبغاني أروح مع السواق في هادا الليل؟!) .. وسعادتها ما تبدأ تتمكيج وتسرح شعرها إلا بعد العِشا .. وكل شويه تقول :خلَّصت .. وهي ما سوت شي لِسَّه .. والراجل الغلبان جالس على أعصابو يستنيها تخلص .. أخيرا تقول لُو: وي! إنت ما نزلت السياره؟ .. وَي .. هيا عشان لا نتأخر. المسكين يجري في الدرج (عشان ما يأخرها) .. ويشغل السياره .. ويستَنِّي بسلامتها مو أقل من ربع ساعة حتى تشَرِّف .. وطبعا ممنوع يقول لها: (إيش أخَّرِك؟) والا يا ويلو .. وبعد ما يوصلها .. يستحيل يغتنم الفرصه ويروح هوَّ كمان لأصحابو إلين هي تخلص سهرتها .. (وَه! كيف تروح؟! ومين يقعد مع البزوره؟) .. والماكياج اللي حطتو للستات يتمسح نصو من الطريق .. والباقي بعد ما توصل البيت .. يعني الرجَّال ما يلحق يشوف مِنُّو شي. وإذا بعد شهر أو شهر ونص جات لو عزيمه في زواج ... أو فكر يخرج ليله مع أصحابو .. وبلَّغها من بدري عشان ما ترتبط بموعد مع صاحباتها في نفس الليله وتخرب عليه .. (هو إنت ما تعرف تِقِر في البيت؟ كل ليله معزوم؟ شوفي يختي الراجل .. ما كإنُّو عندو بيت ولا بزوره) لكن مع دا كُلُّو .. برضهم الستات أحيانا نحس إنهم غلبانين .. يمكن عشان قلبنا طيب! .................................................. ...................... |
رد: مقال طريف جداً مكتوب بلهجة
عز الله هذا هو الصدق بعينه
ومشكور ياسلطان ، والله يعطيك الف عافية |
رد: مقال طريف جداً مكتوب بلهجة
مشكور يا سلطان علي هذا الجهد
والمشكلة من اصحاب هذه الهجة الله يعطينا خير الايام الجايه اللهم امــــــــــــــــــين |
رد: مقال طريف جداً مكتوب بلهجة
والله ياأخ سلطان إنك جبت الديب من ديله ( على لهجة اللي هم ) بصراحة فعلاً هذا هو الواقع فعلاً ، لا وأزيدك من الشعر بيت .
إذا جات واحدة منهم قاطعة الشارع أصلاً قبل لاتوصل للشارع تحصل أخواننا في الله المغلوب على أمرهم وقفوا الشارع تماماً وقفلوه وياويل اللي يعدي قبل ماتعدي الست هانم وعلى أقل من مهلها ، يوقف أخينا السيارة فجأة حتى لو أدى لإرتطام السيارات به من الخلف ولافكر . بينما لو كان اللي يبي يعبر الشارع واحد فينا والله غير تنطق ساعتين حتى تجد فرصة للعبور ، وإذا غامرت وقلت أعبر عسى أحد يوقف عني الله يعينك إما دهسوك أو خذ من الكلام والحش الين تدوخ . |
رد: مقال طريف جداً مكتوب بلهجة
أنا بعرف متى أنكتبت هذي المقاله شكله بعد 50 سنه قدام يعني 2057م
وبعدين على أفتراض انه فيه أشياء صحيحه وهي قليله مو طيبه منكم انتم يالرجال لا غصب عنكم ومن ورى خشومكم وبعدين الرسول يقول "رفقا بالقواترير" واحنا قوارير ونستاهل هكذا واكثر شوي انتم تخيلوا الدنيا من غير نساء وش بصير في حالكم ياتماسيح والله لضيعوا من دونا احمدوا الله على النعمه |
رد: مقال طريف جداً مكتوب بلهجة
والله المقال ميه على ميه ومع اللهجه (محبوكه حبك)
والصراحه حقوق المرأه تجدها في الدين العظيم الدين اللي عزها ورفع قدرها ولاتزعلين يادموع الورد لاحياة لنا من دونكم ولاحياة لكم من دوننا |
رد: مقال طريف جداً مكتوب بلهجة
[align=center]انا لقيت في احد المواقع ترجمة لمقال اخونا الطريف اعجبتني لاني صراحة ماقدرت اقرأ المقال وانا ضغطي مرتفع زيه من هذا الكلام ... شوفو الترجمة ان شاءلله تعجبكم؟!
[frame="7 80"]سمعنا الكثير مما يروجونه عن ظلم المرأة المسلمة واضطهادها وأعتقد ان خير رد على ذلك هو عرض الاحصائيات الخاصة بالعنف ضد المرأة الغربية وجميعها احصائيات موثقة من مصادرهم واليكم بعض ما حصلت عليه قبل ذهابي لمؤتمر بكين حيث طلبنا من الشرطة الفيدرالية الأمريكية أن تمنحنا تقارير عن العنف ضد المرأة الأمريكية: 79% من الرجال في أمريكا يضربون زوجاتهم ضرب يؤدي إلى عاهة 17% منهن تستدعي حالاتهن الدخول للعناية المركزة....والذي كتب ذلك هو الدكتور(جون بيريه) استاذ مساعد في مادة علم النفس في جامعة(كارولينا). حسب تقرير الوكالة المركزية الأمريكية للفحص والتحقيق FPT هناك زوجة يضربها زوجها كل 18 ثانية في أمريكا. كتبت صحيفة أمريكية أن امرأة من كل 10 نساء يضربها زوجها،فعقبت عليها صحيفة Family Relation ان امرأة من كل امرأتين يضربها زوجها وتتعرض للظلم والعدوان. أما في فرنسا فهناك مليونين امرأة معرضة للضرب سنوياً....أمينة سر الدولة لحقوق المرأة(ميشيل اندريه)قالت( حتى الحيوانات تعامل أحياناً أفضل من النساء،فلو ان رجلاً ضرب كلب في الشارع سيتقدم شخص ما يشكو لجمعية الرفق بالحيوان،لكن لو ضرب رجل زوجته في الشارع فلن يتحرك أحد في فرنسا) 92% من عمليات الضرب تقع في المدن و 60% من الشكاوى الليلية التي تتلاقاها شرطة النجدة في باريس هي استغاثة من نساء يسيء أزواجهن معاملتهن. في امستردام اشترك في ندوة 200 عضو يمثلون احدى عشر دولة،كان موضوع الندوة اساءة معاملة المرأة في العالم أجمع واتفق المؤتمرون ان المرأة مضطهدة في جميع المجتمعات الدولية وبعض الرجال يحرقون زوجاتهن بالسجائر ويكبلونهن بالسلاسل. في بريطانيا يفيد تقرير ان 77% من الأزواج يضربون زوجاتهن دون ان يكون هناك سبب لذلك. وعندما نعلم ان كل هذا يحدث في بلادهم ويتركونها لتركيز الأضواء على المرأة المسلمة والعربية ويقولون مظلومة وتتدخل لجانهم فلا بد ان نعي انها لن تتدخل لانقاذ المرأة المسلمة لكنها تريد تشويه صورتها ومن ثم الصاق التهم بالإسلام....وعندما يخرجون بتقرير يقول(انتهاكات جسيمة لحقوق الإنسان تتعرض لها المرأة المسلمة) فنتسائل لماذا لا يتقبلون منا توجيه تقرير مماثل لهم على ما يرتكبونه في حق نسائهم؟!.... لا ينبغي ان نلتفت كثيراً لمحاولاتهم تشويه صورتنا لكن نحن لا بد ان نبحث فيما بيننا عن الأخطاء لمعالجتها وان وجد ظلم منقول[/frame] نهاية الترجمة اقتباس:
هو بيكذب على نفسه والا ايه ؟؟؟؟؟ مش ممكن الكلام الي بيقوله ..والله الست منا هي الغلبانه!!! معليش خلاني اطلع من طوري من بعض الكلام الي بيقوله !!!!!! الي بيقوله اصلاً كلام مايخش العقل ؟؟؟!!! ( مع دا كلوالمشكور اخونا سلطان على النقل)[/align] |
| الساعة الآن 09:27 AM |
Powered by vBulletin® Copyright ©2000 - 2025, Jelsoft Enterprises Ltd. TranZ By
Almuhajir
الحقوق محفوظة لشبكة هذيل