|
مشعاب !!
بسم الله الرحمن الرحيم
قصيده في مشعاب .. طيري الذي كنت لااقنص ولا اذوق للمقناص طعم الابه فقدته قبل اكثر من 7 سنوات بعد مات في هجرة الرايس بسبب مرض الشبيكا الذي يصيب الطيور .. وذكرت المقنايص في هذه الايام .. ورجعت بي الذكرى وذكرته .. وتمثلت بهذه الابيات المتوضعه [i]ذيب الشمال اللي سرت به زمهرير سمعت عوّيه فــ النوافذ والابواب قرب حراه .. وقرّبت نقلة الطير وسهيل شقّ اعن السماء ستر وحجاب والقيض زلّ .. وحلّ زين التصاوير اللي على ارقابه يعوجون الارقاب اول مقاديمه ضحوك وتباشير واتلاه يوم يضيق وديان واشعاب مع جرته .. فزّت نبات ومحاجير خبراً يموج بثوبها كل هبّاب في ديرةٍ فراشها والنواوير متخالط ٍ مايفرقه كود نصاب تذاكروه أول وجيه المداوير من ديرته والا من وجيه الاجناب وتشابروه متعبين المظاهير كل ٍ يبا في شرِّة العود مقضاب من صفر والا حمر والا مغاتير متخالفات اشكال واحجام واسلاب ياحلو طشتّ نشرها فــ المخاضير لارفّعت شمس الضحى روس الاهداب فرصة عمر .. فيها تساق المخاسير خص ٍ من اصحاب الهوايه والاعراب من دونها قمت اللتوي فـــ المعاذير شي ٍ غريب وكل شي ٍ له اسباب والادمي يبقى رهين المقادير ماله عن المكتوب .. مكتوب مجّناب يحدا مشاوير الاناسه مشاوير مع قلة الكمّله.. ومع موت مشعاب !! النادر اللي غير .. وصقارته غير مافرعوا مثله طويلين الاشناب وراه يحفون الجيوب الصقاقير ودونه يطشون المشاهير الالقاب فــ الصيف له فجبال فارس مواكير وفــ الشتاء ياخذ على الشام مهذاب ومع صطوة الهدّه .. ومع ريشة الجير تناكفوا فــ حلاه صادق وكذاب عاتق وبوز وراس كاشف واسارير ومناكب ٍ جثله ومفرع ومخلاب قطن ٍ علاه من الذهب دقّ ازارير الا المواسي فيهن الكحل قد ذاب وسود ٍ جواهرها .. لواحض غنادير اللي تسميها المهابيل مشهاب !! عدل ٍ مجسّه في مناسف واشابير افجح وهجّر كراع ومسرّول اكعاب فـــ النقله اميره .. وفـــ الهدّه امير حشّار في فعله .. وفــ الوصف جذاب نجم ٍ مصبّه فوق برق الدواغير واليا ثعى في شجرة الجول حطاب وإن كوّبر الحفال دون المعاشير يبين له مع زرّقة الروح مضراب وإن طار حطّه بين روس البواكير وراه لو ياخذ ورى الغيم مقلاب للريش مع شوّحة كفوفه معاصير وحذّف العباير فوّحة الدم لا راب يامآ قطعنا به دكاك وعثامير من حرة الحره .. ليا خشم عنّاب النادر اللي سجلوا عنه اساطير واليوم غبت عن الاناسه بعد غاب والله لو نبكي لنبكيه يامنير لكن بكانا في رجاء رب الارباب[/i] |
رد: مشعاب !!
صح لسانك ياصالح
فارس وشاعر متميز يعطيك العافيه والله يعوضك فى مشعاب ويجيك احسن منه تحياتى لك وتقديري |
رد: مشعاب !!
صح لسانك وبارك الله فيك
|
رد: مشعاب !!
صح لسانك يابو دخيل الله
والله يعوضك بأحسن منه |
رد: مشعاب !!
السلام عليكم ورحمة الله وبركاته ما شاء الله تبارك الله صح لسانك أيها الفارس النبيل لك أعلى تقييم أيها الموقر وللنجوم الشرف أن تزدان بموضوعك.. |
رد: مشعاب !!
0 0 0 صح لسانك آخوي صـآلح والله يعوضك اطيب منه دمت بصحه وعافيـه |
رد: مشعاب !!
صح لسانك مبدع وغرض شعري نتمنى التوسع فيه من هل الطيور وقوم المقانيص
فشكرا لك أشبعت نهمنا سابقا في قصايد البل والخيل والفروسية والان أتيت بواسطة عقد الإبداع لتتكامل منظومة الجماااااال ومعوض خير يا ابو دخيل الله |
رد: مشعاب !!
ياحلو طشتّ نشرها فــ المخاضير
لارفّعت شمس الضحى روس الاهداب لله درك.صح فكركـ |
رد: مشعاب !!
اقتباس:
صح لسانك دائماً مبدع لك جل احترامي وتقديري |
رد: مشعاب !!
صح لسانك ياأبو خراش ، ومعوض خير إن شاء الله
|
رد: مشعاب !!
صح لسانك وعلا شانك
تحياتي لك |
رد: مشعاب !!
صح لسانك يا أبا خراش قلت فأبدعت وتميزت واعتدنا التفرد والتميز من فارس الصحراء
تقبل مروري وبالغ تقديري ،،، |
رد: مشعاب !!
صح لسانك يافارس الصحراء
|
رد: مشعاب !!
وصف لامثيل له وقصيدة يطرب لها متذوقواالشعر الأصيل والفريد
صح لسانك والله يعوضك بأخير من مشعاب شكراً لحضورك المتميز |
رد: مشعاب !!
صح لسانك يابو دخيل الله كتبت فأبدعت وامتعت سجل اعجابي بهذه الدره الرائعه اطيب التحايا |
| الساعة الآن 01:03 AM |
Powered by vBulletin® Copyright ©2000 - 2025, Jelsoft Enterprises Ltd. TranZ By
Almuhajir
الحقوق محفوظة لشبكة هذيل