الشاعر الكبير محمد بن طمحي الذيابي وحوار مطول ..
 

# مشاركتك في مهرجان الجنادريه متى كانت ؟

شاركت مع إنطلاق مهرجان الجنادريه وفي سنته الاولى عام 1405هـ

وكانت امام الشاعر فازع الصيده المطيري ..واستمرت مشاركتي فيه 24 سنه ..

وفي بداية المهرجان كان الشعار يتمنون المشاركه ويتواجد جمهور كبير لكن فالسنوات الاخيره تغير مع كثرة قنوات الشعر والاعلام المفتوح ..

ومن ضمن المواقف فالجنادريه في احدى السنوات ..كان معنا مطلق الثبيتي وبكر الحضرمي وقال بكر الحضرمي ابيهم يحطوني مع مطلق الثبيتي وبالعب معه باللغه العربيه الفصحى .. قلت له انا لو العب معك ما العب الا باللغه الانجليزيه .. ويوم دخلنا الا المذيع والاعلامي مهدي بن عبار يقول بالميكرفون المحاوره موال بين الشاعرين بكر الحضرمي ومحمد بن طمحي الذيابي .. وانا اسبق الحضرمي على الميكرفون والا يقول الحضرمي خله يا ولدي و الا اقول له لا عندي ..

وقلت (بن طمحي ) فالموال :

WelcomePlease يا كبير الحضارم .. Because بصدر فوقك الامر صارم ..

Good Bye برا عن ديار الاكارم ..والصبر زين وكل مطرود ملحوق ..

ليا عدوا تواريخ الفخر والطيب ** سعودي وافتخر باسم السعوديه

من اول كان لبسه فوطتن فالجيب ** وذالحين لبس غتره وطاقيه

رد الحضرمي :

حنا ترا مانحب اللجاجه .. وانت عتيبي لاتقلد خواجه .. يا الصاحب اللي ماعرفنا مزاجه .. والصبر زين وكل مطرود ملحوق ....

# ابو بدر هل قمت بتدوين محاوراتك الشعريه ؟..

لا والله لا توجد لدي اشرطه للحفلات .. موجوده في مكاتب الشعر .. قبل سنتين احد المهتمين بالشعر قالي باجمعها لك وطلع لي 86 قصيده نظم و52 محاوره وحاطها في cd وكنت باجلس معه لاجل توثيقها وكنت ناوي اسافر لاحدى الدول لاجل طباعتها في ديوان ولكن هذا يتطلب وقت وتفرغ كامل ولكن لاشغالي وارتباطاتي مع ابنائي سبب في عدم سفري ..

# ما المواصفات التي لابد توفرها في شاعر المحاوره ؟

يكون عنده المام بالمحاوره ويبتعد عن الكلام الهابط .. والصوت وسرعة البديهه ولديه توجه بأن يمارس الشعر بطريقته الصحيحه .. يحترم القبائل ويحترم الشعر .. ماينزل الى المهاترات والكلام الهابط .. والذكاء يقتبس من أي شيء معنى ..

# يصنف البعض الشعار بان هذا شاعر هجومي والاخر دفاعي مارايك؟

الشاعر يبدا بمعنى ( الشاعر القيادي) يناقش معنى بينه وبين الشاعر الاخر "خلف الستار" او قضيه عامه .. الهجومي بعضهم اللي يقول انت فيك وانت فيك وهذا لا اؤيده ومايكون على معنى ..

تكون فيه لمسات للجمهور فالمعنى مضحكه ..

# من ترى من الشعراء الشباب له مستقبل فالشعر ؟

الساحه فيها شعراء واجد بعضهم من شعراء المعنى ..

من الشعراء الشباب : محمد العازمي ، فلاح المورقي " له سنوات فالمحاوره" ، على العضياني ..

فهد المحمادي السلمي ، ناصر الدميحي السلمي ، عوض الجامعي السلمي ، كامل الحليلي السلمي

مرهب البقمي ، سعود البقمي ، زياد المرزمي المطيري .. واعتذر عن اللي ماتحضرني اسمائهم.

http://im38.gulfup.com/GdsJv.png

# فيه اتهامات لبعض المكاتب الشعريه بالشلليه ماصحة ذلك ؟

مكاتب الشعر .. سلاح ذو حدين منها الايجابي يخدم الشعر والسلبي اللي يقتصر ويختار مجموعه معينه .. ومن المكاتب الجيده القصير وبيت الجنادريه ومرقاب الشعراء .. وان كان القصير هو متسيد الساحه ومكتب كبير ... واي مكتب يخدم الشعر يستحق الاشادهـ ..

# يحصر بعض الشعراء المحاوره مع شعراء محددين ؟ ما اسباب ذلك ؟

هذا لشيء في نفس يعقوب .. إذا كان قصده يرتاح مع هذا الشاعر لان شعره جزل وفي معناه يبتعد عن الكلام الرديء فهذه الطريقه الصحيحه وإن كان المقصد المحسوبيات والشلليات فأنا ضدها ..

وبعض المكاتب ما يسوق الا لشعراء معينين ..

# يُتهم الشعراء بإخلالهم بالمواعيد والاتفاقيات والذهاب لحفلات أخرى بسبب مقابل مادي أعلى ؟

هذا الاتهام لا انكره وايضاً انا ضد ان يعطي الشاعر كلمه ويخلف .. والرجل صاحب الحفله يتعامل مع رجل سواء مع المكتب او مع الشاعر نفسه .. واللي مايتقيد بكلمته

ولا يلتزم بها صعب ان اصفه وأتغارب هالتصرف ..

# محاوراتك مع حبيب العازمي تتسم بالقوه والشراسه .ما السبب ؟؟

ابو فيصل شاعر جماهيري وطيب ونشمي ومحبوب .. ولازم تجد الشد والنقاش مثل مقابل الفرسان فالميدان كلن يحاول ان يكون الظهور له ..

# علاقة الجن بالشعراء . نسمع ان فيه ارتباط بين الشعر والجن؟ .. وهل هذا صحيح ؟؟

الشعر وراثه وموهبه .. بالنسبه لي في حاجه تحصل اجي للحفله واكون مرهق وتعبان من قبلها

واكثر زملائنا الشعار ايضا نفس الامر.. لكن عندما اوقف عند الميكرفون يروح التعب عني كله ولا كأني تعبان وعند إنتهاء الحفله يرجع التعب والارهاق ..

http://im38.gulfup.com/5Z1ar.png

# ماذا تقول فالشعراء التاليه اسمائهم :

محمد بن شريف السلمي ( الجبرتي) : مدرسه شعريه جماهيريه .. عرفتني على الجمهور محاوراتي معه ..

مطلق الثبيتي : بحر تغوص فيه فالمعاني .. فيه كل الجواهر من كل جهه..

عوض الله ابو مشعاب السلمي: شاعر كبير في شعره وعقله وجزالته وانا استفدت منه ولا انسى صداقتي معه واقرب الشعراء لي .. وتعلمت المقالب منه .. ولا استخدمها الا مع شعراء معينين ..

فيصل الرياحي : الله يرحم فيصل عملاق فقدته الساحه على مستوى كل القبائل ..

عبدالله الذيابي (العمى) : شاعر كبير ابو نايف وشهادتي فيه مجروحه ..

عبدالله عتقان السلمي: شاعر مرن وحي وممتاز في شعره وفاخلاقه ..

صقر سليم : شاعر قوي مثل البواردي مجهز لك اذا رميته رماك ..

تركي 2000 : شاعر له جمهوره وثقله فالساحه وشاعر مطير فالمحاوره ..

فهد العازمي : شاعر قوي وشاعر ثمن ومتابعه ..

# شعر النظم متى بدايتك معه ؟ وكيفك الان مع هل مقل في قصائدك ؟

بداياتي من صغري .. اغلب الصغار فالسن قصائدهم عاطفيه ...

كنت اكتب في أي مجال .. لكن فالسنوات الاخيره لانشغالي اكتب في مناسبتها في أي موضوع اراه يخدم قبيلتي ووطني ..

# بينك وبين الشاعر مرزوق بن غازي السلمي قصيده وجهها لك ورديت عليها .. ما مناسبتها وماهي القصيده ؟؟ وردك عليها ..

المناسبه كانت احدى حفلاتي ومع انشغالي للحفل نسيت اعزم شاعر سليم مرزوق بن غازي السلمي وفي بالي اني عزمته وهو صديق عزيز وزميل دراسه ايام كنت فالكويت كما ذكرت في بداية الحوار .. وجا للحفله هو والشاعر تركي الميزاني وجا بقصيده وضعها في كرت ..

ومن ابيات القصيده :

سلام يا ذخر الرجال الحشيمه *** يا الصاحب اللي كنك الضلع راسي

راع الكرامه والطبوع الكريمه *** وقت الوازم والمواقيف قاسي

محمد يابن طمحي صفاتك عظيمه *** وابسط صفاتك شاعرً دبلوماسي

إن جات للحكمه علومك حكيمه *** وإن جات لعلوم السياسه سياسي

يابو بدر جيتك بليا عزيمه *** وأنا ادري أنك يابن الاجواد ناسي

حضرت لك تقدير شيمه وقيمه *** من طيب ساسك يالعتيبي وساسي

ماجيتك من شان أحضر الوليمه *** واجلس على السفره واعد التباسي

لوكان غيرك قلت تركه غنيمه *** اجلس كما الكرسي بوسط الكراسي

لكن لك من بين الاصحاب قيمه ***تبقى كما تبقى الجبال الرواسي

الى ان قال

والطيب المعروف ربي يديمه *** بيني وبينك شيء ثابت واساسي

و تمنيت تجي عنده حفله وما اريده يعزمني ولكن الرجال عرفها يتصل علي وبعض المرات ما ارد على اتصاله .. لكن صادني وعزمني وجيته بقصيده وهي :

يامرحبا ترحيبةٍ مستقيمه ** والاستقامه مثل خمس الحواسي

عند الرجال أهل العقول الفهيمه *** اللي لهم بالعز مركز رئاسي

صعبٍ على اصحاب الحكي والنميمة *** اللي مجالسهم مشاكل واماسي

مايصله ياكود صاحب عزيمه ***مثلك يابو غازي سلمت العكاسي

ياصاحبٍ بالطيب سيماه سيمه *** قاسي وراسي فالمواقف حماسي

قاسي ليا قابل خصيم لخصيمه *** وراسي ليا بان الذهب والنحاسي

وإن جا نهار فيه فوز وهزيمه *** وبانوا أهل الماقف من اهل الحساسي

ربعك مرويت الكبود المحيمه *** مثل البحور أعماقها ماتقاسي

ولو كل من خالف كتب له قسيمه *** يمدا القسائم زادت عن الدواسي

ودعواك ماهي يابوغازي يتيمه *** غيرك رجال ٍ من جميع الجناسي

ماني بناسيكم وقصدي هضيمه ** لكن مع الزحمه يصير التباسي

اما اسمحوا لي والعواقب سليمه *** ولا امروني وامركم فوق راسي

# آخر قصيده كتبتها ابو بدر ..

قصيده ( عتق رقبه) وهذه موجها لاخوانا قبيلة العوازم وشيخهم / بزيع بن حامد بن تويلي

ابتديت بذكر من ينشي السحاب ** وانزله يحي البلاد المجدبه

بعد ماكانت سرابٍ في سراب ** يخدع الضامي يحسبه يشربه

إنتشى مزنٍ على شكل الهضاب ** من شروق الكون حتى مغربه

وانهمر وبله على الديره وذاب ** ذوب ثلجٍ في سواحل قرطبه

والصحاري والروابي والشعاب ** من يشاهد سيلها ما يقربه

وانبتت من كل مالذ وطاب ** واصبحت واحات كلٍ تعجبه

يا اله الكون جنبنا العذاب ** يا رؤوف بالعباد المذنبه

الشعر لامن دعيناه استجاب ** في لزومه وأطيب الشعر اعذبه

شاعرٍ والشعر احسب له حساب ** مير ما اقوله في كل مناسبه

غير لن جا ماقف الربع المهاب ** اصخره في نظم ولا ملعبه

وبسم كل ذيابي اوجه خطاب

وبسم كل عتيبي اوجه خطاب

وبسم كل الناس اوجه لي خطاب

**فيه جزلات البيوت مرتبه

صوب شيخٍ لالفوه اهل الركاب ** ينشرح صدره ويضحك حاجبه

يابزيع لوقفتك واقع مجاب ** وقفت الطيب ماهي مستغربه

انت سيف القوم منقوش النصاب ** ضربته ضد الاعادي معطبه

يالعقاب ابن العقاب ابن العقاب ** العقاب اللي مسمم مخلبه

حامد اللي مثل ابن غانم ذياب ** والمراجل كسب دقنه وشنبه

شيخته ماجات بتصويت وإنتخاب ** جات بفعله والسيوف مخضبه

نخوتي تنصاك من رفقة واداب ** ياالاديب اللي رفيعٍ منسبه

ابذل الاسباب واطرق كل باب ** واطلب الي من طلب ماخيبه

ويالعوازم ياعزيزين الجناب ** يارجالٍ فاللزوم مجربه

كلكم والنعم شيبان وشباب ** انتم اهل النعم وشيوخ عربه

يومٍ قال المثل ودا وجاب ** قال كلمه من سمعها تطربه

لاحدتك احداث الايام الصعاب ** دور اطرف عازميٍ لوذ به

ويا اخوان اللي رحل عنا وغاب ** العمر محدود وقته وسببه

والندم ماعاد ينفع والعتاب ** لو ينفع ما نجيكم غير به

لو نطوف الكون ذهاب واياب **ومن تعب فالحق مخلوف تعبه

وقيل فعل الخير مادونه حجاب ** والاجر وحظ من هو فاز به

لاحضرنا للثواب وللعقاب ** واصبحت نار اللظى في مقربه

فازوا الساعين في عتق الرقاب **حظ من هو فاز ((عتق رقبه))

مثل ماسوا سعد حسن الجواب ** ابن مجهز بيض الله شاربه

اعتق رقبتين رجواها الثواب ** من إله كل مؤمن يطلبه

ومثل ماسوا بن مناع وذياب ** اعتقوا يرجون حسن العاقبه

والمصاب اللي قريب من المصاب ** دايم افكاره تجي متذبذبه

مرةٍ يخطي وهويبغى الصواب ** ومره يصيب ماهو منتبه

ماتهنا في طعام وفي شراب ** منشغل فكرهووقته يحسله

ينتظر وش مضمون الكتاب ** الكتاب اللي ماهو فالمكتبه

http://im38.gulfup.com/BmBVR.png

# ابو بدر .. تتابع الرياضه ؟؟.. واي الانديه تشجع إذا كان لك ميول ؟؟ وهل لك قصائد رياضيه ؟؟

نعم اتابع الرياضه ... واشجع الاهلي ... ومتابع للمنتخب ..وعندما حقق كاس اسيــــا قبل اكثر من25سنه كتبت قصيده فالمنتخب وطلعت فالاعلام .. وكذلك عندما تأهل المنتخب لكاس العالم 1994... وعندما حقق الاهلي بطولتين من امام الاتحاد في موسم واحد قبل 6 سنوات تقريباَ من ضمن الابيات قلت ( البطوله جابها قدم العميد) ..

وارتاح للهلال بعد الاهلي ..

وفي محاوره مع فيصل الرياحي .. قلت : يا خالد قهوجي زدت الملاعب شوق # لكن ماعرفت تسجل القول ...

وعندما كنت فالكويت كنت اتضايق عند هزيمة المنتخب السعودي .. ولكن جا ماجد عبدالله وفرق عن كل اللعيبه وهو اسطوره ولو يجي عندي لا اذبح له طلي واحتفي به ..

يعجبني من اللاعبين يويف الثنيان .. خالد مسعد .. سعيد العويران ..

اما الجيل الحالي مستوياتهم مثل مستويات الشعار ليله مرتفع المستوى وليله منخفض..

ويطلعوا نجوم ويفلوا بسرعه مثل : ياسر القحطاني ونايف هزازي وغيرهم ..

حالياً اغلب اللاعبين فالعالم مصنوعين ... الاسطوره مارادونا وافضل لاعب فالعالم

لكن سلوكه انهاه.. ويعجبني زيدان .. وتيمومي وطارق ذياب والاخضر بيومي

ومن الخليج جاسم يعقوب وفتحي كميل وفيصل الدخيل وحمد بوحمد

لكن اللي زعلني سمعت احد المعلقين يقول عن لاعب عالمي

في احدى المباريات محبوب ومعبود الجماهير!!!

&&&

قصيدة العيون الخرس

http://www.youtube.com/watch?v=kaI0AP-9Exw

&&&

إنتهى الحوار

المصدر:منتديات ستارتايمز الشعر الشعبي

رد: الشاعر الكبير محمد بن طمحي الذيابي وحوار مطول ..
 

تسلم يا فتى ، وابن طمح شاعر شق طريق على أي حال . وننتظر لقاءات شعراء هذيل أهل الكلام الجزل والحس الشعري القوي والغير معروفين


خاصة مع وجود الجوالات والتقنيات الحديثة ،،