بعد الفقر حطت شريحة و جوال
يسعد مسا جوالها و الشريحة
كانت تجيني تشتكي قلة المال
و تصيح لا جا طاري الفقر صيحة
تقول أبويه دايم الدوم رحال
و أمي كبيرة سن دايم طريحة
و أنت الوحيد اللي لك القلب ميال
دايم يصارحني و أنا له صريحة
طفلة و أنا معشوقها بين الأطفال
جريح حب و طاح له في جريحة
كنا سوى نرسم على التربة آمال
و أحلام تقتلها الحياة الشحيحة
كم دمعة كانت على الخد تنهال
و إذا نزلت ضاقت علي الفسيحة
الله كم صرخة .. و همسة .. و موال
الله كم جادت علينا القريحة
الله كم بيت كتبناه يختال
و أقول أنا ضيدان و أنتي مليحة
نخيل لو ما ف السماء برق و خيال
و انكذب الأيام لو هي صحيحة
و تقول لا حطيت لك بشت و عقال
و سخر لك الرحمن عيشه مريحة
أخاف تتركني على عثرة الفال
للفقر و وجيه الحياة القبيحة
و حبيتها بين الخلائق و الأزوال
حب يطول الوقت محد يزيحة
و سلمتها قلب تباريه الأهوال
و طاح الخفوق و طيحة القلب طيحة
راحت و خلتني مع القيل و القال
شاعر صواديف الدهر تستبيحة
و دار الزمان و غير الحال بالحال
و جاها الزمان بكل ورده و شيحة
فلة و خدامة و لكزس و جوال
و أنا عجزت ادفع رسوم الشريحة
ضيدان بن قضعان