رد: فكرة برج المليون رد .............!!!
كيف توصف المطر وتنقل علومه
هذا موضوع يتكلم عن كيف تنقل علوم المطر
والخير بذرابه وبوصف يكون دقيق وفي محله
ومن اكثر الاشياء اللي ينتقدهـ الشيبان في شباب ذا الايام
هو جهلهم في بعض الاوصاف والمصطلحات اللي تستخدم
في الوصف في بعض الاحيان ومامنه فكه
ومنها كيف ننقل علوم المطر والخير خاصه إذا جيتهم
من ديره بعيده او رحت عساس او كشتات
راح تواجه السؤال التالي ::
وش وقع الارض وش علومها وش علوم المطر
أرب الارض ممطوره خاصه اذا كانو يتحرون الخير
وهنا لازم تكون ملم في بعض الاوصاف والمصطلحات اللي
تعتبر مقياس لانك مو معقوله تقوله واجد او شوي لان الواجد
والشوي وصف عام ولا يشفي قلب النشاد وخاصه اذا اللي
يسأل شايب تلقاه يا بيصد عنك
والا يمكن يقولك منتاب من اهل العلم ومراحك زي مجيك
وباذكرلكم بعض المصطلات للوصاف بترتيب في مايخص المطر
ــ اول مصطلح هو " مابل الدمن " وتتبعها بقول من هالاقوال
ماعند الله بزهيد او الله يجيب الخير
والمصطلح هذا يرمز الى ان المطر كان قليل
لدرجة انه الله يكرمكم ما بل الدمنه
وينقال بهذه الطريقه
والله مامن مطر يذكر رشه مابلت حتى الدمن وماعند الله بزهيد
والله يجيب الخير ويرزق المسلمين
ــ المصطلح الثاني " دم الارض " وتتبعها بقول من هالاقوال
ماعند الله بزهيد او الله يجيب الخير
والمقصود منه انه بل الارض حتى تساوى لونها
وصار شيفة الارض دل انها مبلوله
وينقال بهذه الطريقه
والله مامن مطر يذكر رشه دمت الارض وماعند الله بزهيد
والله يجيب الخير ويرزق المسلمين
ــ المصطلح الثالث هو : " شد الوطي " وتتبعها بقول من هالاقوال
ماعند الله بزهيد او الله يجيب الخير
وشد الوطي هو انه الارض مايظهر بياضها اذا وطيت
سواء كانت وطيت ادمي او مطيه او غيره ولو حفرتها
بتلقى ان الماء يكون ماتعدى نص كف هذا يقال شد الوطي
اما اذا تعدى له وصف ثاني
وينقال بهذه الطريقه
اللهم لك الحمد جتنا رشة طيبه ولحقت شد الوطي
وان طرح الله فيها البركه وجاها رجع وولي طيب
بتحل بركتها
مقايس الحفر وهي للارض الدماث الرمليه اما الصخريه
لها مصطلحات ثانيه
بعد هذه المصطلحات يجي مقياس الحفر
والواحد ان كانه داري انه بيوجه احد من الشيبان
لازم يتجهز له بالعلوم اللي تسره ولازم تحفر وتشوف الحفر
واذا زاد عن نص الكف او لحق الكف يذكره لهم
وينقال بهذه الطريقه
جانا مطر زين وحفره لحق الكف او دونه شوي
واذا امكن يعلمهم بحدود المطر وهم بيقولون حدوده وين وش دياره
وهنا يا انك تقول كذا وكذا والا تقول والله ماعلمنا بحدوده
ولا واجهنا المخبر ويخلص نفسه
وبعدين الحفر اللي اكثر من الكف هو ملتحم الذراع
وهو الرسغ في المنطقه اللي يغيب فيها العظم
وينقال جانا مطر طيب وحفره ملتحم ذراع دونه او زود شوي
والله يجيب الولي وترجع الارض
وعقبه حفر الى الكوع
وينقال كذا
المطر معاد عنه منشود جانا مطر طيب وحفره حول الكوع
والله يطرح فيه البركه ويرجع الارض
وجملة ماعاد عنه منشود هي كنايه ان الخير جا
ولاعاد تنشدون عن حفر ولا غيره
في الامطار اللي بتجي عقبه لان الارض بتنبت
ولاهيب محتاجه الا اللي يقوي عود النبت
وهذا اقل شي يكفيه وكل قطره بها حيا
الحفر اللي ازود من الكوع مبالغه ولا له داعي
وضياعه من راعيه
شايب يوم سمع ولده يقول يبه الحفر مترين
وهنا وصف السيل في الارض الرمليه
سالت وانقعت الارض والمقصود هنا ماهي مواطي الارض
لا تخربطون بينهم المقصود الارض المستويه
تكون فيها نقع يعني حار الماء والارض روت
وانتبه لهذه الملاحظه المهمه
ترى اللي بيطالع المواطي والا النقع اللي حول الزفلت
بيكون علمه ماهو دقيق لإن الما يتجمع حول الزفلت
لو ينزل ادنا الدون
ويقال في الوصف له وقياسه سيل اظهر روبة الارض
( من جريان الماء في الارص وفي روس الصياهد
يطلع الرمل الناعم الابيض ويقلب الارض )
ويقال في اقوى درجاته فتق الجحور وشق روس الصياهد
انه من قوتها هدم الجحور وسو مجاري ماء في المنحدرت
من روس الصياهد
اما الارض العزاز والصخريه يقال حار الما وزاعته الارض
وامتلت الخباري وسالت الشعبان
ومن صعب وصف الارض الصخريه لانه صعب الحفر
بس عين الخبير تعرف توصف لانها تغر الواحد
والسلام عليكم ورحمة الله وبركاته
مع تحيات الخبير هههههههههههه
| التوقيع |
|
هـــــــــــــــــذيـــــ ـــــل عـــــــزوتـــــــــــــي ونـــــــــاســــــــــــ ـي
 |
|