لشاعر تخلـّد صفحته بالسجلات = يصفّ المعاني دُرّ ويوكـّد اسمه
يجيب الفرايد والشوارد زرافات = بوصفٍ بديع وقول ساير وحكمة
ولا هو براعي فلسفة وادعاءات = يقبـّل جبيـن الجزل ويحب خشمه
كلاسيكي الأسلوب يعطيك اشارات = ودايم قصيده يظهر اسمه ورسمه
وله موقف ٍ واضح من اهل الشعارات = دعاة الحـداثة قاطعين الازمـّة
وهو فوق ما قلنا زبون الصعيبات = رفع راسنا يوم إنها جات يمه
من الاد مطرف متعبين الاصيلات = هذيلي مجوّد خال لا قيل سـَمّه
يا صالح معاناة البشر فاتجاهات = على كل باب من المخاليق زحمة
أحد يشكي اصحابه وأحد يشكي الذات = وأحد يشكي الفاقه والاخر بتخمه
وأحد لو يعدّ المال جا سبع ميـّات = وأحد لو يعـدّه عشر خانات رقمه
وأحد يشتكي بيض العذارى ولا بات = مبين الرضا والصد خلوه تهمه
وأحد صادق وكذاب وبعشر نيات = ولا يلزمه مذهب نظيف ٍ ولزمة
وكله يهون اليا سلمنا من وشـاة = عرب زادها الزواد نقص ومذمّـة
يشبون نار الظن بين الحمولات = لك الله يا غافل سروا بك بنمـّة
ابى شور يالطيّب فهذي المعاناة = وانا خاطري متكدر وزاد همـّه
وش الحل يا الفارس فبعض العلاقات = نعز البنا للناس ويبون هدمه