هذيلي في نيوزلندا
السلام عليكم ورحمة الله وبركاته
إخواني أخواتي الكرام هذه قصه حصلت لي عندما كنت في الخارج قلت اذكر رحلتي كاملة لكم و أوسع صدوركم بسردها لكم على شكل حلقات لطولها والقصة صحيحة دون زيادة أو نقصان أبذكر كل شي حتى العيوب وهي على كل حال فيها فائدة وعظة ومواقف وطرائف وهي مسلية لكم طالما أن طلاب المنتدى راحوا يذاكرون ابقعد أسولف لكم الين ماتخلص امتحاناتهم وينجحون ويرجعون لنا بالسلامة .
البداية :
في نفس هذا الشهر من العام الفائت جلست أفكر وقلت في نفسي ياولد الصيف قرب وطباخ التمر اللي يطبخ معه البشر قرب وأنا وش جلسني في هالحر طالما عندي إجازة !! ليه ما أسافر وأغير جو بدل جلوسي هنا !
قلت لنفس طيب قررنا السفر لكن وين أروح ؟ وين تروح يا فهد وين تروح ؟ وخاصة إني من الأشخاص اللي يستغلون أوقاتهم في شي مفيد طبعاً مو كل الأوقات- لكن نصف الأوقات تقريبا لذلك أبي شي مفيد لي .
وأنا أتصفح احد المواقع الأجنبية شدني موضوع فجلست اقرأ الموضوع ولأني لغتي ليست قوية لدرجة أن افهم كل شي مكتوب قدحت فكرة في راسي !!
ليه ما أروح ادرس انجليزي ومنها سياحة وتعلم ؟
واستقريت على هذه الفكرة اللي فعلاً أجزمت أنها جت في وقتها ، وفي نفس اللحظة بديت ابحث في النت على الدول اللي تتحدث اللغة الانجليزية .
وجدت الدول التالية أمريكا كندا بريطانيا أستراليا نيوزلندا فقط هذه الدول هي التي يتحدث أهلها اللغة الانجليزية ، هنا بدأت الخيارات ماهي أفضل دولة مناسبة لي ؟
قلت لنفسي أمريكا بعد الإحداث ماتنفع وأخاف بدل ما ادرس في معهد أصير أدرس في جوتناموا!!!! فك الله أسرانا وردهم إلى أهلهم سالمين انه القادر على كل شي .
ووضع السعودي هناك سيء هذا غير الفيزا والوقوف فتره طويلة في الجوازات إلى آخر هذه الأمور .
لذلك حذفت أمريكا من القائمة ثم انتقلت لكندا ولأني ما اعرف شي عن تعاملهم اتصلت بزميل لي توه جاي منها وسألته كيف تعاملهم قالي والله حققوا معي في الجوازات !! قلت ايه هين !! قال والله !! قلت كفيت ووفيت وشلتها من القائمة .
انتقلت لبريطانيا ووجدتها مناسبة لقربها لكن سبحان الله العظيم ما ارتحت قلت أخاف أروح هناك يصير تفجير مثل ما صار تفجير في الأنفاق عندهم ثم أروح فيها من تحقيق وغيره وخاصة أن شعبهم عنصري بحت ، وشلتها من القائمة .
انتقلت لاستراليا ونيوزلندا أنا ذكرتهم مع بعض لأنهم جنب بعض ونفس القوانين تقريبا حتى أن السعودية لها سفارة وحده للدولتين وهي موجودة في استراليا واللي في نيوزلندا ملحقيه والله اعلم .
طيب الحين أروح لاستراليا وإلا نيوزلندا ؟ أقارن بينهم وأشوف الأفضل .
بعد البحث وجدت أن نيوزلندا أفضل من استراليا بالنسبة لي من عدة نواحي
اولاً أن السعودي لايحتاج إلى فيزا إذا راح يجلس اقل من ثلاثة شهور بينما استراليا لازم تفيز حتى لو مررت على مطاراها كترانزيت ولو لساعة وحده !!!!
ثانياً استراليا أيضا مهدده بسبب اشتراكها في الحرب !
يمكن واحد يقول لي ليه هالحساسية أقول أنا ماوراي ناس مصيرهم متعلق فيني وإلا كان استشرتهم وأخذت رأي الأغلبية ، إذن أنا أختار ما ترتاح له نفسي وطالما أن الدولتين متساويتين إذن لازم اطلع الفرق حتى لو كان صغير ولو مافيه إلا هالدولة أبروح ولا راح أفكر بهالأمور ، في النهاية اخترت نيوزلندا واستقريت على هذا الاختيار بعد الاستخارة .
باقي الآن احدد المدينة والمعهد اللي راح أدرس فيها ، ذهبت لموقع دولة نيوزلندا وبديت استعرض المدن وأشوف تفاصيلها واطلع على قوانينها من إلى ما خليت شي وممكن يسأل واحد ويقول ليه مارحت مكتب يصلح لك أمورك وتريح نفسك
أبقولك لسببين أولا أنا ابحث عن معهد مافيه عرب لان هدفي ارفع مستوى اللغة الانجليزية عندي والمكاتب تجمع كل السعوديين في المعاهد اللي متعاقدة معها ووجود العرب ممكن يفسد علي لأني مااقدر ابقعد أسولف معهم .
ثانيا الأعمال اللي اقدر عليها أو أشوفها سهله أحب اعملها بنفسي كتجربة جديدة في حياتي وعلى قول المثل إن لقحت وإلا ماضرها الفحل يعني أن فشلت وماقدرت رحت للمكتب لكن أبحاول أول .
تعرفت على المدن فأول شي عملته تجنبت المدن الكبيرة واللي أكيد العرب يتواجدون فيها بكثرة وممكن تلهيني عن الدراسة ومعيشتها راح تكون أغلى من المدن الصغيرة .
لكن المفاجأة اللي وجدتها أن فصل الشتاء راح يبدأ وقت وصولي المتوقع !!!!
ودرجة الحرارة عندهم تصل إلى الصفر أو اقل أحياناً !!!
والصفر هذا ماقد شفته ولا قد مر علينا اسمع فيه لكن ماشفته !! قعدت أفكر وأتخيل الجو لما يكون درجة الحرارة صفر ! أنا قد سمعت في الأخبار أن في الدولة الفلانيه مات كذا شخص بسبب البرودة !
يالله ياخوفي أتجمد هناك الحين وش السواة اخذ معي فروه وش بيقولون خروف برأس إنسان !! وهل ألفروه أصلا بتنفع مع تحت الصفر !!
تخيلت نفسي طايح جنب الرصيف يابس من البرد وقطعة ثلج صغيره فوق خشمي .
قلت في نفسي أقول والله مايردني البرد أبلبس كذا فنيله صوف وان شاء الله ما أحس بالبرد ، أنا قد رحت للصمان وجلست ثلاثة أيام ما أظن بردهم مثل بردنا الصحراوي اللي يكسر العظم شكل بردهم ناعم لأني أشوفهم في التلفزيون يلبسون خفيف في عز البرد عندهم .
نيوزلندا يا أخوان هي عبارة عن جزيرتين شمالية وجنوبيه الشمالي أدفا من الجنوبية لذلك اخترت الشمالية .
أنا الآن ناوي اختار مدينه صغيره لكن أنا حاط في بالي أن هالمدينه الصغيرة أبيها تكون قريبه من مدينه كبيره لان المطار بيكون فيها وغير كذا اقدر اطلع لها لو بغيت أتمشى أو احتجت لشي ، وطبعا المدن الكبيرة فيها كل شي والصغيرة لا شي .
اخترت مدينة أسمها هاملتون قريبة من مدينه كبيره أسمها أوكلاند يعني تبعد عنها تقريبا أقل من مية كيلو ، وبديت أتفحصها و أدور المعاهد اللي فيها وأشوف أسعارهم وصور الفصول والمدرسين الخ .
تذكرون في البداية لما قلت لكم اني رحت لموقع دولة نيوزلندا هذا الموقع تابع للحكومة وفيها يوضحون لك المعاهد المعتمدة لان هناك معاهد غير معتمدة بسبب نظامهم السيئ او مساحة المعهد او غيره لذلك حرصت اني كل مالقيت معهد أشيك على اسمها من ضمن القائمة هي موجودة وإلا لا .
طلعت ثلاث معاهد في هالمدينه وكتبت رسالة وحده وأرسلتها للمعاهد الثلاثة ، طبعا الرسالة كتبت فيها اني ابغى ادرس عندك من تاريخ كذا ولمدة ثمانية أسابيع طبعا التعامل بالأسبوع مو بالشهر ولا اليوم ، واني قريت الأسعار في موقعكم ولكن أبغى تخفيض ( هذيلي ماعنده يكاسر حتى الأجانب ) لأني ابقعد عندكم ثمانية أسابيع .
وكيف ادفع لكم المبلغ لاني ماعندي بطاقة أتمانية وابغى عائلة أسكن عندهم وأهم شي عندي تكون العائلة تعرف تصلح جريش ههههههه امزح معكم المهم اللي صار
كل المعاهد الثلاثة ردو علي وكلهم عطوني خصم اللي عرفته بعدين ان هالخصم أصلا مخصص للمكاتب اذا جابو لهم طلاب ، وبعض المكاتب تزيد عن السعر الحقيق وتاخذه لنفسها مايخافون الله على العموم بعدين أقولكم كيف .
ونسيت اقول لكم اني سألتهم كم طالب عربي عندكم ، المهم بعد ماجاني الرد انبسطت وتفاجأت أنهم ردو بسرعة !! انا توقعت اقعد أسبوع على مايردون تصدقون ماخذ يوم واحد الا وهم رادين ومعهد رد بعد يومين .
الخصم اللي جاني عشرين في المية يعني في الألف مائتين ريال وبصراحة شي طيب يعني إذا أنا أبدرس ثمانية أسابيع والأسبوع بخمس مية ريال يعني أربعة الآلف ريال أوفر فيها ثمان مية ريال ، وهذا المبلغ كانت المكاتب الأمينة تاخذه منك والغير أمينه يزيدون عن هالمبلغ .
وسبحان الله كل المعاهد فيها سعوديين احيانا احس ان الشعب السعودي أكثر من الشعب الصيني بسبب تواجدهم في كل مكان !
أخترت المعهد اللي موقعه زين وشكله حلو وعدد السعوديين أقل وسعره أقل وراسلتهم وقالو لي اذا ماعندك بطاقة عادي ممكن تعمل لنا حوالة وبالنسبة لطلباتك موجود في موقعنا ملف وهذا رابطه نزله وعب البيانات اللي تبغاها وأرسلها لنا .
نزلت الملف وفيه كل شي حتى العائلة وأعمارهم وهل عندهم أطفال أو لا وهل فيه أكل معين ما تأكله وموعد رحلتك وكم رقمها إلى آخر هالامور .
رحت وحجزت وأخذت بيانات الرحلة ثم عبيت الطلبات في النموذج اللي نزلته منهم وارسلتها لهم ثم رحت للراجحي وحولت المبلغ واخذت صوره من الوصل وارسلتها لهم .
ردو علي وقالو اصبر الحوالة أحيانا تتأخر و أول ماتوصل لنا الحوالة راح نرسل لك ورقة القبول .
بعد يوم ردو علي وقالو الحواله وصلت وهذا خطاب القبول اطبعه وقدمه لموظف الجوازات اذا وصلت نيوزلندا .
وبالنسبة لعائلتك فهذا عنوانها ورقم تلفونهم واسم ام العائله (نسيت اسمها) وابو العائله اسمه كذا والام تشتغل كذا والاب يشتغل كذا ، سبحان الله لو اني ابخطب منهم ماعطوني كل هالتفاصيل .
وبالنسبة للسواق اللي بيستقبلك في المطار أسمه كذا ورقم جواله كذا وهذا رقم مدير المعهد أي مشكله تواجهك اتصل على طول .
حتى انهم ارسلو لي رسمه كروكي للمطار واي بوابه اطلع منها ووين بيكون السواق ، قلت الحمدلله تمت الأمور بكل يسر وسهوله ، طبعت الخطاب والبيانات الثانية وخليتها على جنب الى وقت الرحلة .
بالنسبة للخطوط السعودية ماتوصل لان الخط بعيد ونسيت أقول لكم ان أسوء مافي الرحلة هي طولها يمكن ماتصدقون اذا قلت لكم خط سيري كيف راح يكون !
اولا من السعودية الى هونغ كونغ المده عشر ساعات ثم انتظار ثمان ساعات في المطار ثم من هونغ كونغ الى نيوزلندا عشر ساعات !! تصدقون !! قصمت ظهر
رحت للسوق وشريت المستلزمات من لبس وغيره وركزت على اللبس الشتوي ولكن للاسف الوقت عندنا صيف ولا حصلت ملابس شتويه الا قليل لان اغلب المحلات رجعوها للمستودعات .
قرب موعد الرحلة وانا سفري راح يكون على الطيران الصيني واسمها كاثي باسفيك وانا كنت مختار الطيران الاماراتي وبغيت اتورط لان الطيران الاماراتي يوقف في استراليا بعدين يكمل على نيوزلندا وقانون استراليا يقول لازم تفيز حتى لو انك بتقعد دقيقه في مطارنا والحمد لله اني مارحت عليها وإلا كان رجعوني .
رحلتي راح تقلع يوم الجمعة الساعة الحادي عشر ليلا وكل هاليوم جالس أودع الأهل والأصدقاء وقلت اذا جت الساعة ثمانية طلعت للمطار وجلست على الانترنت ورحت لموقع الكاثي وجلست اتفرج على مطارهم وش فيه وش مافيه ومتى بتوصل رحلتي ومتى بتقلع وهل مطارهم فيه مصلى والا مافيه وسبحان الله اتصل على طيران الكاثي باسفيك وقالو مستر فهد قلت يس قالو ترى رحلتنا بتتأخر قلت الى متى قال يمكن ماتطلع الا الفجر قلت اوكي ثانكيو .
والحمد لله اني جلست في بيتي ولا جلست خمس ساعات في المطار وفيه ناس مساكين جلسوا في المطار ومادرو إلا عقب ما وصلو المطار .
الى ان جت الساعة ثلاث الفجر طلعت للمطار .
أكمل لكم ان شاء الله في الحلقة القادمة
ارجو ان تكونو استمتعتم بالقصة اللي راح الوقت كله وانا في بيتي مابعد طلعت
|