ون ابن جدلان من لايعٍ لاعه ،،، كن في كبدي دوافير صناعي
العب المنكوس واحب روباعه ،،، ممنٍ في الوقت والوقت خداعي
مادريت ان ضحكة الوقت خداعه ،،، شفت مدخالي ولا شفت مطلاعي
لا بغيت اسج والا انبصط ساعه ،،، دق قلبي من ورا حدب الاضلاعي
كن من بين الضلوع آلة طباعه ،،، تشتغل لانمت واقوم مرتاعي
هم قلبي ما يفرق تجمّاعه ،،، غير جر الصوت والناس هجاعي
فاقدٍ لي سلعةٍ واكبر أبضاعه ،،، سلعةٍ تشرا ولاهيب تنباعي
رفقة الطيب ليا غير اطباعه ،،، اشهد انها كيةٍ توجع اوجاعي
راكب اللي صممه صاحب أصناعه ،،، جمس بيك اب من حديثات الانواعي
الغريب الي جديدٍ من انواعه ،،، حوض رفرف مايبي شد وشراعي
لا أنس البنزين عجلٍ تفرقاعه ،،، مخطرٍ من سرعته يقلع اقلاعي
لا تحرك شفت في القاع مشلاعه ،،، والتواير تظهر الما من القاعي
ينعش القلب الحزين ابتهملاعه ،،، لامشا قام يتهملع تهملاعي
لا وطى الارض العتش كن تهزاعه ،،، بنت شيخٍ طامحٍ من ولد راعي
في رجا الغايب تحرا لمرجاعه ،،، تنقد العشاق وتطق الاصباعي
نفسها من جملة الناس منصاعه ،،، ماتبي الا واحدٍ ذكره ايشاعي
ينحر اللي ياخذ الطيب بذراعه ،،، الصديق الصافي الصامل الواعي
الوفا والطيب ساسه ومنباعه ،،، يوم بعض الطيب تقليد وصناعي
لا وصلتوا فأخبروني عن اوضاعه ،،، واخبروا راعي السمارا عن اوضاعي
انشدو ويش السبايب بمهزاعه ،،، لاعلي ناقص ولا أبيه فزاعي
ودّنا نرضيه ونحاول اقناعه ،،، كان بن مهمل بعد يسمع الداعي
كان يبغا حق للحق قطّاعه ،،، نقنعه والحق ماعنه مجزاعي
وكان مبغضٍ في الرياجيل بتّاعه ،،، لايجي ناقد ويلحقني ارياعي
لصديق نخلي النفس خضاعه ،،، مانوريه الجفا والتمطّاعي
الصداقه عندنا ذخر وطماعه ،،، صحبةٍ ماهيب صحبه تمتاعي
حد جدتها على البرق لمّاعه ،،، وان خذت يومين مفعولها ضاعي
فإن تليمنا على العز والطاعه ،،، وان تفرقنا فجوج الله اوساعي
ماأطرد المقفي ليا صفط شراعه ،،، مخبل اللي للمقفين تبّاعي
من يحط اذنه على كل سماعه ،،، جاه فرقاً مابعدها تجمّاعي
والزباد اختام هرجي ومطلاعه ،،، يدفعه من ريحة المسك ذعذاعي