البارحه يوم الاوادم خواشيع
في نومها وانا على الكوع واعي
هم (ن) يمزع سترة القلب تمزيع
تقول ينهش ثومة القلب افاعي
خذت القلم من بين روس الاصابيع
وحبيت اميز سيرتي وانطباعي
عزلت من صدقان عطلة الاسابيع
وعزلت من ضحك الوجيه الصناعي
وعزلت من بنين بامالي مشاريع
جميد برد ولونس الشمس ماعي
وعزلت من زرع الخلي البلاقيع
وعزلت من رفع الثني والرباعي
من نفعة اللي ماطلبني منافيع
جميلة(ن) في غير اهلها ضياعي
فاسواقها ماعاد لشري ولابيع
لخطيت من رفقة طويل الذراعي
اللي على الرفقه يسوقه دوافيع
هذاك تشرى رفقته ماتباعي
اما يشجعني على الطيب تشجيع
والايعلمني حميد المساعي
والا ليامنه رمعني رواميع
وضاقت علي كل الفجوج الوساعي
جيته ويسرلي عسير المواضيع
وخلا خفايا خاطري له وساعي
صداقته ماهي معرفة طماميع
ماتنتج الاالغطرسه والضياعي