تعال نورنا و فوكك من اللي بيقول لك لء
سلام عليكم و رحمة الله و بركاته
و عودة لأخي الفارس الحائر بين نعم و لا ما زلت أقول له بمليء الفم أهلا بك و مرحبا أينما و وقتما بل و كلكما شئت
أعجبني كثيرا كلام الود طبعي حيث الموضوعية في الطرح و كلام عماد الدال على إدراك و مودة ليست غريبة على إخواننا ..
من لم تعجبه مصر فهذا رأيه و من حقنا نعرف الأسباب لأننا دائما نحتاج لنرقى بأنفسنا و مجتمعنا و من ثم بلـ(ا)دنا كلٌ في مكانه بدوره،
بالنسبة لتعيق (بن عادي) غثاء في كل مكان؛ فأخي الكريم لا ننكر أن بكل مجتمع الطيب و الخبيث لأننا بشر و ليست بمصر فقط و من أراد أن يرى الشيء الجميل لوجده، ربما تحتاج زيارة أخرى ترى فيها البلد بعين أخرى ترى فيها الطيبة و البساطة و خفة الظل و ليس فقط الغثاء!
أما الأخ طير فلا ننكر طبعا أن القاهرة ترتيبها 2 على مستوى العالم من حيث التلوث و تعمل الحكومة على حل هذة الأزمة و لكن كيف لها ذلك و تعداد القاهرة وحدها 23 مليون نسمة و بها أكثر من 2 و نص مليون سيارة!! هذا عن السحابة السوداء أما المطاعم فهناك العديد من المطاعم مش بس سلسلة المطاعم العالمية اللي تلاقيها نظيفة هناك مطاعم شعبية كثيرة نظيفة و اللي يدور يلاقي.
شرم الشيخ و الغردقة معروف أنها من أجمل المدن المصرية و يقصدها الناس من كل أنحاء العالم و ما ذكرت عنها فهو موجود بالفعل و لكن هناك أيضا أماكن جميلة هناك بعيدا عن تلك الشواطيء فيه شواطيء تانية روحوها و اللي عايز يسأل. يا أخي الناس اللي مش ملتزمة موجوده في مناطق كثير و من أراد غض البصر غضه و معلوماتي أن الكثير منكم (أقصد بني العروبة) يأتينا في بريطانيا أو حتى أوروبا عامة و أمريكا للتنزه، بتعملوا إيه هناك؟
صدقني تحتاجوا العودة و النظر بشكل آخر و من لم يذهب و حكم على البلد و أهلها من خلال الإعلام للأسف أخطأ كثيرا!
و برضو دي آراءكم و علينا أن نحترمها و لا نجعلها تفسد لأخوتنا قضية
أرجع لك تاني يا حامد، و يا ليت لو كنت قلت لنا عايز تقعد أد إيه في مصر بس سأفترض أنك ستمكث في مصر مدة 10 الى 15 يوما و سأخبرك ببعض الأماكن التي يمكنك زيارتها و ستستمتع بها كثيرا إن شاء الله و زي ما الود طبعي قال لك (فيه منك مليون) و أنصحك لو تستطيع تنظيم رحلاتك من خلال شركة متخصصة في السياحة الداخلية و لو عايز والله أسأل لك أولاد عمومتي يقدروا يساعدوك فهم أدرى مني بأمور السياحة، بسم الله نبدأ
القاهرة الكبرى و تشمل محافظتي القاهرة و الجيزة و جزء من محافظة القليوبية
طبعا المنطقة دي مليانه حاجات كثيرة جدا ممكن تعملها و سأعدد لك حاجات منها و لا تتردد في سؤالي
1- منطقة الأهرامات بالجيزة: دي تحتاج يوم كامل من 9ص تكونوا هناك و الرحلة دي ممكن تبقا منسبة كمان للعائلة و تبدأها بزياره الثلاث أهرامات و حارسها أبو الهول و خلالها ممكن تدخل الهرم الأكبر من الداخل لترى مقبرة الملك خوفو و يمكنك مشاهدة عرض الصوت و الضوء في المساء و يحكي بعض من التاريخ، يمكن أيضا أن تزور منطقة سقارة و بها هرم سقارة المدرج و هو معلم جميل جدا هناك و في الطريق لسقارة هناك العديد من المطاعم و المحلات اللي ممكن تأكلوا فيها و لو لم تذهبوا لسقارة فشارع الهرم مليء المطاعم بغض النظر عن الملاهي الليلية طبعا (أظنك مش عايز تروحها  ). خلال زيارتك للأهرامات ممكن تركبوا الجمال (أكيد أنت شبعان منهم بس برضو أديك فكرة) و طبعا أسعارها غالية أتذكر إني دفعت 250 أو 300 جنية (هات الجمل معاك أرخص)
2- المتحف المصري (نسميه الأنتيك خانة): و يقع في وسط القاهرة في ميدان التحرير و دخوله بتذاكر (مش عارفه أسعارها ايه) و فيه طبعا الآثار المصرية القديمة من الحضارة الفرعونية و هناك كمان ممكن يكون معاك مرشد من جمعية أصدقاء المتحف المصري و المرشدين دول بيتطوعوا و بيعطوك جولة في المتحف مع الشرح الوافي بدون مقابل
ما زلنا في وسط البلد و هي المنطقة الأكبر للتسوق لو عايزين تشتروا حاجات فشارعي قصر النيل و سليمان باشا (طلعت حرب حاليا) مليئة بالمحال التجارية
3- الرحلات النيلية: أعتقد يمكنك حجز إحدى هذة الرحلات النيلية و مدتها ساعتين بإحدى البواخر التي تلف بالنيل و يمكنك على متنها تناول العشاء أو الغداء (حسب برنامج المركب) و تترواح التذاكر من حوالي 120 ألى 300 جنية للفرد - حسب المركب اللي هاتختارها. كمان في مراكب على النيل راسيه يعني مش متحركة و أشهرها النيل سيتي و تضم مجموعة كبيرة من المطاعم و أسعارها مناسبة و الحقيقة أنا باحب اقعد فيها جدا و استمتع بالنيل و جمال نسيمه العليل كل ما روحت زيارة لـ مصر
ما زلت معاك و قاهرة المعز و تعال نشوف القاهرة الإسلامية (القاهرة القديمة - الفسطاط)
4- قلعة محمد علي باشا (معروقة بقلعة صلاح الدين) و تضم مسجد محمد على من أجمل المساجد التي زرتها و بها أيضا متاحف حربية و تاريخية و بها المزولة الشمسية تفتح من 9ص و تغلق أبوابها في الخامسة.
بعد القلعة يمكنك زيارة
5- حديقة الأزهر و هي من أجمل الحدائق المصرية الجديدة و دخولها بـ 5 جنية و بها العديد من النباتات الجميلة و كمان بتطل على بعض ملامح من مصر الفاطمية و بها عدة كافيهات و مطاعم - استمتعت بزيارتها لما روحت مصر آخر مرة من سنة تقريبا
6- مصر اللي محدش يعرفها فيها مناطق أثرية كثيرة في منطقة مصر القديمة زي منطقة باب الشعرية و باب الخلق و بها دار الكتب المصرية و بيوت أثرية كثيرة أشهرها بيت السحيمي و مدرسة السلطان برقوق و كمان يا سيدي متنساش عندك الجامع الأزهر و سيدنا الحسين و بجوارهما منطقة خان الخليلي و قهوة الفيشاوي أبرز و أقدم معالم المنطقة و شارع المعز به العديد من المحلات التي تبيع الآلات الموسيقية أو الأنتيكات للتذكارات و غيرها و لو معاك واحد مدقدق في المنطقة دي ممكن تروح مركز التجارة في مصر منطقة تحت الربع و حارة اليهود >> تعرفهم يا عماد 
ما زلت معاك في القاهرة يا سيدي و كدة تقريبا محتاجين 3 أيام لا أنسى كمان
7- مسجد عمرو بن العاص في أول مصر القديمة و بعده منطقة السبع كنائس و الكنيسة المعلقة و الحصن الروماني و المتحف القبطي. كل هؤلاء في نفس الشارع يا حامد جامع عمرو على اول الشارع و الكنيسة و الحصن و المتحف في آخر الشارع 10 جقايق الى 15 دقيقة مشي بينهم و هاقول لك كمان مترو الأنفاق الجديد محطة ماري جرجس بتنزل داخل منطقة الكنائس و كلها كنائس أثرية تعود للقرن الـ 18 الميلادي و قبله و هاقول لك على سر و انت داخل على اول الشارع بتاع جامع عمرو عندك على ايدك اليمين محل صغير اسمه الشافعي - دا أحلى عصير قصب في المحروسة و الكباية بـ نص جنية (اعزم عماد على واحدة) و اشرب لي واحدة 
باحاول افتكر تاني يا حامد ممكن تروح فين مش عارفه ...
اقول لك في متحف ام كلثوم في المنيل و متحف محمد على و قصر المانسترلي برضو في المنيل و كمان يا سيدي عندك المتحف الزراعي و فيه متحف الشمع و في الزمالك عندك حديقة الأسماك و في الجيزة حديقة الحيوان و في الجزيرة برج القاهرة و حديقة الزهرية من أجمل المعالم السياحية هناك و ممكن تاخد لفة بالحنطور كمان و تتحنطر هههههههه و عندك طبعا في منطقة مصر القديمة برضو مقابر الأسرة المالكة و سيبك من أنها مقابر إلا أنها تحفة معمارية و في منطقة اسمها الأربعين ولي (معرفش إن كان في حد في مصر تاني يعرفها غير والدي ههههه) و طبعا مساجد السيدة نفيسة و السيدة زينب و مسجد على زين العابدين و السلطان حسن و السلطان الغوري و العديد و العديد كل دا يا سيدي الكريم في قاهرة المعز
أيضا هناك مدينة الإنتاج الإعلامي بمحافظة 6 أكتوبر و تبعد عن القاهرة نص ساعه بالسيارة
طبعا تضم القاهرة العديد من دور السينما و المسارح إضافة إلى دار الأوبرا المصرية التي تقدم حفلات موسيقية جميلة جدا و بعضها للموسيقى العربية.
محافظة حلوان: يوم واحد
الحديقة الصينية (جميلة جدا) - متحف الشمع - العيون الكبريتية
محافظة الأسكندرية و ممكن تقضي فيها 2 يوم تشاهد خلالها
اليوم الاول: قلعة قايتباي و مكتبة الأسكندرية و طبعا تتمشى على الكورنيش و تشوف كوبري ستانلي اللي يشبه كوبري تاور أوف لندن
اليوم التاني :تآخد العربية و تطلع على طريق مرسى مطروح تزور منطقة حقل الألغام القابع هناك من ايام الحرب العالمية التانية و مقابر الجنود الإيطاليين و اعتقد الحلفاء و تستكمل المسيرة على منطة سيدي عبد الرحمن ثم محافظة مطروح و تزور منطقة عجيبة و أشهر شواطئها شاطيء الغرام و المسمى بعد الفيلم و به صخرة ليلى مراد لو حبيت تعمل الرحلة دي يبقا تتحرك من الأسكندرية 7ص
دا كده تقريبا انتهى اسبوع
الأسبوع التاني ممكن فيه تروح
ساحل البحر الأحمر و سيناء فتزور كل من شرم الشيخ و الغردقة. راس محمد، دهب، نويبع و كمان إيلات (على ما اعتقد ما زالت الرحلات لها مستمرة) و طبعا في المناطق دي ممكن تمارس رساضة الغطس أو تأخد رحلة بحرية في المكرب الزجاجي لتشاهد عجائب خلق الله فيما تحت الماء
لو مش عايز تروح ساحل البحر الأحمر
ممكن تنظم رحلة إلى البر الغربي لمصر و تروح منطقة الواحات بيقولوا جميلة جدا جدا
لو مش عايز تروح دي كمان
يبقا خد الطيارة و اطلع على مصر العليا حيث الحضارة الفرعونية و زور اسوان و خد المركب من اسوان و روح الأقصر و بلاد النوبةدي كل الحاجات اللي أقدر أقول لك عليها تروحها في مصر و تناسب كل الناس و تستمتع فيها العائلات كمان
طبعا يا حامد لازم تعرف حاجة مهمة إن الأسعار في مصر بقت غالية جدا حتى علينا إحنا أهل البلد و المناطق السياحية كمان علينا و على السائحين بتكون أغلى شوية و دا شيء مفروغ منه و هنا أحاول انصحك (انت و انا و غيرنا) فاصل شوية في السعر مع التاجر بدون ما تبخس حقه و كن مبتسم و لا تتعصب في الكلام المصريين دمهم حامي و ميحبوش اللي يتخانق معاهم و يتفرعن عليهم (أكيد مش انت بس دا في العام)
طبعا ممكن تأجر عربية و تقودها انت و لكن لو بتقلق من الزحمة و مش بتعرف تلعب فيديو جيم يبقا هات لك سائق مع السيارة اللي هاتستأجرها. ممكن كمان في المشاوير الطويلة تآخد تاكسي العاصمة مريح جدا و سعره معقول خاصة في المشاوير الطويلة
عند وصولك بالسلامة مطار القاهرة الدولي ممكن تكون من قبلها حاجز تاكسي المطار و دي خدمة جديدة و بيأخدك التاكسي دا بأمتعتك للمكان اللي انت بتحدده و حسب مكان الأوتيل بتاعك بتكون الأجرة تبدأ بـ 50 جنية في منطقة مصر الجديدة و مدينة نصر و انا باركبه بـ 80 للمهندسين
أعتذر عن اني طولت عليك و لكني أحببت أعطيك فكرة عن الحاجات اللي ممكن تعملها في مصر و زي ما قلت لك خطط رحلتك و والله لو عايز اي حاجة احنا اخواتك هناك بس انت تأمر
منتظرينك تنورنا
احترامي لك و للجميع
ملك
ملحوظة
فارس، كلام سحاب عين العقل - اعقلها و توكل
لي صديق فرنسي يقول (أحب زيارة مصر مرة كل عام و قضاء فترة بالقاهرة لأنها مدينة ساحرة و مجنونة أهلها لا يناموا و محلاتها لا تغلق أبوابها)
| التوقيع |
|
بَيْنَ النُجُومِ أَتَلَألَأ مَلَك |
آخر تعديل ملك يوم 10-04-2010 في 06:42 PM.
|