يا عاذلي لا جيت بشـاورك عـي
واجاوبـك قـوة نظـر وابتسامـه
*
لو في يديك سيوف ورماح وعصي
هنيت نفسي مـن طرفـك السلامـه
*
الليل هوهوه والايـام هـي هـي
ولا التهـم عضـة بهـوم الندامـه
*
الا ليـا قدمـت هـذي قبـل ذي
على المسلم و انصفح مـن سلامـه
*
حفاوة الطيب علـى راحـة ايـدي
ولا كل جـودات ٍ بعينـي كرامـه
*
يشح في عيني كرم حاتـم الطـي
مع كـرم منـي رهيـن احترامـه
*
الصاحب اللي خاطـره وارد ٍ لـي
اعرف كنينه قبـل ينطـق كلامـه
*
قله كثر والكثر من غيـره شـوي
وهوزه ظفر وهواش غيره رخامـه
*
اللي يحس بخاطره مثل مـا فـي
دايـم امامـي وانـا دايـم امامـه
*
الواجب انه ما يخفـي علـى شـي
حفظ ٍ علي مـن القلـق والوهامـه
*
ان ما وفيت برفقتـه حدنـي حـي
مانيـب شافـع لـه نهـار القيامـه