جتكم وصوف المسرجات السريعات
يالله عسا مااقول بالوصـف زلّـه



اللون وجه اللي غدا شمله اشتـات
وإلاّ كما بـنّ اليمـن وسـط دلّـه



والراس حجمه معتـدل بالقياسـات
لاهـو صغيـر ولا كبيـر ٍ تملّـه



وآذانها ارقاقـه وملسـاً ٍلطيفـات
اقـلام منتصبـات مثـل الاخـلّـه



واعيونهـا برّّاقـه ومستطـيـلات
عين الفتـاه اللـي لحقهـا مملّـه



والناصيه فوق العيـون الكحيـلات
مثل السعف ومن الحـراره تضّلـه



والجبهه تشابـه ليـوم البشـارات
تـزفّ للمحـزون فرقـا المـذلّـه



ومناخـره متباعـدات ووسيعـات
وامـدوّرات وللنفَـس سهّّـل ٍ لـه



والفم واشدوقه وسـاع وطويـلات
تحت اللجام شدوقـه ايمهـل ٍ لـه



واعناقها ماهن عراض وقصيـرات
طويلـة ٍ والكتـف مالصّقـن ٍ لـه



والعرف مسترسل كما شعور خفرات
والجذع صلب ومشرف ٍ غاربٍ لـه



واصدورها متنهّضـات ورحيبـات
والظهر فوق الكاهل مناسـبٍ لـه



والبطن كنز اهل الخيول الاصيـلات
رحيـب بالأنثـى وضامـر بخلّـه



واقطيّهـا متشبّعـات وعريضـات
صلبـة قوايـم مابهـا كـلّ علّـه



والذيل شعر الفاتنـات الجميـلات
اللي لهن بالقلـب عهـد وسجلّـه



هذي وصوف الخيل ياهل البطولات
ويالله عسا بالوصف مافيـه زلّـه