السلام عليكم ورحمة الله وبركاته
مساكم الله بالخير أعضاء وزوار
هذه ابيات غزليه بقصد التواصل معكم عساء ان تحوز على رضاكم
القلب من حب ليلى كثـرة حروقـه
عاشق وليلى على ماظـن عشاقـه
ماسيـرت فالعقيـق وواد معشوقـه
الخصر والردف جلى شان خلاقـه
والعين عين أشقراً مافكـت أسبوقـه
راعيه نفسه على المقنـاص تواقـه
والخد نوراً كشح والثـوب ياظوقـه
على صغير النهـد مزيـن تطراقـه
غطت على الغيد رغم الزين وأفروقه
متوسطاً طولهـا ماهيـب عملاقـه
من شافها يختلف شكلـه ومنطوقـه
وتكثر هواجيس قلبه مـن تصلفاقـه
عمهوجةً عاقلـه ماهيـب مطفوقـه
ماهيب تاقف على البيبان والطاقـه
علم وجمال وذكى ماهيب مصفوقـه
متسلحه بـالادب وعلومهـا أرقاقـه
ولاهيب في السوق متبوعه وملحوقه
ولالدت بعينها فـي قاطـع الساقـه
المبسم ابيض حمر والعنـق منتوقـه
لو شافها مطوع بريده ثنـى ساقـه
الشعرفيها يشـوق القلـب طاروقـه
والشعر ما أجمل اليا قفـت تفراقـه
غروٍ كساه الجمال وزانـت أوفوقـه
والعهد مـن سابـق الايـام ماباقـه
من خف دمه يشاف الـدم بعروقـه
حسن الجمال الطبيعي حسن أخلاقـه
أخوكم/ مهل الرياحي
|