قال إنفعلت , وقلت روق وهـدّي
لاتأخذ الموضـوع مأخـذ جِـدي
إعرض عن الجاهل وخلك عاقـل
فوّت كثير مـن الكـلام وعـدي
أنـا مجـرب خطـةٍ مـدروسـه
إليـا بليـت بجاهـلٍ متـحـدي
أقول يابـن النـاس مانـي قـدك
وانا ادري إنه صدق ماهـو قـدي
لكني ابعـد عـن جـدال الجاهـل
يغثـنـي وإلا يبـيّـح ســدي
وإلا بدر مني طـوارف هرجـه
يسمع بها العاقل وتحسب ضـدي
وانا مع العاقل رصيـدي عالـي
اللـي ليامديـت قــدّر مــدي
ماودي أخسر من رصيدي عنـده
لو إن ضَـد الخصـم غايـة ودي
لكنـي اسمـع هرجتـه وازهلهـا
وانا علـى دعـواه جاهـز ردي
خلـه يعـوّد مقتنـع بافـكـاره
واللي يجيب من الـدروب يـودي
وإليا زهمني قلت مانـي فاضـي
أمــر وارد الـسـلام مـعـدي
بعض المجالس ماتناسـب مثلـي
أفضل من إقبالي عليهـا صـدي
والله عن اصحاب الردى مغنينـي
اجوع وآكـل لقمتـي مـن كـدي
الله يرحـم شـايـبٍ وصـانـي
ويقول هذي مـن وصايـا جـدي
من سار في درب الكرامه يكـرم
ومن سار في درب الردى متردي
وصيـة الشايـب وانـا حافظهـا
من قبل مايبدي الشعر فـي خـدي
واليوم أخذت من التجارب قسمـي
واعرف حدود الناس واعرف حدي