::{ مجالس قبيلة هذيل }:: موقع يهتم بتراث القبيلة ومفاخرها - عرض مشاركة واحدة

12-16-2010, 06:42 PM

لطميات

:

يتيمة الحسين
ذكرى وفاة السيدة رقية عليها السلام - بني جمرة

~~~~~

نعي - يا طفلة يا شهيدة

يا طفلة يا شهيدة شلون أندك وأوصف اللي صار
صغيرة ويا قصر السنين تشوف وتحمل الأكدار
تشوف أخوتها متعفرة جديلة والدماء أنهار
تشوف حسين وعظامه عليها داست الأشرار

صغيرة وأتحمل الأحزان من الطف وبلاويها
يتيمة وتمشي في الصحراء ولا كافل يحاميها
أبوها انذبح في الطف ولا ظل من يراعيها
لأراضي الشام تترحل مع الأسرى ببواجيها

يا شيعي شلون تتصبر إذا تسمعها وتصدها
تسايل عن أبوها حسين زمان وما حضر عندها
اجوها براسه وشافت مناها ولطمت خدها
وشهقت بالأسى وماتت من الحسرة على والدها

~~~~~~

أربع سنين بعمرها .. لكن تأمل قبرها
طفلة وعندها الزوار .. تتوافد ليل نهار

علم ونار ونور شوصف لك معناها
على يسراها الجود والفضل بيمناها
صعد بها التاريخ والمجد تغناها
يا رقية الصارت كعبة ونتعناها
بركات العالم لو يوصل أدناها
ترى كل الدنيا مرقدها تمناها
يا شهيدة وظلت آية ورتلناها
ويتيمة بالروح والقلب ألحدناها

ما يخيب اللي يمرها .. دمعة عيونه يدرها
هاي المنها الأنوار .. تتوافد ليل نهار

أربع سنين بعمرها .. لكن تأمل قبرها
طفلة وعندها الزوار .. تتوافد ليل نهار

وإذا وصلت الشام وضلوعك مشتعلة
لظى شوق وحسرات بجروحك متصلة
على ذيج الأعتاب حول همك حوله
نهر دموع اجري واذكر هاي الطفلة
ولا تنسى اللي صار عرج وهلة بوهلة
بجت ونادت بويه اللي عني تخلى
ولساعة لنها تلقى الراس منذهلة
أسف شهالموقف ما يتكرر مثله

حارت الناس بأمرها .. ميتة لو تكتم صبرها
وظلت عنها الأخبار .. تتوافد ليل نهار

أربع سنين بعمرها .. لكن تأمل قبرها
طفلة وعندها الزوار .. تتوافد ليل نهار

عجب وسايل وين قبر يزيد وابن زياد
ولا منهم آثار غير اللعنة وتزداد
على كل طاغي بسوط ورم ذيج الأجساد
على كل ظالم راد واسأل وين اللي راد
ورقية الحرة ظلت رمز الأمجاد
صحن ونفحاته --- كل الأبعاد
بقت سنين ولا غابت عنها الوفاد
بقى ضيم المحنة عايش فينا وعاد

الله أيدها ونصرها .. والدهر أصبح دهرها
شيعة ومثل الأطيار .. تتوافد ليل نهار

أربع سنين بعمرها .. لكن تأمل قبرها
طفلة وعندها الزوار .. تتوافد ليل نهار

~~~~~~

من ليه بعدك .. يالوافي وعدك
ما أقدر يبويه .. لحظة على بعدك

من همي وضيعة عمري خذني يبويه

هايمة الليل .. طايرة عند الأب من ظلمة الشام
جنها وردة .. هبت عليها رياح جروح وآلام
مسافرة هناك .. مرفرفة للعالم الأعلى بالأحلام
في قلبها جرح .. ما ظنتي بعد في ساعة يلتام

جنها جاها حسين وخلاها في حجره
مسح راس الفاقده ودموعه أجرى
قلها يا بنيتي العلي يعظم لج أجره
ناري لعيونج لهب يتنامى وجره

جنه قرب يالعزيزة الملتقى وياج
فت مسامع قلبي ونج الله يرعاج
والجسد يضطرب بالغبرة من بجاج
يالقضيت أيامي في حبج وفي رباج

جنها حست .. بالفقد وفزعت من النومة تنحب
وينه بويه .. تصرخ بحسرتها يا عمة يا زينب
من بلياه .. عيشي في هذي الدنيا لحظة يصعب
وانتي كل يوم .. تقولي ليه في سفر والصبر يتعب

اني ماليه صبر يا والدي عليك
والله مشتاقة بدموعي أروي خديك
يالمطول غيبتك وينك وأناجيك
والله مشتاقة عدد ماي البحر ليك

واعدني ياللي ما تخلف بوعدك
انك تجي ليه تآخذني من أعداك
وجنه حيني حان وانت بويه بعدك
وأدري حاشاك الخلف بالعهد حاشاك

................

وعلت ضجات النساء وتصايحنا بيك .. آه يا مذبوح
وسمع ذاك الطاغية نوح اليتامى .. غربة النوح

فزع بعرش وثار بعروقه شيطانه
بغضب علا الصوت شاللي يدور هنانه
إله قالوا طفلة إلى أبوها ولهانة
وعليه تطول نحبتها وجعانه

يا عساكر يا حراس ليه الساعة جيبوها
فزعت ليها الطفلة راس حسين راووها

................

لببوها .. واسحبوها .. للدعي بالأقياد
والدمع في .. خدها يجري .. والقلب وقاد
وليها جابوا .. راس أبوها .. مسترينه عاد
وهي تبجي .. أرد ابويه .. ما أريدن زاد

وينه ابويه .. اني غريبة .. لشوفته روحي لهوفة
ما أريد اني .. زاد ومشرب .. ما اريد إلا أشوفه

شالوا الرداء .. عنه العدى .. وإلا راس حسين يلوح
بحسرة ضمته .. بحسرة شمته .. وأعولت يا روح الروح

................

آه يبويه وينه جسمك يا منحور
شاللي شاله من وريدك المبرور

ويلي واويلاه .. من هبر أوداجك .. جابك ليه بس راس
من يتم قلبي .. من شوه جمالك .. منهو شوه الأضراس

من إليه من لليتامى وهالنسوان
وينه وعدك يالماتخلف يا عطشان

وعدك تآخذني .. يالله اوفي ليه الساع .. خذني من هم دنياي
أدري يبويه .. من جسمك وأوصالك .. توفي وعدك جاي

................

واحزني وفجعة قلبي بك يا حسين
ليت يبويه قبل ما أشوفك مالي عين
يا عزي ويا ضي عمري وفي الدين
شوفي أحوالي وخذني عندك للطيبين

من ليه بعدك .. يالوافي وعدك
ما أقدر يبويه .. لحظة على بعدك

من همي وضيعة عمري خذني يبويه

طفلة حسين .. على راسه تنتحب والدمع سجاب
صد لي يا زين .. اشتعل صدري يتم يا والدي وشاب
فتح العين .. ورد على الطفلة اليتيمة الحايرة جواب
قلبي شطرين .. وروحي وردة مفتحة عالحزن يا ياب

جنت أرجي أقضي أحلى سنيني وياك
تحت ظلك أربى وأكبر وأمشي بحذاك
مثل باقي الناس أعيش وأهنى بحماك
شاللي بأيامي اللي أقضيها بلياك

بويه شق ليه اللحد يمك أواسيك
ليت بيه يالأب هالعلة البيك
لو هو راسك ينفدي يالغالي أفديك
لو مريض انت أفت قلبي وأداويك

صد لي يا راس .. خلني أمسح دمك الجامد بعينك
ما بك أنفاس .. ياللي كتاب الله أنوار بجبينك
وينه جسمك .. نايم بحر الثرى يا راس ووينك
شنهي هالناس .. شنهي هالجرمة الذي اقترفت يمينك

أنظرك وسط الطشت ودموعي أنهار
ركني من شوفت جبينك يالولي انهار
أسألك يالماترد سائل وتنهار
لا تخلي ليلة في عمري ولا نهار

تركي النومة اليه لحظة يا جفون
والله ماني معودة أحبابي يجفون
اخذوا من دمعه وشرايين المايجفون
تحفة للي يروحوا طيبة والينجفون

................

يا قمر وسيوف العدى خسفوا جماله .. رد عليه
يا ذرانا اللي ما حصل شخصه ومثاله .. يا شفيه

على ويش يفصلون الشمس النوارة
على ويش يفجعون حريمه وصغاره
يا حبيبي ظليت من بعدك محتارة
وعليك افادي ما يسكن من ناره

مهلت ليه ساعة من قالوا الوالي راح
وما حظيت من وداعه ولا ضمني من الراح

................

شلون أسافر .. بويه بعدك .. شلون أرد البيت
واني والله .. عيشة دونك .. لحظة ما حبيت
ويا دمعي .. من مصابك .. هالقلب صبيت
ياللي في ظله .. في دلاله .. عمري تربيت

آه يبويه .. طفلة صغيرة .. جانت عليك تتدلل
وردة والله .. خذها بصباها .. هالمناظر ما تتحمل

أدري بالسبا .. محنة متعبة .. تفطر القلب الصبار
لكن أنظرك .. بويه بالطشت .. هذا في فكري ما دار

................

يتمتني واني طفلة ألجي وين
وراسك الغالي أنظره مالي عين

بالله جاوبني .. وانظر ليه بعينك .. وارحمني من هالناس
حاجيني وقلي انك .. منته بويه .. راسك مو هذا الراس

قلي بالله انت منته وإنك غير
خلني أؤمل انه بويه راسه بخير

ما أتحمل كونك .. بويه اللي أعرفه .. ما مر مني على البال
يوم أنظر راسك .. في حجري وأوصالك .. مرمية فوق رمال

................

ليش تتركني والله بعدك راسي شاب
ليش تفردني وعمري بعدك لا ما طاب
وينه أهنى وين ارحم بالله قلبي ذاب
آه يبويه روحي لأجلك مدمع صاب

من ليه بعدك .. يالوافي وعدك
ما أقدر يبويه .. لحظة على بعدك

من همي وضيعة عمري خذني يبويه

الطفولة .. كربلاء تدري شسوت بالطفولة
والبرائة .. بالفتوة والصبا رسمت بطولة
جم صغيرة .. خلت دموع السماء تجري همولة
وجم يتيمة .. جنها فتحة جرح في قلب البتوله

من ألمها شيدت أروع حضاراة
كل أرض تلقى لها قبة أو منارة
وأضرحة تتفاوت وجدان وطهارة
والملايك زمر تقصدها بزيارة

طفلة المظلوم ما جالك خبرها
تؤسر المأسورة القيود بأسرها
وهذي الدنيا توافيك بعبرها
وين قبر الطاغية وينه قبرها

شلون طفلة .. الدمعة سبحة صفا والجبهة محراب
شلون وردة .. فتحت للجنة من ريحتها أبواب
شلون دمعة .. ما يوفي حق شرحها مية كتاب
شلون ونة .. صدعت شكل القمر وسط السماء صواب

يالتسايل عن رقية احضر وشوف
ليها مشهد حوله أملاك السماء تطوف
بالسماء قبل الأرض بأنواره معروف
حوله قلوب البشر تتماوج ألوف

مشهد تناطح مناراته السحايب
هذا نورك يا علي بن أبي طالب
لو عليك الدنيا مصبوبة مصايب
انت يا حيدر علي منبع عجايب

................

يا مشاهد يا أضرحة تتشعع أنوار .. في سماها
كتب الله ليها الشرف والشيعة زوار .. حق ثراها

علي عالي على الكون شوف شلون آثاره
علي نور الأنوار بكل الأديار قماره
علي نهضة إيمان في الأزمان دواره
علي ثورة إحساس بين الناس جبارة

علي يا فخر الدنيا وعزة فوق العادة
يا فخر يمتد بالكون كل الأحرار أولاده

................

من رقية .. لكل فتية .. خذ طهارة روح
خذها بلسم .. لكل جريحة .. كل قلب مجروح
خذها نسمة .. بالكرامة .. والفضيلة تفوح
خذها أصغر .. نجمة ضوت .. في العرش واللوح

خذها دمعة .. ألم شجية .. طول النحبة عليها
واذكر اللي .. جرى بقلبها .. بالله وتصور سبيها

واقصد النجف .. نادي يا علي .. بيها يا حيدر مأجور
شافت الأب .. راسه منفصل .. وانخسف نور على النور

................

بويه وينك عدلت لك المصلى
ما عهدت عن صلاتك تتخلى

وينك يالغالي .. لك سويت مصلاك .. عالجاري العادة
وينك والمحراب .. بس تربة وسبحة .. من له هالسجادة

جنه أذن يا ابويه وانت وين
ما أقدر أنظر للمصلى بغير حسين

يا شمعة حيدر .. مو عادة تتأخر .. عني يبو السجاد
حزني ظل يكبر .. ما أقدر أصبر أكثر .. والله ماليه افاد

................

قوم يالغالي وانظر بنتك في شر حال
من للطفلة لما تكبر يا رحال
دوم أترجى ترجع ليه ويهنى الحال
ما مر والله منك أتيتم يالآمال

من ليه بعدك .. يالوافي وعدك
ما أقدر يبويه .. لحظة على بعدك

من همي وضيعة عمري خذني يبويه