ياهاجسي لك ليالي تحلـم أحـلام المجانيـن
الحلم يبـدا بلـو وينتهـي مـن دون معنـى
كم قلت لك ( لو)هذي تفتح أعمـال الشياطيـن
وانته وانـا مـن سببهـا كلمـا تبنـا رجعنـا
وتقول لو كنت ريس كيف تكسب لك مواليـن
واقول لو كنت ريس كان انا ونـت إخترعنـا
..
لو كنت ريس على البيبان غيـرت الكواليـن
ما يستلم نسخـة المفتـاح غيـر اللـي تبعنـا
ونقـول للعالـم الفاضيـن ماحنـا بفاضيـن
اللي يدور على الفاضيـن مالـه حـظ معنـا
حنا رسمنـا طريـقٍ يطلـع القمـة وماشيـن
وإن كان طعنـا كـلام النـاس والله ماطلعنـا
إن كان طعنا كلام الناس صرنـا بيـن ثنتيـن
أمـا تركنـا المشـي وإلا تبعناهـم وضعنـا
ثنتين , طرد السراب وتبعة النـاس المقفيـن
كم قالوا الناس فيهـا مـن كـلام ولا إقتنعنـا
لين إتعضنا من اللي صـار للربـع القريبيـن
شفنـا وعفنـا وعـن رايٍ تبنـوه إمتنعـنـا
أما يجي راينا من روسنا في العسـر والليـن
وإلا الـردي لامعـه رايٍ سديـد ولانفعـنـا
..
ولو كنت ريس على التجار قفلـت الدكاكيـن
اللي تـورد سلـع لأسواقنـا ماهـي سلعنـا
وانشر خبر في الجرايد بالجديد من القوانيـن
وإن ماكفت في القنـاوات الفضائيـة طلعنـا
ونبلغ اهـل البلـد واللـي بديرتنـا مقيميـن
مافيـه تاجـر يجـي ويقـول والله ماسمعنـا
لاحدٍ يورد يكون السلعة اللي تعجـب العيـن
السلعـه اللـي تنومـس لاشريناهـا وبعـنـا
من شان نبقى على العادات ونحافظ على الدين
والرزق عند الكريـم اللـي لغيـره ماركعنـا
..
ولو كنت ريس على الإعلام وضحت العناوين
وقدمـت للعالـم إعـلامٍ يشـرف مجتمعنـا
وسويت تحقيق مع بعض الصحافة والمذيعيـن
نعرف من اللي ينزل روسنـا واللـي رفعنـا
وناديت بالصوت لأصحاب الضماير والغيورين
واقول ياناس من كثـر الحكـي والله شبعنـا
..
ولو كنت ريس على الشعار وسعت المياديـن
من شان لـو نجتمـع نلقـى مياديـنٍ تسعنـا
وشكلت لجنه من ارباب القصيد اللي مواميـن
لاتقبل الواسطـات ولاحـد يقـول إنخدعنـا
من دون لا يدخل التصويت في قلب الموازين
العنصريـة وحـب المـال ماتخلـف سنعنـا
ننحاز للمعرفة والشعر واهل المنطـق الزيـن
ونصدر بطاقـات للشعـار ونقـول إجتمعنـا
حتى ليامن وضعنا حد بيـن الزيـن والشيـن
راعي البطاقه ليـا غنـى جلسنـا وإستمعنـا
وليا بحثنـا عـن الجـزلات ماحنـا بغاويـن
بالعكس يمكـن نـدل الغـاوي اللـي يتّبعنـا
لكن ياهاجسي هـذي مـن أحـلام المجانيـن
الحلم يبـدا بلـو وينتهـي مـن دون معنـى


الشاعر عبدالله الطلحي