احبها يا ذيب
(( احــــبها ياذيـــــــــــب ))
هيــضتني بـعواك ياذيب ســنجار ... والظــاهـر انا يالسـريحي ولايــف
اللي اصابك صاب قلبي بالاخطار .. قـصـة غــرامً ســـجلـت بالطرايـف
فات العمر بين التفاؤل والاعذار .. واصبحت انا من غيب الايام خايف
احبــها ياذيــب ميـر القــدر بـار .. واقـفت وانا قـفيت مـجبـر وعـــايف
ما لاق لي ياذيب غيره ولا صار .. بالذات أهي من لابســــات الغدايـف
ياما سهرت الليل واخفيت الاسرار .. رغـــم المآسي بالضلوع النحايف
اخشى مقاريد العرب هم والاشرار .. ولاهبت لجل الشوق حجم الكلايف
وياما تخيرت المعاني والاشعار ..... وســطرتها له فوق خــد الصحايف
وياما تحريت السوالف والاخبار .... اشــتاق انا لعلوم زيـن الوصــايف
وياما سريت ودجت بحدوده امرار.. يمكن تشـوف العيـن نابي الـردايف
ذي قصتي والتجربه عبر الادوار ... دســت الخطر والحب جله كسايف
البيض قبلك شلهبــن قلبي ابنار ... ومــن قبلنا فرســــان تنـطح طوايف
واصبحت انا مابين محبط ومحتار ... ويا شينها لاصار مامــن ســعايف
ياذيب انا اللي قد تـهقويت به بار .... اللــي عليه ادمــوع عـيني ذرايف
واخاف انا لاجيت هــــقواي تنهار ... ومـــن عقبها تكثر علي الحسايف
|