رد: تغطية زفاف الشاعر فيصل بن عباد السالمي الهذلي
الشيلات
شيلة من كلمات الشاعر/ رده الطلحي الهذلي
أداء المنشد/ محمد الهوشان
http://www.lamaarstudios.com/Studio/...tal7ee_Mix.mp3
يا سلام الله سلاماً موجه للعموم
ردةً عالي سماها وغالي سومها
ما تليق الا لفيصل وللربع القروم
ماننصيها ضعاف العرب ورخومها
هات يالفكر الشوارد ولا يلحقك لوم
من هواجيساً وفاها يعدي لومها
عند عكفان الشوارب وعطبين السهوم
عزوةً من سال عنها تجيه علومها
تفرش الترحيب للضيف من قبل القدوم
في حلال الاد سالم صدر مرسومها
من هجوس الشاعر اللي تجي وقت اللزوم
ما تخلا عن ربوعه بوقت لزومها
القوافي جات تعزم وانا جيت امعزوم
جيت امثل عزوةً ما تلين اعزومها
عادتي مامدح هلامه ولاجيب معدوم
مامدح الا راعي المرجله زيزومها
حر واصوك راس دايم على العليا يحوم
من حراراً للمهمات تكسر حومها
ذاك فيصل يكرم الضيف ويضد الخصوم
العدا وقت المنازل يدق خشومها
كلمته بين العرب صك ممضي ومختوم
والبحور يفكك اسرارها ويعومها
شاعراً يبني الفرايد ويرسمها رسوم
لوحةً يجتاح الالباب زين رسومها
لا حضِر شامخ شموخه ولا قمة يسوم
يرتقي للمجد والطايلات يرومها
ناسب طوال الشوارب قويين العزوم
لابةً تفخر بتاريخها وسلومها
من ذوي زراق منسب مقدر ومحشوم
مزبن اللي من قهرها تشق هدومها
يا سلام الله سلاماً موجه للعموم
ردةً عالي سماها وغالي سومها
شيلة من كلمات الشاعر/ خالد الدعدي الهذلي
أداء صوت هذيل/ صلاح الدعدي
http://c.top4top.net/m_214npcu1.mp3
اطنخ ياصوت هذيل باجزال النشيد
واختار من عذب اللحون و شلها
من هاجساً يرقى وفي الماقف يزيد
ماهمه ادقاق الحمول وجلها
في حضرة اهل الشعر واركان القصيد
تقلط جزيلات القصيد بحلها
نمدح رجال العز والمجد التليد
ونعمي عيون اهل الردى ونخلها
حشمة رجال الطيب والساس الجويد
اهل البيوت. اللي يظلل ظلها
قومن لها الامجاد تبقى ماتبيد
مناصب العليا لها تحتلها
حماية القاله واهل راين سديد
حتى صعاب المعضلات تحلها
كسابه الامداح في اليوم الشديد
ترهب قلوب اخصامها وتذلها
الاد سالم هم هل الفخر المجيد
ماغيرت سود الليالي دلها
حضرت للمحفل وهقواتي بعيد
أواصل اصحاب الوفاء واصلها
مبروك يافيصل عسى عمرك مديد
يامحرز اسباب المدايح كلها
غالي يافيصل والله الوالي شهيد
خوتك نرفع شانها ونجلها
ترقا معالي العز يالحر الفريد
جزل الفرايد فيك يزهى حلها
والصف واحد لانميل ولانحيد
ماهمنا كثر الخصوم وقلها
هذيل قوم العز والعلم الاكيد
ذروه سنام المجد قد سجل لها
شيلة من كلمات الشاعر/ هشام المعطاني
أداء صوت نجد المنشد/ سعد ال عيد
http://c.top4top.net/m_213ql861.mp3
الشعر حاله من الأدراك واللا شعور
تفرض على معشر الشعار حالاتها
أعلى مراتب بلوغه حشرجه في الصدور
تظهر على الشاعر المبدع علاماتها
في مهمهة عصفه الذهني تقول مخمور
ما عاد يعنيه في العالم ونظراتها
خاضت بي أفكاري البارح بحور وبحور
وقامت طواريقي اتلاعب عباراتها
والموتر اللي نهجته في خطوط المرور
شارف على ساحة الحفلة وصالاتها
داهمني الوقت وأنا بين طورٍ وطور
قريحتي بين أخذ هذي وذي هاتها
أوسم البكر واللي في فلكها تدور
والناس تطرد ورا حنا وأخواتها
أنا دخيل الله من الكبر ومن الغرور
إذا تفرست في الساحه وشيلاتها
يا منظم الحفله أحجز لي ولا هنت دور
في الليله اللي شواعير العرب جاتها
أما نحرت الجمل ولا نحرت الجزور
عندي وكاله على الحيران وأماتها
ومعزب الحفل يترقب وصول الحضور
والأرض وده لهم تقصر مسافاتها
يلد يمي وهو يخفي ورا العين أمور
وأنا أعرف اللي ورا عينه و اشاراتها
يقول رحب تراك اليوم ما أنت معذور
الحفل حفلك وهات اللي تبي هاتها
يا مرحبا باسم من لا يقبلون القصور
بضيوفنا سادة الأرض وبهاواتها
الهيل خالط وريح الزعفران البخور
حفاوة ٍ بالضيوف نقدم إثباتها
في دبرة الشايب اللي في المواقف جسور
أسامي المدح تزهى فيه وصفاتها
عباد عطر النبا مرهق بطون القدور
من زود نطل الذبايح في مغباتها
صافي ووافي وله مبدى وشهم ووقور
من عليت هذيل أكابرها وهامتها
حضوركم نور واللي زود الحفل نور
اللي تروجع له الشعار بأبياتها
فيصل وفيصل عليه له حقوق ونذور
تشهد عليها الأراضين وسمواتها
مناص الأمداح من باقي عيال الظهور
وأنا أعرف أنزل الناس في مقاماتها
له مع سلاطين شعر النظم وقفه ودور
كم شارده سجل اسمه في سجلاتها
حضرت له والكلام اللي ما بين السطور
أبلغ من الغاية اللي في عباراتها
آخر تعديل أبو رديد يوم 09-20-2016 في 01:07 AM.
|