ابو زيد الهلالي وعلياورحيل بني هلال الى تونس

[ماطر السويدي]

واللي وقفنا فيه عند رفض ابو ذياب السماح لذياب بالمشاركه في المعارك مع بني قابس

واللي رفضته ام ذياب واصرت ان ولدها يشارك

نرجع للقصه

وصولوا باقي فرسان بني هلال للمعركه واشتبكوا مع بني قابس وكان من اشجعهم ذياب بن غانم وكان له فعل مشهود لانه كان يقترب من قصر الزناتي ويرهب فرسانه اللي كانوا حارصين قصره لدرجة انهم اذا شافوه كانوا يهربون منه حتى ان المساجين ( يحيى ومرعي ويونس ) يشوفونه ولا يعرفونه لانه ما هو من فرسانهم المعروفين وفعله فعل فارس وكانوا يسالون سعدى الصفيرى عنه وهي ما تعرفه قالوا لها روحي واسالي أي واحد من بني هلال يقول لك منهو راح ووقفت واحد من بني هلال وقالت له

وقف نبي ننشدك يا شايع النبا *** عن الخيل حتنا اليوم موم شليلها

قال

ما غير فارس الدهما ذياب بن غانم ** حامي خفاف الخيل ملحق ثقيلها

جتهم وقالت لهم انه ذياب بن غانم ما صدقوها لانهم يوم راحوا لتونس ما كان لذياب أي فعل ولا يعد من الفرسان قالوا لها روحي واسالي واحد غير اللي سالتيه الاول

راحت ووقفت واحد وقالت له

وقف نبي ننشدك يا شايع النبا ** عن الخيل جتنا بالرجال شرود

قال الهلالي

ماغير فارس الدهما ذياب بن غانم ** وترى الشوف خرز والكلام يكود

الزناتي في ها الوقت كان حاط له كلاليب على امتداد قصره يعرفها هو ويبتعد عنها ودائما تخطف الفرسان ويعود عليه الزناتي ويقتله حاول الزناتي انه يستطرد لذياب ( يحاول ان ذياب يطارده ) يبي يجره للكلاليب حتى تصيب ذياب ويطيح من فرسه ويرجع عليه ويقتله وفعلا استطرد لذياب وطارده ذياب بعد مسافه انثنا الزناتي على ذياب لانه توقع انه طاح في الكلاليب لكن تفاجا ان ذياب وراه ما طاح وضربه ذياب بشلفاه اللي كان مسميها ( سم ساعه ) وطاح الزناتي وتجمعوا عليه فرسانه وخلصوه قبل لا يموت ودخلوه قصره بين الحياة والموت وقال قصيده يشرح فيها ما صار من بدايه قصته مع الهلاليه وهو يقول

[poem=font=",6,,normal,normal" bkcolor="transparent" bkimage="" border="none,4," type=3 line=0 align=center use=ex num="0,black""]

يقـول الزناتـي والزناتـي خليـفـه

[/poem]

[poem=font=",6,,normal,normal" bkcolor="transparent" bkimage="" border="none,4," type=3 line=0 align=center use=ex num="0,black""]

نفـس الفتـى لا بدهـا مـن زوالهـا

حلمت ليا ناش(ن ) من الشرق مزنـه

تمطر كمـا شـوك البلنـزا خيالهـا

مشت خميس( ن) وامطرت يوم جمعه

وهلت علـى قومـي مقـدم فعالهـا

مطرهـا السبايـا والصبايـا وبرقهـا

سيوف( ن) تلظا في يمانـي رجالهـا

ياليتنـي مـا صـرت شيـخ لقابـس

واهني نفس ( ن) ما عليهـا ولا لهـا

واهني نفس(ن) ما كلت مـال مسلـم

ولا اخلطـت مـال اليتامـا بمالـهـا

نظرت بقومي نظرة (ن) ما تسرنـي

وجيـه العـذارى طلقوهـا رجالهـا

كبـار اللحـا لا بـارك الله باللحـي

صغار اللحي شبـوا بقومـي فعالهـا

الا وابـلادي زينـة المـا مريـفـه

مدعوجـة (ن) بالنيـل تنـدا جبالهـا

مساس عن الرمضا دكاك عن الحصا

والبق والبرغـوث مـا جـا بجالهـا

واشيب عينـي مـن عريـب تنزلـوا

على مجنب البطحـا وبنـوا حلالهـا

بنـوا حـلال مـن حلالـي قريبـه

بنـوا حـلال شـاق عينـي دلالهـا

تـرى خيلنـا تسعيـن الـف نعدهـا

وتذكـر لنـا خيـل الهلالـي مثالهـا

ولوتجتمـع خيـل الهلالـي وخيلنـا

ابـا زيـد يركيهـا ويركـي مثالهـا

خان الصفيـرا يـوم خانـت بابوهـا

ولا بنـت الا فـان ابوهـا دلالـهـا

تشير بربط القـوم واطـلاق عبدهـم

واثـر عبيـد القـوم حامـي ثقالهـا

اثـر عبيـد القـوم زيـزوم سربـه

يجـر القنـا جـر السوانـي حبالهـا

يشل الدمي شل الدلـي يـوم تمتلـي

لاماحهـا الزعـاب ثـم ارتكالـهـا

سيفه تعايـوا عنـه صنـاع دمشـق

ليـا ولا جمجمـة الـراس شالـهـا

لكن عوى شامان في طـوس روسنـا

عوا ذيبة ( ن) تعوي لذيب (ن) عوالها

وانا شاهد(ن) للعبد فـي ربـع هدتـه

ثمانين مـن قومـي قلايـع رجالهـا

هـذا لـو ان العبـد قـد هـد مثلهـا

علـي كـان التـرك تيتـم عيالـهـا

اثـره اميـر ولـد اميـر مـجـرب

ليـا هـد تعطيـه السبايـا كفالـهـا

ترى ما يجي عني مثل حذفه العصـا

واسـرع مـن دور الرحـا اشتغالهـا

ولولا بخـط الرمـل شيفـت منيتـي

بسيـف ذيـاب قـد لابازيـد ازالهـا

هو قـدم قومـه وانـا قـدم قومـي

وهـو فهـد القنـاص وانـا غزالهـا

حذرا من اللي كفيـت القـدر وجهـه

لا جا جنوب الخيل صيـروا شمالهـا

اللـي قلـع حـدري ثمانيـن سابـق

كبيشات ما في نجـد ربـي امثالهـا

واللي قلعت حدره مـن الخيـل تسـع

والعاشره بالسيف انـا زلـت حالهـا

اليا اعقر لـه سابـق جـاه مثلاهـا

واليا اعقر لـي سابـق جـا مثالهـا

ان امهلت دنـاي وادركـت هقوتـي

لازيل الصفيرى عـن حيـاة تنالهـا

مهبول يا مهبول مـن يامـن النسـا

ومن يامن الحرمـه الا اقفـت بفالهـا

ليا بغـت درب الـردا مـا يكودهـا

تاطـاه لـو انـه حماقـا رجالـهـا

[/poem]

مااااااااااااااااااااااات الزناتي

ورثته بنته سعدى في قصيده تقول فيها

تقول فتاة الحيّ سعدىiوهاضهالها في ضعون الباكيين عويـل

أيا سايلٍ عن قبر الزناتي خليفهخذالنعت مني لاتكـون iiهبيـل

تراه العالي الـواردات وفوقـهمن الربط عيّساوي بناه iiطويل

وله يميل الغور من سايل النقا بهالـواد شـرقٍ والبـراع دليـل

أيا لهف كبدي يالزناتـي خليفـهقد كان لعقاب الجيـاد iiسليـل

قتيل لفتى الهيجاء ذياب بن غانمجراحه كأفـواه المـزاد تسيـل

ياجارنا مـات الزناتـي خليفـهلاترحـل ألا ان يريـد رحيـل

صار العلام هو الحاكم والقائد في المعركه بعد الزناتي كان له فعل قليل من الفرسان يقدر يوصل لمستواه

وخاض بني هلال معارك كثيره ومن ضمنها معركه اصيب فيها الفارس ذياب بن غانم الزعبي وكان بني هلال في هذه المعركه ثلاثين رجل هرب منهم عشره وعشره خافوا ولم يتقدموا وتقدم لهم عشره منهم ابوزيد الهلالي وذياب بن غانم وسرور بن قايد وهو من فرسان بني هلال وكان العدو قد نصب كمين لبني هلال وجهز الف رجل للقاء بني هلال وبعد ان التقوا واشتبكوا تقدم واحد من العدو واسمه ( وهق ) وضرب ذياب ضربه جرحته وافقدته الوعي وعندما صحي انشد قصيده يمتدح فيها فعل جماعته الذين صمدوا ويذكر فعل عدوه وهق الذي اصابه يقول ذياب :

يقول الفتى الزعبي ذياب بن غانـم

لي راي(ن) اقسى من حديد المبـارد

ولي حربة (ن) سميتها (سم ساعـه)

اعـرض بهـا فالكـون مـا كايـد

حنا بلينـا فالخـلا بالـف فـارس

وحـنـا ثلاثـيـن ولا زاد زايــد

اهل عشر منا تـدب الخيـل بالقنـا

كز(ن) ليا شـروا هشيـم الوقايـد

ابا زيد من ايمنهم وانا من شمالهـم

كما النار لا شبت ببعض الحصايـد

واهل عشر منا هملوا روس خيلهـم

واهل عشر منـا موكديـن الشهايـد

ينخون خيال (ن) بهم مـا عرفتـه

يقولون يا وهـق يـا ابـا العوايـد

ضربني وهق وانا مشيح(ن) لغيـره

وليا الدرع غاد(ن) فوق متني بجايد

ضربني برمح (ن) تسعة ابواع طوله

وقنطاره اللي من ورى الباع زايـد

سديته بسمـاي وثوبـي ومشلحـي

ايضـا ولا سـده جميـع السدايـد

ولكن طاحت الدهما وانا طحت فوقها

يا طيحة(ن) ما هـي لنـا بالعوايـد

ولكن قامت ا لدهما تومـي بعدتـه

وانا كما شن (ن) على القـاع بايـد

وانا رفعت الراس من بعـد سـدره

ليا الخيل يدبها سـرور بـن قايـد

على سرج قبا عندل بنـت عنـدل

مرفوعة الذرعان مـن خيـل قايـد

قل عشت يا قرم(ن) ثنا دون ربعـه

بيوم (ن) به المسنـاد والـرد كايـد

حنا عصافير (ن) وابا زيـد سـدره

نلوذ بـه عـن مرهفـات الحدايـد

ومن فرسان بني هلال الذين قتلوا في هذه المعارك عمير بن راشد وقد قالت اخته عميره فيه قصيده ترثيه فيها تقول عميره

قالت عميره بنت من يمنع التـلا

قيل حثاحيـث القبايـل رحايلـه

قيل الى من عد في وسط مجلـس

تعايا به الفهام عـن اثـم قايلـه

عزي لراع الغوج وان لحقن اربع

والخامسه دز العكا مـن سلايلـه

عليهن بالجهلا عمير بـن راشـد

اخوي الذي تشكي العدا من فعايله

اخوي الذي ما جابت البيض مثله

ما هوب غرجا يـوازي حمايلـه

مدمي خشوم الفوس من شمخ الذرا

عمير ليا عيا على الحـب كايلـه

ليا هبت النكبا وقل وابـل الحيـا

تلقـى عميـر كاثـرات نزايلـه

وحنا الذي نكتال بالصـاع وافـي

واللـي يعادينـا انهفـي مكايلـه

وحنا الذي نعزي الجنيني عن امه

وحنا الذي نعزي الفتا عن حلايله

اشتدت المعارك على بني هلال وكانت بقياده العلام اللي اسرف في قتل فرسان بني هلال ولا احد يقدر صده الا ابو زيد اللي سبق ان تعاهد معه عند القدور ان ما احد منهم يقتل الثاني

مالقى ابو زيد حيله او أي طريقه يتخلص منها من العلام

راح واستشار عجوز صاعنه في السن وقال لها انه بيقتل العلام حتى لو خالف عهده

قالت العجوز لا تقتله لكن اعقر فرسه ( يعني اقتلها ) اذا كثروا الفرسان من حوله لان العهد اللي بينكم انكم ما تقتلون بعض ولا تعاهدوا على الخيل واذا طاح بين الفرسان استطاعوا قتله

بدات المعركه في اليوم الثاني وكان هدف ابو زيد قتل فرس العلام وكان ينتظر ان يكثروا من حوله الفرسان وفعلا عندما اشتبكوا وكثر من حوله الفرسان ضرب ابو زيد فرس العلام وقتلها قال العلام لابو زيد

ابا زيد بقت العهد الذين بيننا **** تبوق عهد الله يالغدار

قال ابو زيد
لك الله يالعلام ماني ببايق *** ما بيننا والسابقات جوار

قال العلام
ابازيد جرني سبق الخيل جنني *** عليها حماقا يدعون بثار

قال ابو زيد
لك الله يالعلام ماني بشيخهم *** قدمي كبار ومقتفين صغار

قال العلام
خذ السيف والدبوس مني هديه *** قدام لا اذبح يوخذن جهار

قال ابو زيد
اهب يالعلام ما اقوى باسك *** لو هي بغيرك كان عقله طار

قال العلام
والله يا لو به مدفع ما لحقتني *** لو رف مهرك بالجناح وطار
ولو دامت العباد تقرا مصاحف *** يوم(ن) دنا ما زودوه نهار

مااااااااااااااااااااااات العلام

بعد موت العلام استولى بني هلال على كل شي حتى على ديار بني قابس وصارت السلطه لهم والامر لهم وقد قال ابو زيد قصيده يذكر فيها اهم الاحداث من يوم ما ارسل ألى ان استتب لهم الامر يقول ابو زيد

يقـول ابـو زيـد الهلالـي سلامـه

قلبـي لعبـا بيـن شـاري وسـايـم

قالـوا تقـدم ياسلامـه فـلا هـفـا

مقامك يـا ذيـب السرايـا الدواهـم

طلبت الفتى يحيى ومرعـي ويونـس

ولا غيـر هـذا ولا رفيـق يـوالـم

دعيتهـم والـكـل دنــا قلـوصـه

دعيتهـم ثـم احـرمـوا بالمـحـارم

سرنا بليل(ن) بـه قليـل(ن) نجومـه

مغلنطـس والجـدي بالجـو حـايـم

سرنـا لمـا قالـوا الـربـع كلـهـم

زهابنـا كـمـل حــذات الذمـايـم

قلت ابشروا ثـم ابشـوا ثـم ابشـوا

بعـز(ن) ورد كـل يـوم (ن) يوالـم

سرنـا مـع الحـرات تسعيـن ليلـه

نقـود ا لطوعـات خلـف الجهـايـم

وردنا بها تسعيـن عيـن(ن) غزيـره

ولا اسقانـا عقـب الفـلا للبهـايـم

سرنـا علـى اللـي بالقـا واعديينـا

على شيخنـا غاديـن مثـل العلايـم

عزلنـا لهـم تسعيـن الـف مـدرع

من اهل عزوتي واهل الوفى والعزايم

ضربنا بهم ضرب(ن) بدوس(ن) وهمه

كـز العوالـي والسيـوف الصيـارم

تبك الصفيرا عبـرة(ن) بعـد عبـره

تزيـد علـى ماقيـل آه(ن) وهـايـم

وقال ابـن سرحـان عليهـا مجـوره

حـرام (ن) عليهـا مالغيـري تلايـم

قـال ذيــاب بـدلـوا ذا بغـيـره

انا شوقهـا انـا ستـر قـان الرقايـم

كثـرت مـن هـذا وكثـرت مثـلـه

وطال العيا بينـي وبيـن بـن غانـم

ولا يــد الا ويــد الله فـوقـهـا

ولا ظـالـم الا ويبـلـى بـظـالـم

واعمارنـا راحـت نـداري زماننـا

ولا خير في عمـر(ن) مـداره دايـم

ولا خير فـي عمـر الفتـى وحياتـه

ليا عـاد مـا تكثـر عليـه الجرايـم

لك الله مـا ذقنـا بنجـد(ن) طرابـه

حـذا العيـد اوحـذا ليـال الصرايـم

يانجـد لـو ان الجفـى منـك مـره

صبرنـا لكـن الجفـى منـك دايـم

يا نجد وان جاك الحيا فارسلـي لنـا

مع الطير والا مـع هبـوب النسايـم

يا نجد وان جاك الحيا فاصعقـي لنـا

صوت (ن) رفيع موقض(ن) كل نايم

سرنـا خـلا العـد تسعيـن ليـلـه

ليا دار قوم (ن) مـن كبـار العمايـم

سعولنـا بحبـال شــرع قطـايـب

حطـو يدينـا مـن ورانـا حـزايـم

قال احبسوهم عنـد سعـدى وحيهـا

لمـا يجـي فيهـم امــام يـسـاوم

اقفوا بنـا والفـوا بنـا عنـد منـزل

بدر(ن) تجلا عنـه بعـض الغمايـم

قالـت لنـا يالربـع ويـن ديـاركـم

ومنيـن جيتـوا يـا رجـال العزايـم

قلنـا لهـا حجـاج مـن دار عامـر

تقـازا بنـا اكـوار البكـار الهمايـم

قالـت لنـا والله مــا ذا بعلمـكـم

كذبتـوا علينـا يـا وجيـه الخدايـم

معي علمكم من يوم سرتوا من اهلكـم

تقـازا بـك اكـوار البكـار الهمايـم

معي علمكم يحيى ومرعـي ويونـس

وابا زيـد لبـاس الـدروع الرسايـم

قلنـا عطـاك البيـن انتـي طبيبـه

او زاد لـك بيـن السرايـر معـالـم

قالـت لـنـا والله مـانـي طبيـبـه

ماغير اشوف اللي به المـوت حايـم

ابـا زيـد لابــد مــا تملكونـنـا

وتسعون لنـا بعـض الليالـي وهايـم

ويذبـح ذيـاب او سميـه والــدي

وياخذنـي منـك ذيـاب بـن غانـم

قلـت قولـي خيـر عسـى تاجدينـه

وربـي لـراع الخيـر يلقـاه دايــم

راحت تخطى يـم ابوهـا تقـول لـه

الا يا ابـو احـذر لشـوري تعاسـم

يا ابوي ربـط العبـد يدنـي معيـره

لو كان فـي وسـط القبـور الهدايـم

قـال لهـا يابنـت شـورك مبـارك

قومي وجـزي حبـل نسـل الخدايـم

جتنا تخطى فرحـة(ن) غيـر كرهـه

تقول ابشروا يالربع ابـا زيـد سالـم

دنيـت للزيـزا صميـل ومـزهـب

ودنيت لي رمـح(ن) طويـل العلايـم

ودنيـت لـي مـا مونـة هيلكـيـه

وان سندت لي قاعد(ن) صرت قايـم

اللي سرتهـا تسعيـن ليلـه وانختهـا

ليا حسن فـي نجـد اثـار المكـارم

تجينـي النجـلا تفـتـش مزهـبـي

ولقت خطوط (ن) فيه زيـن الرسايـم

قالت ابا زيد هو ما قال يحيى وقلت له

حث الخطـا ليـا نـادم الحـي نـادم

قامت تناعت لـي رجـال الزعامـه

يالبيـض طلعـن الغطـا واللثـايـم

وصاح ابن سرحـان بشبـان قومـه

وترى اول من مشى ذياب بـن غانـم

سرنا على هجن(ن) قد انقـاد حيهـا

وعرض لنا طيـر الفـلاح ام سالـم

في ها الوقت طاح المطر على الجزيره العربيه وتاخر ابو زيد ما رجع لعليا وارسل له قصيده تساله عن اسباب غيبته وان المطر نزل على ديارهم في نجد ووقتها كانت عليا في بيشه تقول عليا

ياركب اللي مـن عقيـلٍ تقللـو

على ضمرٍ شروى الحنايا نحايل

ابا اوصيكم وصاةٍ ماتثقّل ركابكم

خفيفه على راعي الثنا والجمايـل

واليا لفيتو لاهلكم عقـب غربـه

متغبطينٍ فـي بطـون الحلايـل

فقولو لبو زيدانّ بغانـي بغيتـه

وأنّ دوّر البـدلا لقينـا البدايـل

كمٍ رجوس الحجل تبلـى بعاقـه

وكمّ عقةٍ تبلى بوافي الخصايـل

أنجبت أخضـر مايـزرر ثيابـه

هبيل يلعـب بالقلـوب الهبايـل

والله لولا البحـر بينـي وبينـه

جيته على وجناّ من الهجن حايل

أبا زيد غرّات الصبـا لاتغـرّك

ترى الهجن خيرٍ بالسرا والقوايل

بالشتا عليك من الهجن سمرغيّـه

وبالقيظ دوّر من كبـار الشمايـل

غزاليّـة المقـدم جماليّـة القفـا

عليكم بهـا ياراكبيـن الرحايـل

أبا زيد لوّ انّ النسا تركب النضا

جيتك على وجناّ من الجيش حايل

لكن صريخ الكور حدري وفوقها

صريخ القطا في محكمات الحبايل

أبا زيد تنساني وتنسـى جمايلـي

الله أكبـر يانـكـور الجمـايـل

نسيت يوم انّ عرقات الارطا بيننا

يوم انّ جعدي فوق متنيك مايـل

ويوم وصلت الرساله لابوزيد ركب ذلوله وتوجه لبيشه اول ما وصل وشاف عليا عرفها وقبل ما تعرفه ويوم تعرفت عليه استغربت من شكله متغير وقالت له

وراك يا ابوزيد غاد(ن) شايب *** شايب ومشهوهب وكنك ذيب
انا اشهد ان البعد ما يهم طيب *** ولا هو على جزل الرجال صعيب

قال ابو زيد

بلا من هجرك ومن غربة النيا *** ومن نوبتن تزمي وهذيك تهيب
اهلك بالوديان وديان بيشه *** واهلي شمال الشمس يوم تغيب

الله عليك يا ماطر السويدي

بيض الله وجهك على ايراد هالقصه الجميله

مما أعجبني

مهبول يامهبول من يامن النسا من يامن الحرمه الا اقفت بفالها

اليا بغت درب الردا ما يكوودها تاطاه لو انه حماقا رجالها

و

ولا يد الا ويد الله فوقها ولا ظالم الا ويبلى بظالم

و

كم من رجوس الحجل تبلى بعاقه وكم عقةٍ تبلى بواف الخصايل

لاهنت يا ماطر ويا ليت تتحفنا بمثل هذه القصص النادره

تحياتي لك

[ماطر السويدي]

	المشاركة الأصلية كتبت بواسطة الهــارف

	الله عليك يا ماطر السويدي بيض الله وجهك على ايراد هالقصه الجميله مما أعجبني مهبول يامهبول من يامن النسا من يامن الحرمه الا اقفت بفالها اليا بغت درب الردا ما يكوودها تاطاه لو انه حماقا رجالها و ولا يد الا ويد الله فوقها ولا ظالم الا ويبلى بظالم و كم من رجوس الحجل تبلى بعاقه وكم عقةٍ تبلى بواف الخصايل لاهنت يا ماطر ويا ليت تتحفنا بمثل هذه القصص النادره تحياتي لك

وعليكم السلام ورحمة الله وبركاته ويشرفني

مرورك وذوقك الرفيع الله يعطيك العافية

ولك تحياتي وتقديري

تسلم يابو فهد

طرح شيق وقصص رائعه لا عدمناك

تقبل مروري ،،،،

[ماطر السويدي]

	المشاركة الأصلية كتبت بواسطة صالح الكعبي

	تسلم يابو فهد طرح شيق وقصص رائعه لا عدمناك تقبل مروري ،،،،

العفو يا ابو خلود وشاكراً لك المرور

والاطلاع على هذة الملاحم التاريخية

ولك مني أطيب التحايا