هجرة رسول الله صلى الله عليه وسلم

[poem=font=",6,,bold,normal" bkcolor="transparent" bkimage="" border="double,4,darkred" type=1 line=0 align=center use=ex num="0,black""]
نادى منادي الفجر في يوم الاثنين = نداء يحيي قلوب غفلا من إسنين
وردد ورا صوته ملوك ومساكين = الله أكبر كم قلوب ( ن ) وعتها
فج الصباح وبانت الشمس بالنور = والظلم زال وداعي الشر مدحور
روح زمان الشرك بالظلم والجور = والله بنور الحق شمسه سطعها
صلى الله وسلم على خير الأنام= مبعوث ربي للملا بدين الأسلام
مرسول رحمه يهدم أحجار وأصنام =وطاحت حصون قريش وأرخت علمها
ربا في ديره لبني سعد الأحرار = وأمه حليمه مرضعته اللبن حار
يمشي يخط أرضه وتتبعه الأنظار = وكبر يتيم الوالدين وحضنها
عاش بكنف عمه على حب وإعجاب = وألبسه من ثوب العرب خير جلباب
وأحسن له الصحبه ولا كن ما تاب = فدوه لـ أبو القاسم حياته رهنها
رعى الغنم فأول بداية شبابه = وتاجر بسوق قريش وأوفى نصابه
صادق أمين إسمه عزيز( ن ) جنابه = ويده الشريفه بالأمانه رفعها
كان يتعبد خالي ( ن ) داخل الغار = في شرق مكه حامل ( ن ) جوفه أسرار
وجاه الملك جبريل بالوحي مدرار = بلغ كلام الله ياخاتم رسلها
شاهد رسول الله ذهل العيوني =وروح لهل بيته يقل دثروني
وكانت بداية خير وبل المزوني = فمحارب الأصنام وللي عبدها
صاح الرسول بقومه يا قريش هبوا = جاني من الله داعي الخير لبوا
فوق الصفا يخطب بقومه وتبوا = أقفوا ودعوى الحق محد ( ن ) سمعها
أمضى ثلاث سنين في دعوة الناس =يدعو بخافي السر والوضع حساس
من دار الأرقم إبتدى ضربت الفاس = ونفسه بنصر الله كبير أملها
جاه الوحي يدعوه للقول بفصاح =أدعو لسبيل الله بالخير صداح
وجنت جنون قريش من قول ( ن ) إنباح =وراحت لنار الشر توقد حطبها
دارت رحى الكفار والوضع قاسي =وزاد الألم والهم لقريش باسي
عمه وقف من دونهم ضلع راسي =وقامت بني هاشم تساند ولدها
سرى رسول الله في ليله عتيمه =فوق البراق وقدرة الله عضيمة
لثالث بيوت الله يحضى بقيمه =كبر وصلى ركعتين وقصرها
وصعد نبي الله سبعة سماوات =في رحلة إعجازن وفضل وكرامات
فيها إنفرض للناس خمسة صلاوات =حكمة لرب الكون شاء وفرضها
وقالوا رسول الله ساحر ومجنون =وزاد الأذى للمصطفى أشكال وفنون
ليله ورى ليله من القتل يدنون =والله بمكره شاء وأعمى نظرها
بآل ياسر مثلوا شر تمثيل =إضعاف قوم ( ن ) بينهم ذاقوا الويل
وصبر( ن ) لظلم قريش وإن زادو الكيل =وعد الرسول لآل ياسر ضمنها
ولاحت بروق الخير بديار الأحباش =بلاد النجاشي عاش من جالها عاش
بأمر الرسول مهاجر القوم بغباش =فروا وعين القوم تذرف دمعها
وراحت كبار قريش بأغلى الهدايا =وأفصح لسان يجيد سرد القضايا
حمر النعم لقريش جزل العطايا =تطمع برد أقوام طه أمرها
عانوا بني هاشم ظلايم للأقراب =وأمضوا ثلاث أعوام فحصار بشعاب
والجوع زاد القوم عض ( ن ) بالأنياب =تأذن رسول الله تترك وطنها
وجاه الإذن من ربي يرحل بدينه =لناسن تحب الخير بأرض المدينه
تحمي رسول الله وتقر عينه =بأنصار يثرب رحمة الله كتبها
كلف علي يبقى يرد الأمانات =وأختار أبو بكر( ن ) لقطع المسافات
و أمر صديقه يشد ثنتين بكرات =يطوي بها دروب ( ن ) تعني أهلها
وحاموا على دار النبي جمع فرسان =تنوي أبو القاسم بتخطيط شيطان
وخرج رسول الله بآيات قرآن =وذر التراب بروس قوم ( ن ) وجدها
وتحرك بصحبه لغار بجبل ثور =أمضى ثلاث أيام بالغار في شور
جند ( ن ) لربي مرسله تتقن الدور =غطت دروب الغار بلي بنتها
وجاته ركايب من قريش البغيه =تتبع أثر رجله شويه شويه
وحامت على غاره نوتله بنيه =والله أنسى القوم شوفة قدمها
وأبو بكر خايف يلدون الأنظار =ويخبر رسول الله بلي لفا مار
لكن ربي ثالث إثنين في الغار =أنزل سكينة تعين قلب نشدها
أسماء كانت تجلب الزاد والماء =وعبد الله مراسل تفاصيل الأنباء
وأبن الفهيره راعي أغنام مشاء =يمشي وراهم يخفي جره لمحها
وخفت عزوم قريش إنها تجيبه =وجاه الأريقط يعرف دروب طيبه
يدلل رسول الله وياخذ نصيبه =وتبدأ بحفظ الله تمشي جهدها
ويسير أبو بكر على الركب حارس =وبانت ورآهم عجت أغبار فارس
يدرس دروب ( ن ) بالأثر خير دارس =كان لسراقه علم وأدرك أثرها
وغاصة رجول الخيل بالرمل للقاع =ونادى رسول الله والركب فإسراع
أوعدك يحرم سركم ورد الأسماع =أطلق سراحي ودفن سرك ثمنها
وصل رسول الله منازل خزاعه =لخيمة عجوز( ن ) طبعها إطعام جاعه
تحب ضيف الله وتحسن شباعه =وجاها رسول الله يطلب كرمها
قالت سرح بالجود عبيد رعيان =وابقوا لنا شات ( ن ) مريضه من أزمان
مابه جهد فيها لها ضرع نشفان =وطلب وعاء أم المعبد وأذنها
مسح رسول الله تسلم يمينه =وحلب لهم من فيض شات ( ن ) سجينه
درت لبن يروي عطش صاحبينه =وأسقى عجوز الخير أول لبنها
وكانوا أهل يثرب لقدمه تحرى =كل يوم بطراف المدينه تورى
ولاشد حر القيض والنخل ذرى =عادة جموع القوم تكمل عملها
طال إنتضار أهل المدينه لملفاه =والشوق زاد الناس فرحه بلقياه
وبانت ركاب الخير ياحسن مبداه =يضلله أبو بكر ببرده رفعها
ونادى يهودي جمع الأنصار جاكم =وصاح في بني قيله لفاكم لفاكم
وثاروا أهل يثرب حشود عساكم =نصره لدين الله ترفع عمدها
فدار سعد ( ن ) جاته الناس زوار =وبنا بقباء أول مساجد للأنصار
في أربع أيام ( ن ) قضاها وهو مار =وأكمل طريق الركب لأرض ( ن ) قصدها
خاوى رسول الله بين الصحابه =وألف قلوب الناس ساروا قرابه
ويفزع كريم الجار ماصك بابه =برق ( ن ) سقى ديره مرير ( ن ) عطشها
وثاني بيوت الله بناها على ساس =بجرد النخيل ولبنة الطين تنداس
وزان البنا زرع الفسايل والأغراس =وشيد بيوت الله بصحبه عمرها
زار المريض ولانسى حق جاره =ابن اليهودي يوم جاله في داره
وعرض عليه الحق تاره وتاره =وأطاع أبو القاسم بكلمه نطقها
وتهلل الوجه الندي فرح وسرور =يوم إنهدى للدين وأطاع للشور
ولا خيب الله من سعى سعي مبرور =مادام دعوا الحق مطلق رسنها
وكانت بداية طلت أنوار فجري =والهجره سارت رمز تاريخ هجري
يبقى فصدر الناس مكتوب مقري =تاريخ يروي أحداث شخص( ن ) شهدها
تزوج رسول الله عشره وثنتين =وأنجب ثلاث أولاد مثل الرياحين
القاسم وعبد الله ماتوا صغيرين =ومات إبراهيم وحزن الأمه غمرها
وأربع بنات رقيه وأم كلثوم =وفاطمه الزهراء من سادة القوم
زينب سلالة عز من بيت محشوم =دار( ن ) تجلى فوق سقفه قمرها
الله جعل للمصطفى هيبة وإجلال =وخاتم فظهره رسمته رسمت هلال
وغيمه حمت راسه من الشمس بضلال =ميزه لبو القاسم وكل ( ن ) عرفها
من نسل عدناني طويل ( ن ) ومربوع =فلج الثنايا كاحل العين مطبوع
عريض المناكب مصدر الخير ينبوع =شخصن جمع أحلى الصفات وكسبها
وجهه ينافس نور الأقمار فالزيين =أحمر خدود ولونها يشغل العين
شعره طويل وقاسمه بالظفيرين =وزانت خدوده طول لحيه كستها
أعطاه ربي في النطق مجمل القول =وفي الحرب قائد سيفه يصول ويجول
يصبر وصبره عندنا غير معقول =ويبقى أُحد شاهد لخطه وضعها
حج النبي بالصحب حجة أخيره =وخطب بجمع الناس خطبه مثيره
وتجمعوا حوله جموع ( ن ) غفيره =ووصى جموع الناس تأخذ نسكها
مات النبي وعمره ثلاثة وستين =( 12) ربيع أول ضحى يوم الاثنين
دُفِن في بيته وسط قبر( ن ) من الطين =وخرج منادي الناس بأمر ( ن ) فجعها
صلات ربي عد ما لاح براق =وإعداد وبل ( ن ) ساقه الريح وأنساق
وعداد ما نفس ( ن ) لعفو الله تشتاق =على النبي وآله وصحبه وجبها

" ماهر عبد المعين العلياني الهذلي "=[/poem]

اللهم صلى وسلم على خير البريه

اخوي ماهر صح لسانك وبيض الله وجهك ابدعت

اعجبتني فكرة القصيده نادر ما تطرق لها الشعراء
واعجبني تووووضيفك الرائع للسيره النبويه بتسلسل لا يستطيع ان يصل اليه الا شاعر متمكن من شعره

اشكرك اخووي ماهر وجزاك الله خير على هذا القلم المبارك
بنتظار جديدك

تقبل مروري

اللهم صلي وسلم على اشرف الانبياء والمرسلين وخاتمها

يعطيك العافيه اخ ماهر على النقل الموفق


موضوع مهم جدا ويتحدث عن شخصيه من الواجب على كل مسلم الاطلاع عليها

مجددا لاهنت ويعطيك العافيه ولاتحرمنا من جديدك

تحياتي

مشكورين على التعليقات الجميله ويسعدني مروركم ويعطيكم العافيه

صح لسانك وما قصرت

شاعرنا ماهر

صح لسانك لين ترضى وبعد ان ترضى

جميل هذا السرد الوصفي لسيرة الرسول صلى الله عليه وسلم

ولا أنسى أن ارحب بك فحياك الله مع أبناء عمومتك في مجالس هذيل


وننتظر إبداعك


تحية طيبة

اللهم صلي و سلم على محمد و على اله و صحبه اجمعين

.
.

صح لسانك يا ماهر ...

قصيدة غاية في الجمال من معناها الى مبناها و هي رائعة

شكرا لك

أطيب التحايا

اللهم صلي وسلم عليه وعلى آله وصحبه وسلم ,,

اخي الفاضل / مــا هــر ...

صـــح لســــــــــــــــــاا نكـ .. مدد بلا عــــــــــدد ...


سرد راااائع لسيرة (( المصطفى ))...

اشكرك ...

ارق التحايا..

صح السانك ولا شلت يمينك

نعم وضفت الشعر في سرد أعطر سيرة في الوجود على مر التاريخ

سرد بديع جدا لسيرة سيد الخلق.

وتقبل احترامي وتقديري

صح لسانك اخوي ماهر

مجالسي من أروع ماقرات يعطيك العافيه

دمت بخير

سلمتم جميعا الحقيقه هذا قليل جدا في حق المصطفى صلى الله عليه وسلم
مشكورين على مروكم
أخوكم ماهر عبد المعين حماد العلياني " الــــهـــــذلـــــي "

الله الله الله احلى تصوير للسيره شاعرنا ماهر العلياني
الحقيقه معلقه جديده هذيل الشعر والشعر ماهر العلياني
تسلم يابو عبد المعين

اللهم صلي وسلم على سيدنا محمد وآله وصحبه

صح لسانك وبيض الله وجهك

اللهم صلي على نبيك وحبيبك محمد
صح لسانك

مشكورين جميعاً ويعطيكم العافيه والجميل الحقيقه تواصلكم