نصيحه شعريه

الســلام عليــكم ورحمــة الله ..

ويامرحبــا ومسهــلا بالجميــع ..

مَن منا مايحتاج نصايح الكبار .. ومشورتهم الراجحه لاصكت فينا وعجزنا نحلها ..؟

عودتنا الله لايخلينا منهم مايبخلون علينا بالنصح والتوضيح .. وكيف يبخلون وحنا شعرة من لحاهم .. ولكن من يسمع لهم في ذا الزمن ..؟؟

ونرجع ونقووول الزماااان بخير ..

و النصح من أرووووع انواع الشعـــــر والذي اهتم فيه واحب متابعته ..

ومن المقدمة للقصيده ..

هذي قصيدة أحترمها كثيرا للشاعــر الكبيــر : سليمان بن شريم - رحمه الله - ينصح فيها ابنه ..




يا مل عينٍ في محاجـــــــيرها شوك =والقلب به عن لذة الــــــــنوم تكـــاك

لا دك في قلبي من الهم داكـــــــوك =جاوبت طربات الحمايم على الـــراك

عزي لحالك يا عزيز وأنا ابـــــــــــــوك =كان الزمان اللي توطــــاني توطـــاك

إفهم وصاتي يا عزيز وأنا ابـــــــــــوك =دامك صغير وغاية العــــــلم يقــــراك

تراه ما ينــفعك خالك ولا أخــــــــــوك =لا صار ما تقضي لزومك بيمــــــــــناك

وربعك ليا بان الخلل فيك عافــــــــوك =أقرب قريب ٍ لك من الناس يشــــناك

إن كثر مالك صدقواّ لك وطاعــــــــوك =وإن قل ما بيديك شانت حلايـــــــاك

لو تطلب الما عندهم كان ما أسقوك =إبعد مزارك عن وطنهم ومـــــــــرباك

وإن طاب حظك صدقوّا لك وحــــــبوك =وإن بار كلن ما يبي غير فرقـــــــــاك

وإلا إعترض لك من صروف الـنيا صوك =كلن تبرا منك ماهــــــوب ويـــــــــاك

هراجة المجلس إلى جـــــــيت وروك =منازل ٍ تطرب نظيرك بدنــــــــــــــياك

وإللا قضى منك اللوازم وخلــــــــــوك =تفرقوا وأنت إحتمل كل ما جــــــــاك

كنك سراج البيت للنور شـــــــــــبوّك =وإلى إنقضى اللازم حدا الربع طفاك

وألا كما ليمونة الحمض مصــــــــوك =وإلا قضى منها الطعم فرغــــــــوا ذاك

واللي يجي من رفقته ريب وشكوك =إحذر عنه لياك تصدف بمـــــــــسراك

وإلا جفوك أهل الوطن وإســـتخفوك =قلّع غريسك منه وإهدم ركايـــــــــــاك

تراك لو تنجع على الربع صــــــعلوك =أحسن من اللي نلتجي به وياطـــــاك

عطهم وضيفهم إلا منهم جـــــــــوك =وإغلق ضميرك لا تعلم بقصــــــــــــياك

إن طبت ما حبوّك وإن عبت زالــــوك =تمضي حياتك ناقل ٍ داك بريــــــــــــاك

وإلى نفوك إمن الوظيفه وعافــــــوك =خفتّ موازينك وكلن تهــــــــــــــــقواك

وإصحى لخلان الرخا لو تغـــــــــالوك =إعرف ترى أطيبهم إلى إحتجت يجفاك

كنك خوي مقيط دهووك وأغــــــووك =وحقك عطاك رشاك وأقفى وخـــــلاك

وإحذر عن العلة ترى الحق مـــدروك =مثل العمل يدركك ما منه فكـــــــــــاك

وإن كان عدوانك على الضيق حدوك =فإخصم طلابتهم بعجفاك وقـــــــــداك

وإن كانهم لمشرّف الحق ماشــــوك =ناظر مطاليع الفرج قبل مـــــــــــــبداك

وإن طاوعوا شيطان الأنفس وهانوك =فإصبر على البلوى ودفنك رزايــــــــاك

زرهم تراك إلـــــــيا تونــــيت زاروك =إن ما بديت لصاحب السو يبـــــــداك

ما دامهم ما طاوعــــوا لك وعرفوك =إضرب على الكايد إلى عمست رياك

لو هذبوك إمن المصاوب وضــــدوك =ما يذبحونك قبل تدني مــــــــــناياك

وإحلم على الجاهل ترى الحلم مبروك =وقم للضعيف اللي من الظيم ينخاك

وإدمح خطاجيران بــيتك إلى أوذوك =ترى القصير وحرمة الجار بحــــــماك

عطهم لوازم حقهم لو تناســــــوك =في كل ما يصلح لدينك ودنــــــــياك

وقم للضيوف اللي لفوا لك وضافوك =أغلى كرامتهم حجاجك وبشــــــراك

وإعرف ترا مالك للأضياف مشــروك =لولاه يطلب حاجته منك ما جــــــاك

وقم للرجال إن رايعوا لك وحبــــوك =وإحشم خويك وأكرمـه عند ملـــفاك

وإلى إعتبرت بسيرة الناس كفــوك =ما كثر من شي أتعبك ثم عـــــــناّك

ولولا تبات بهمّ دنياك مظـــــــــنوك =ما طاب لك ما دام لك وإفتــــهم ذاك

لو يطلبون إخفايك الناس ما أخفوك =الرجل مثل النجم في كل الأفــــلاك

وصلاة ربي عدّ الأوراق والشـــــوك =أو ناض براق ٍ وما هل ســــــــــــفاك

على الذي ما فيه ريب ٍ ولا شكوك =امحمد ٍ ما دك بالقــــلب دكـــــــاك


وسلامتكم .. وسلامة كل عينٍ قرت ..

رحم الله الشــاعرابن شريم

وأسكنه فســـيح جناته

والنصيحه من الأب تعتبر ثروه
لأنها من قلب صادق ومجرب

حفظ الله لنا الآباء وغفرلهم ورحم ميتهم
وأسكنه فسيح جناته

تقبل مروري

تسلم يا ابو يزيد ..,

وعلى فكرة ------> منت هين هههههههههههههه

الحقيقة راااااااااااااااااااااائع .. وحضورك المشرف .. شرف لنا يالغالي

<< بس لا يكبر راسك علينا هههه

الله يحفظ لك يزيد ويحفظكم جميع

الله يعطيك العافيه يا أبو يزيد


والطيب ما يجيب إلا الطيب


بيض الله وجهك

وأنت سالم وغانم ياأبويزيد
مشكور على الاختيار الموفق
والله يعطيك العافيه

الله يعا فيكم ومروركم اسعدني
تقبلو تحياتي

الله يعطيك العافيه يا أبو يزيد

هذي عاداتك دايم تتحفنا بالشي المفيد

واصل ونحن معك

تحيااااااااااااااااااااتي

أخوي أبو يزيد
نقل موفق ورائع ، في الحقيقة هذه القصيدة
قرأتها من قبل حوالي 15 عاماً وكلما أعيد قراءتها
أجدها تزداد جمالاً وروعة ، ولأنك مميز ولاتنقل إلا المميز
هاأنت تنقلها لنا مشكوراً ، الله يعطيك العافية .