,,, وصيـــة ( أب ) قمـــة في الحكمـة ,,,

هذي وصية الأمير سليمان التركي السديري قال هذه القصيدة وهو في المستشفى
يوصي أبنه فيصل وكأنه يرحمه الله يشعر بدنو أجله



أشوف ديّاني وقف لي على الباب
يبي الوفا مني ويطلب حسابه

مـا يـنّـسـي ديــن تـقـفـاه طـلاب
الـديـن مـا يـوفـيه كـثـر الطـلابـه

يا فيصل أوّدعك توديع من غاب
لا تحتريه أنه يجي من غيابه

غيبة دهر ماهي شهر عد وحساب
في مظلم ٍ ينهال فوقي ترابه

أبيك ما تجـزع وتفـزع وترتـاب
لا جاك من ينعى ويشلع ثيابه

عمر البكا ما فاد حي ولا ثـاب
لـو سـر غيرك كان سر الندابه

اعزم وشم واصعد من المجد مرقاب
واطلب لابوك انه يخفف عذابه

وعليك باخوانك وربعك والأقراب
حقي عليك مواصلك للقرابة

وما بينكم لا ينقل الهرج سباب
ترى دمار الدار نقل السبابه

ومن الرجال اليا تخيرت الاصحاب
تخيّــر اللي مــا يبـّدل جـــوابه

مغلاق باب الشر حلال الأنشاب
زبن الدخيل اللي تنصى جنابه

وابعد عن الداني ولو مرة ٍ طاب
لزوم يظهر لك مرار ٍ عيابه

وانص الرجال الا تخيرت الانساب
كل ٍ تعوض به يا كود النسابه

وانشد عن المربا ترى العرق جذّاب
عــرق الردي لابد يجـذب جـذابه

بلغتك الاعلام من غير نجاب
والحر يفهم من خطاه وصوابه



أتمنى تعجبكم أنشاء الله