خذتني غربة عنوانها*** غربة بلا عنوان

[align=center]يعين الله يادنيا تسـوق ايّامهـا الأحــزان
.............. يعين الله .. وانتي مثل قفـل ٍ ضـاع مفتاحـــــــــه

يعين الله ... وجروحي لها في كلّ وقتٍ شـان
.............. كذوب اللي يقول ان الزمن بيـداوي جراحـــــــــه

سقى الله يوم انا يمـّه غرير ٍ يزعج الجيران
.............. سقى الله يوم انا طفلٍ يصج البيت بصياحـــــــــه

سقى الله يوم كان اقصى طموحي .. لعبة الدنان
.............. نهاية يومي المغرب ... واخاف الليل واشباحــــه

سقى الله يوم انا البس بشت ابوي وثوبه القيطان
.............. واقلد كلّ شيٍ فيه .. حكيه .. جدّه .. مزاحـــــــه

واشيل المسبحه مثله ليا هوجس وهو سرحان
.............. بيشعر ...واحسب ان اللي عطاه الشعر مسباحـه

سقى الله بيتـنا ذاك البسيط مشقق الجدران
.............. شجـاع ٍ يهزم الغدراء بقنديله ومصباحـــــــــه

تكحِّلنا القناعه .. لا طمع .. لا هم .. لا حرمـان
.............. واذا جاء الليل تكفينا ... ثلاث اخوان .. طرّاحــه

جميع الذكريات اللي غدت في قفرة النسـيان
.............. يحـاكي حلوها عبره ... بموق العين سبّاحــــه

خذتني غربـةٍ عنوانها ... غربه بلا عنوان
.............. ابي عقب التعب راحه ... لقى فيني التعب راحه

رجعت اليوم مثل اللي رجع عقب القنص خسران
.............. غدا طيره وجاء يسحب سلـوقيه وملواحــــــه

قصيده مابَعَد مرّت ببال مسـاعد وضيـدان
.............. هواجـيس ابدويٍ هايـم ٍ في عشق فـلاحــــه

وروح ٍ تايبـه كانت تبي لذنوبـها غفـران
.............. خطـاي انّي كتمت اسرارها بعيـون بواحـــه

تقولين المطر ماهـوب يمّـه دايمٍ هتان
.............. اجل معذور قلبٍ في همومه ضاعت افراحــه

انا يمـّه غلطت ولاني اول واحـدٍ غلطان
.............. ابونا آدم من الجنه خرج باسباب ... تفاحــه

خذلك الوقت فيني .. ماخذلتك ياأعـز انسان
............وش الدبره ؟ وحظي صار.. قفل ٍ ضاع مفتاحــه[/align]