قصيدة العِزي المشهورة في تاريخ آل سعود

هذه قصيدة تاريخيةو تعتبر تاريخ للدوله السعودية

للشاعر عبد العزيز بن عيد المطرفي الهذيلي المشهور بالعزي راع البره الله يرحمه

وهي هنا يلقيها الشيخ : حماد راشد منقره البلوى

http://www.youtube.com/watch?v=HUhVBGuEegQ


وهذا نصها


يا لله يا للي ما بعد صك بابه / يا للي غني وكل خلقه مقاليل

رب السما رب الوطى رب مابه / يارب خلقه رب طاها و جبريل

تعلم مالا نعلم خفيٍ خفا به / وتوحي مالا نوحي من الفاظ ماقيل

يامن على الطاغي شديد عذابة / نرجي العفو يا من عذابه بسجيل

عساي من اللي في يمينه كتابه / ولا تواخذني بالأقوال والقيل

قال لذي زين الغرايب لوي به / شطر على قاف غريب التماثيل

ألف هلا با اللي لفتنا ركابه / باللي على كور النجايب مراسيل

كسرت عصى من سب دين الوهابة / الدين دين الله ولا فيه تبديل

وبكتاب رب عز من هو كتابه / تعز دينك بالشيوخ المشاكيل

واللي كسى الكعبة والابطح بني به / جد الحمولة بالسنين المسا ميل

واحرق هل القطب الجنوبي لهابه / جضيضهم من عقب نقل المواصيل

واعدم هل المشهد وهدم قبابه / ما غش دينه بالبدع والبراطيل

وعشى هل النقرة وعشى الذيابة / وجابوا له النيرات والجيش والخيل

وهل القطيف وصخر أهل الخشابة / وجملة هلى النقرة لخيله زماميل

ركبوا مراكيبه وسارت ركابه / على الجزيرة ما مشى الريل والتيل

وحول بفارس والقرايا مشى به / وهدم بها أصنام وذبح رجا جيل

هزت بلادين العجم بارتيابه / وجابوا له الجزية صغار مذاليل

ومسقط وكل عمان شرعة قضى به / وأهل اليمن جو له على غير تنكيل

هذي حدود سعود واللي بنى به / ملكه غدت فيه النبايت مظاليل

واللي حواه سعود فيصل حوى به / يبغيه نايف بالسنين المقابيل

في عرفنا فيصل حضرنا جنابه / بتيفان(1) حكمه لعبنا بالمصاقيل

وأنا مع اللي يلعبون الكعابة / وجيشه يزكي يم الأميال والسيل

ما كنه إلا من ملوك الصحابة / خليفة خلف على تالي الجيل

ربا وقرا والقواعد عطابه / والرمل والعميان رتب لهم كيل

بني المساجد لأجرها واحتضى به / في كل صوب له وقوف وتسبيل

ومن عنده أيتام لفيصل عنى به / جابوه للي يحتسب للمحاصيل

وأهل المدارس كنهم من أصلابه / يفرح إلى جا طالب العلم بالحيل

مات الإمام وكل حي درى به / عساه مجزى بعفو إلى سيل

ورث حرار قطع من صلابه / وصفي من المقرن ربيع المهازيل

شيخ ولد شيخ عريب جنابه / من منهل مادار مثله مناهيل

الشيخ ابن فيصل شبوب الحرابة / إن ماتت النيران جدد لها حيل

داس الخطر واروي الخضر من روى به / وداس الحريب ونال بالحكم ما نيل

كم هية غطا النوازي ضبابه / فيه الطريح وبيرق العز ما شيل

فان جاد حظك ما تمنيت جابه / والحظ ماتنفع عليه الدهاويل

يوم أقبلت صار الهدى والقدابه / ماكن اخو نورة شكا بالدهر ميل

ثور من الديرة على ما نوابه / بحزم وعزم ولا بغى الشيخ تدويل

صبح هل الروضة بشمشول لا به / بعوجا لأهلها بالهوايل تهاويل

واللي حضر كون الإمام اغتنى به / وخلا الأعادي بالقرايا هواشيل

طير السعد رب لمقادير جابه / بين الفراش وبين زين المعاميل

نايف جلس بالبيت وأضحى الضحا به / ولاجت من الله ما قووه المغاليل

وعجلان جاه اللي يدبر عقابه / عطب الضرايب يضرب الخرب تشهيل

شاله بمخلاب يشل الدما به / شاف الحرار وجول الصيد تجويل

اللي لقي في قصر جدة عثا به / علىَّ على تركي بضرب التناصيل

ونو تظهر من جنوب سحابه / من الشرق للغرب غدا كنه الليل

نشا من المنشا يثور الطها به / نخيله أثقل ما نشا بالمخاييل

تضحك مقاديمة وتبكي عقابة / غضب الرعد منه الخلايق مواجيل

كل الطيور تخايله والذيابه / في جرة الناشي تناحت مشاميل

ماشي من العارض على ما نوى به / يبغي الحريب اللي عليه الدواليل

حرق حسين بضربة من لهابه / بشهب تنازل مثل وصف المحاميل

مر القصيم وحرق اللي لقى به / ولا يعيش اللي تنوشه الهماليل

ويم البكيرية هواه انتحى به / يريد من ينطح وجيه المقابيل

والكل طالع يوم حضروا غيابه / يوم هداويه المناعير والخيل

بإيمان عيال تصالي لهابه / فبس المدافع فرقهم له تعاويل

صبة على روس السناعيس مابه / برعود صمع والسيوف المناصيل

وسار الأمير وصاحت بواري كلابه / وقفت على حمر العتاري غرابيل

اللي من العسكر ينجس ثيابه / والسالم اللي حدوره الجماميل

خلا البوادي ما نجمل حسابه / نضيع لا قمنا نعد المحاويل

وان جا الشتا تشكي النضا من عذابه / والقيظ له فوق الاشدة مقابيل

وان علق المخرف حويل زهابه / بشرب صرا من عقب شرب الشهاليل

ياصل حريبه لو بعيد ترابه / من غب كونه يشبعون المهازيل

سلام يا مرزى النضايا عذابه / كيف انت بامعطي المهار المشاويل

يانور نجد وسورها وأنت بابه / يا هاجد الحكام في مظلم الليل

عبد العزيز اللي براسه صلابة / تعيش يا شارب جميع الفناجيل

فنجال أبو متعب ترشفت مابه / ولد الإمام اللي عليه التماثيل

نيرة مخابيطه وسو التهابه / فوق الجنايز مثل وصف القناديل

دبو هل العوجا عليهم دبابة / من طاح في وجه المغلين ماشيل

غطى هل القطب الشمالي غبابه / وأمطر عليهم من حجر طير ابابيل

واللي كساه الله بعز كسابه / وكل يفصل من ردا العز تفصيل

والتاج كسيوا به سباع المهابة / فازوا به المقرن ولا فيه تشكيل

حر تعلا ماكره والتوى به / لولاب سردا ل الملوك السراديل

والشيخ أبو خالد مروي حرابه / زين المتلي ولسبايا مجاويل

بالسيف الارخم لاتولى نصابه / من فوق منتوب المهار المشاويل

يا شوق من كن الجواهر عذابه / اللي نهوده مثل وصف الفناجيل

غض عضيض تو زمة شبابه / عسلوج مقبول بدل وتدليل

لو دش مع فرق الظبا ما يهابه / متنفل بالزين ظبي الغراميل

كن القمر في لبته لا شعى به / ينسف على الامتان شقر عثاكيل

المجمعة قالوا يزيد البنا به / والضب تلقونه إلى حده السيل

نصيحة مادام بنصح ثابة / قبل العقاب والمحن والغرابيل

عن رايح مثل الدجا يندعى به / يشتب باركانه سواة المشاعيل

ينزي تحت ترقه الى آخر ربابه / جنايـــز بمعصفــــــرات الشناشيـــل

ماسركم من غرمكم في جوابه / ولا عف عنكم راع كود المصاويل

كل يشرع للمصاليخ بابه / كونوا مماليك لمرذي المراميل

وابن هويدي دونهم ينفدى به / راسه يحقن دما لجماعة إلى شيل

يا شيخ محدارك متى ينهق به / يم الحسا تقضون باقي الشواتيل

واتطهرون اللي عليهم جنابة / والجرب نطلاها بروس المثاميل

والدولة اللي بالحسا وش لها به / راس الصنم ما يصلح إلا بتنزيل

والسيف مكن بالعرابي ذبابه / ظلم بهم عدل وعدل بهم ميل

والسيف الأقصى صاير به رطابه / لاجا هواكم ذيل السيف تذييل

وصلاة ربي عد ناشي سحابه / ما هل وبل في حقوق المخاييل

على النبي الهاشمي والصحابة / اللي بهم سورة تبارك وتنزيل

النص منقول

قصيدة ملحمية

الله يرحم الشاعر

مشكور أخوي الفارس على النقل

	المشاركة الأصلية كتبت بواسطة أبو المثلّم

	قصيدة ملحمية الله يرحم الشاعر مشكور أخوي الفارس على النقل

حياك الله اخي ابو الملثم

شاكرلك مرورك

. لاهنت على النقل أخوي الفارس ..

بس والله جالس أدور هذيل لو انه جاب اسم هذيل بالقصيدة كان لا تقول.

ِِ

السلام عليكم ورحمة الله وبركاته

رحمه الله وغفر لنا وله ..
فعلا قصيدة قصيدة ملحمية تاريخية من الطراز الرفيع ..


وفقك الله أخي الفارس .
ولا تحرمنا إن كان لديك شعرا لمثل هؤلاء الرجال ..