اقدع عسى يقدع على راسك الذيب !! - ::{ مجالس قبيلة هذيل }:: موقع يهتم بتراث القبيلة ومفاخرها

02-04-2009, 08:17 AM

هذي قصه وقصيده قديمه قريتها في احد المنتديات وحبيت اشارك بها لطرافتها

يذكر ان شاعرين من كبار الشعراء في عصر قريب كانو مايدانون بعض وحياتهم اذا تقابلو كلها مجامل في مجامل

واحد اسمه (حشيش )واحد اسمه( سعود ا)سماء وهميه ؟

المهم مره طراء على حشيش يدبل كبد سعود قال في خاطره ابي اسير عليه ابي اغثه المهم حشيش سير على سعود طق الباب فتح له سعود وقاله جعل مهوب مرحبا اقلط .. قلط حشيش وتكى في المجلس سنونه من الاذن الى الاذن و سعود يامادخل وياما طلع يبيه يروح وخوينا تاكي ومبسوط حشيش جهز قصيده يوم دخل عليه سعود قال ..

جاك المسير مالقى منك ترحيـب
ولاجبت له قهوه ولامن قدوعـي
الظاهر انك ماتعـرف المواجيـب
اكيد طبعك يختلف عـن طبوعـي
حنا لاجانا الضيف ننفض له الجيب
ونجيب له من كل شكل ونوعـي

دخل سعود وهو يونس الهم من حشيش وقصيدته واخذ ساعه ورجع له بقدوع فيه تمرتين وحذفه قدامه وقال

اقدع ....

اقدع عسى يقدع على راسك الذيب
في خايع مابه من الناس دوعـي
متعطل في البر رجلـك تناجيـب
من ليله الجمعه ليـوم الربوعـي
ومروك ناس غايب عنهم الطيـب
وخلوك وحدك في مكان يروعـي
ثم جاك ذيب ماسنونـه بتركيـب
ذيب ولد ذيب وشرسـن قطوعـي
وسوا بك سوات على غير ترتيب
يجزع لها قلب الشجاع الفزوعـي

منقول ..

02-04-2009, 08:59 AM

جميلة جدا أختي

أضحك الله سنك

من طرايف القصص

و أظن ان القصه عبارة عن مزح في مزح

و الابيات مداعبة

و تري البدو يجي بينهم مزح الله لا يوريك

من هذا انتي رايحه

,
شكرا لك

02-04-2009, 09:21 AM

مشكور اخوي ( عز الــــرفيق )

وعساك من الضاحكين دوووم انشاء الله

شكرا لك

02-04-2009, 10:58 AM

ههههههههههههههههههههههههه ههههههههههههه

حلوة غرنوقة

الله لايجعلنا من قوم حشيش وسعود وارد عليهم واقول

ياشينها لن جات بين الاصاحيب=يامشين المنزال بعد الطلوعي

اما يخاوينا عطيب المضاريب= ولا الردي ماني لفقده جزوعي

02-04-2009, 01:31 PM


	حنا لاجانا الضيف ننفض له الجيب

وهم حيلتهم شي منول ينفضونه

مما لاشك فيه انها اعجبتني واضحكتني وداعبة انسجة بطني

يعطيكي العافيه على مانقلتي لنا

02-04-2009, 04:32 PM

تسلم اخوي {مطرفي الجوف}

امين اله لا يجعلنا من قوم حشيش وسعود

ومشكور على ردك

مسرورك شرفني

02-04-2009, 04:35 PM

مشكور اخوي ( تيك اوف )

واهم شي الواحد يسمع هالسوالف ويتونس ويضحك

ويطرد عنه هموم الدنيا

تسلم

02-04-2009, 06:14 PM

يسلموووو ---> قد تم مداعبة الانسجة من خلال موضوعك المصون

ولاااا اخفيك انني احتاج الى عصير برتقال او عصير توت او اي عصير يساعد في تجميع ما قد اتلف من انسجة او روابط متصلة من جهة الشواكل الى القصبة الهوائية ..

اتمنا ان تستمري معنا في ماهوااا موفيد لنا ولكِ << شكرا لكِ

سكني << يربط حزام الامان