محمد المسعودي وصياف الحريي

السلام عليكم ورحمة الله وبركاته
..
صيـاف الحربي



رحبوا رحبوا بضيوفكم ياهذيـل
البيوت الكـرام تفـك بيبانهـا
لا تقوم القيامه قبل وقت الرحيل
ليله نصوم ونصلي على شانها




محمد المسعودي



نعرف اليوم يوم ونعرف الليل ليل
ماتقـوم البيـوت الا بعمدانـهـا
والله انك عميلي ماش غيرك عميل
راح حصنيها ويجيـك سرحانهـا




صيـاف الحربـي



بعد بكره تبا تشتال حمل ثقيـل
اسمع السالفه واجيب برهانهـا
كيف اعاملك وانته ماترد الجميل
وان ذبحت الذبيحه تاكل لسانها




محمـد المسعـودي



الوكيل الله المعبود منتـه وكيـل
الزمك بالطلب واهل الطلب عانها
والفعل يذكرونه جيل من بعد جيل
والامانه سليم العقـل ماخانهـا




صيـاف الحربـي



بايعين البضايع ماعليهم كفيـل
ياخذون الثمن وهي في دكانهـا
وانت مريتنا طرقي وعابر سبيل
وان بدا راسها ماشفت كرعانها




محمـد المسعـودي



دلة الهيـل تسبـق دلـة الزنجبيـل
نارهـا والعـه مـاعـج دخانـهـا
وانت تدري وتعلم ما اخلق المستحيل
نتـرك هزالهـا ونذكـي سمانـهـا




صياف الحربي



جعل طيرٍ طلع راس الشفا مايميـل
لين كل الطيور تكف جنحـا نهـا
وش بقى لك بعد ولعت راس الفتيل
مابقـى غيـر حبتهـا ونيشانهـا




محمد المسعودي



عزوتي يحتمون ويسلمون الدخيـل
معركه حاميـه وهذيـل فرسانهـا
ودي ان الرعد والبرق يقفاه سيـل
تشرب الشجرة اللي يبست أغصانها



صياف الحربي



كان صادق على ماقلت هات الدليل
من يخاوي هذيل يغنـي الحانهـا
وانت مدري تبى شقران ولا شعيل
كلهـا زمـل توعدنـي بنيبانهـا




محمد المسعـودي



طول الله شليلك ياطويل الشليـل
اخوة المسلمين تساند اخوانهـا
نجمك الجدي ولا سعد ولا سهيل
عيش في كونها واخضع لديوانها




..
دمتم بود

صح لسان الشاعر محمد المسعودي والله يرحم الشاعر صياف الحربي

يعطيك العافيه يا ابو يزيد وننتظر جديدك

السلام عليكم ورحمة الله وبركاته.
ابو يزيد ..
الله يوفقك ويكرمك تفاعلك وجهدك كلمة شكر قليلة فيه ..

أيو والله نبي محاورات من ها النوع تعطي زخم ومتابعة كبيرة ..
رحم الله صياف الحربي وغفر له ..شاعر خصومه قليل كلمة حق .
وبارك لنا بالشاعر الكبير محمد المسعودي ..

وفقك الله أخوي أبو يزيد ..

اشكركم على المرور ودام التواصل
وبشر ياخ مشعل بكل ماهو قيم ومفيد من اجل منتدانا الغالي ومن اجلكم انتم

محاوره جزله بين علمين

نقل طيب

تحياتي .

سلمت يداك ياأبو يزيد على نقل هذه المحاورة
بين فحلين من فطاحلة شعراء القلطة رحمهما الله
جميعاً .
مشكور والله يعطيك العافية .