كناني يمدح هذيل بني عمه فيقول

هذه قصيدة كتبتها مدحا في بني عمنا من هذيل و هم أهل للمدح و أكثر أتمنى أن تنال استحسانكم :

سـلام مني و أنـا لي كنـانـة جــد

و قريش ابن عمي و فينا راجح الزود

سلام ما بعـده سوى خير مقصـد

مـدح الكـرام اللـي لهـم مدحـي أقــود

يا هذيل يا قوم الأمجاد و السؤدد

مـن هـو يشاطـركم عظيمـات الوعود

أنتم فخرنا لا نـوى الرجـل يتسيّـد

و أنــتـم سندنـا لا تــنـهّـدنـا ســنـود

يا هذيل يا ربعي لنا فزعاتكم تشهد

مــا قـد طـلـبـناكـم و لاقـيـنا صـدود

منكم هل الطولات و الفخر و المجد

درع الـحـجــاز و عــسـكـر البـارود

نيـران وسط الحـرب شهـب تصّيـد

كــل من يعـادي او يناقـض للعهـود

لا بــد مـا يحتـار فكــري و يتـردد

في مـدح غير هذيل و المدح مشهود

لأنـهـا هذيـل ووحـدها هذيـل تنعـد

مـنـها الشعر يـخـرج و اليها يعـود

منكـم أبـو ذويـب الشاعـر المنشـد

و منكم صحابي الرسول ابن مسعود

فـي مـدحـكـم كل المخاليـق تتــودد

لـكـن انا في مدحـكم تابع و معـدود

من هو يفاخرني بربعي مدركة تنهد

حيلتـه قـدّام فخري وما عليّ يـزود

هذيـل عمـي و ربـعي لـمـدركـة ترتّـد

و جــدّي كنـانـة و ذكـرنـا مـحـمـود

حنـا بني شعبة و يشـهـد لنـا الضّــد

بـأنّـا ليـا حميـت لنا كنّـا لها اســود

مـن هـو يعاديـنـا ويجـمـع لنا الجـنـد

يصبح صحيح و يمسي الليل ملحود

و لا انسى بني عمي بمخشوش والحد

و بلعير و يعلى و بني ليث الجدود

هذا كـلام مختصـر بالحيــل متـقـصّـد

لا بد مـا أمدح هذيل اليوم و اجـود

و بختامـها صـلّـوا على اللـي تـعــدّد

فـي مدحـه أجمــل مفـردات الجـود

الـيـعـربي الهـاشـمـي النبـي أحـمـد

سيّـد بنـي عدنـان ماهو بمسيـود

صـلاة ربـي عـليه عـداد مـا ردد الـ

ـعبد من ذكر و صيـامٍ مع سجـود

و سلامتكم

القائل / عبدالرحمن العقاب الجبيري من بني شعبة من كنانة

ونعم ياولد العم قصيده جزله

وعليكم السلام ورحمة الله وبركاته


صح لسانك ياعبدالرحمن الكناني

واشكرك على هذي القصيده الجزله

وعليكم السلام ورحمة الله وبركاته


صح لسانك وأعتلى شانك ياعبد الرحمن

قصيده جزله معنى ومبنى ، وبيض الله وجهك يالغالي لا عدمناك

تقبل ودي قبل ردي ،،،،

صح لسانك يالعقاب

ماعلاكم زود

واشكرك جزيل الشكر على صادق الشعور

ونعم فيك وفي قبيلتك

وأهلا وسهلاً بك أخاً عزيزاً

	المشاركة الأصلية كتبت بواسطة العنيد القاهر

	ونعم ياولد العم قصيده جزله

ما عليك زود يا ولد العم

	المشاركة الأصلية كتبت بواسطة بن عادي

	وعليكم السلام ورحمة الله وبركاته صح لسانك ياعبدالرحمن الكناني واشكرك على هذي القصيده الجزله

صح بدنك يا ابن عادي و ما سوينا إلا الواجب و أقل

	المشاركة الأصلية كتبت بواسطة صالح الكعبي

	وعليكم السلام ورحمة الله وبركاته صح لسانك وأعتلى شانك ياعبد الرحمن قصيده جزله معنى ومبنى ، وبيض الله وجهك يالغالي لا عدمناك تقبل ودي قبل ردي ،،،،

حياك الله يا صالح و صح بدنك

	المشاركة الأصلية كتبت بواسطة أبو رديد

	صح لسانك يالعقاب ماعلاكم زود واشكرك جزيل الشكر على صادق الشعور ونعم فيك وفي قبيلتك وأهلا وسهلاً بك أخاً عزيزاً

العفو يالغالي و ما على هذيل زود و أنا معتبر نفسي بمجلسي دامي في مجلس هذيل

مشكورين جميع عالردود

بيض الله وجهك ، ماعليك زود يالكناني ، وحياك الله في هالمنتدى .

تحياتي .

السلام عليكم ورحمة الله وبركاته

حياك الله أخي الكناني المضري

أنعم وأكرم

وصح لسانك، مشاعر ليست غريبة على النبلاء، ومن تحركهم دمائهم النقية... بارك الله فيك.


القصيدة جميلة في مجملها، ولكنها تفتقر للوزن الموحــد، فهنالك ابيات على وزن، وأخرى على وزنا آخر.

أمل منك مراجعتها سريعا، لا أن مجلس الشعر الشعبي، من قوانينه، نقل أي قصيدة يختل وزنها، أو قوافيها، لمجلس المنقولات والمحاولات....

سأعطيك بعض الأمثله:

تقول:

سـلام مني و أنـا لي كنـانـة جــد
و قريش ابن عمي و فينا راجح الزود

البيت الأول ، يحتاج تعديل في الوزن،،في صدره ، وعجزه،، زيادة

سلام ما بعـده سوى خير مقصـد
مـدح الكـرام اللـي لهـم مدحـي أقــود

وهذا مثال ، لبيت موزون


ويأتي بعد هذا البيت، كثير من الأبيات التي تفتقر الوزن....أمل مراجعتها..




وصح لسانك مرة أخرى، ولاهنت

صح لسانك ويعطيكم العافيه

هذه قصيدة كتبتها مدحا في بني عمنا من هذيل و هم أهل للمدح و أكثر أتمنى أن تنال استحسانكم :

سـلام مني و أنـا لي كنـانـة جــد

و قريش ابن عمي و فينا راجح الزود

أخي الكناني سأبين الكسور ،، وأعطيك أمثلة،، للوزن الصحيح،، أمثلة فقط، ليظهر لك الخلل...


هنا عندك كسر في المطلع... ولو قلت:

سلام وكنانة لنا فالنسب جــد...... وقريش ابن عمي لزم راجح الزود

سلام ما بعـده سوى خير مقصـد

مـدح الكـرام اللـي لهـم مدحـي أقــود

هنا بيت سليــم

يا هذيل يا قوم الأمجاد و السؤدد

مـن هـو يشاطـركم عظيمـات الوعود

وهنا ... كسر... فالصدر والعجزر ولو قلت:

يا هذيل يالقوم الأماجد ويانّــد........من هو يشاطركم عظيمات ووعود

أنتم فخرنا لا نـوى الرجـل يتسيّـد

و أنــتـم سندنـا لا تــنـهّـدنـا ســنـود

وهنا يتسيد،،، كسرت الصدر.. ولو قلت

أنتم فخرنا لا نوى الرجل يستــد..........وأنتم سندنا لاغــدا الماقف سنــود

يا هذيل يا ربعي لنا فزعاتكم تشهد

مــا قـد طـلـبـناكـم و لاقـيـنا صـدود

ياهذيل ياربعي وفزعـات تشــهد.......ماقد طلبناكم وجابوتم صـدود.........

مع إن العجز عندك يمشي،، ماقد طلبناكم .....إذا نطقت صدود بهمزة..ولاقينا إصدود...وكلني أبين لك.. لتتذوق الوزن بسلاسه.

منكم هل الطولات و الفخر و المجد

درع الـحـجــاز و عــسـكـر البـارود

الصدر ممتــاز.......... والعجز لو قلت...درع الحجاز وعسكر لكل بــارود.......... ليستقيم الوزن.

نيـران وسط الحـرب شهـب تصّيـد

كــل من يعـادي او يناقـض للعهـود

ممتاز.. ماعليه ملاحظــة.. فالوزن.

لا بــد مـا يحتـار فكــري و يتـردد

في مـدح غير هذيل و المدح مشهود

هنا الواو والياء زائدتين.......... لابد مايتحار فكــر ويتردد........أما العجز فسليــم..

لأنـهـا هذيـل ووحـدها هذيـل تنعـد

مـنـها الشعر يـخـرج و اليها يعـود

العجز... لو قلت... منها الشعر يخرج فضاءات ويعــود

منكـم أبـو ذويـب الشاعـر المنشـد

و منكم صحابي الرسول ابن مسعود

هنا خلل.. ولو قلت.... منك أبو ذؤيب شاعر ومنشــد........ العجز سليم.

فـي مـدحـكـم كل المخاليـق تتــودد

لـكـن انا في مدحـكم تابع و معـدود

هنا خلل..... في مدحكم كل الخلايق تودد.........لكن أنا في مدحكم دوم معـدود

من هو يفاخرني بربعي مدركة تنهد

حيلتـه قـدّام فخري وما عليّ يـزود

هنا خلل..... ولو قلت

منهو يفاخر مدركة ماتنهــد........ وش حيلته فخري وأنا ماعلي زود.

هذيـل عمـي و ربـعي لـمـدركـة ترتّـد

و جــدّي كنـانـة و ذكـرنـا مـحـمـود

أيضا خلل.... ولو قلت

هذيل عمي ومدركة ربـع ترتــد......لجدي كنانه وذكرنا ذكـر محمــود

حنـا بني شعبة و يشـهـد لنـا الضّــد

بـأنّـا ليـا حميـت لنا كنّـا لها اســود

الصدر سليــم... والعجز لو قلت:

بأنا ليا حميت لنا هيبة اســود

مـن هـو يعاديـنـا ويجـمـع لنا الجـنـد

يصبح صحيح و يمسي الليل ملحود

بيــت سليـــم.

و لا انسى بني عمي بمخشوش والحد

و بلعير و يعلى و بني ليث الجدود

الصدر سليم... والعجز ..لوقلت:

وبلعير ويعلى وبني ليث أجــدود..... طبعا هنا تحتاج هاء تنطق غير مكتوبه.. .. مقدر أغير الترتيب.. وهذا افضل ماخرجت به.

هذا كـلام مختصـر بالحيــل متـقـصّـد

لا بد مـا أمدح هذيل اليوم و اجـود

خلل...ولو قلت:

هذا الكلام المختصر دام لي قصــد........... أمدح هذيل وبالشعر لجلها أجــود

و بختامـها صـلّـوا على اللـي تـعــدّد

فـي مدحـه أجمــل مفـردات الجـود

الصدر سليم..... العجز..لو قلت:

في مدحه أجمل مفردات اللغة تجود

الـيـعـربي الهـاشـمـي النبـي أحـمـد

سيّـد بنـي عدنـان ماهو بمسيـود

شــطر سليـــم

صـلاة ربـي عـليه عـداد مـا ردد الـ

ـعبد من ذكر و صيـامٍ مع سجـود

هنا خلل.. ولو قلت:

صلاة ربي عد ما العبد ردد.......... ذكر وصيام ودعوة ركوع وسجود

و سلامتكم

القائل / عبدالرحمن العقاب الجبيري من بني شعبة من كنانة

أخي الكناني مرة اخرى أعود ، ولطلبك، البيان والتوضيح، هذا ما أراه أن شخصيا ، فإن اصبت فمن الله ، وإن أخطأت فمن نفسي والشيطان..

نرحب بك هنا كامل الترحيب، وسعيدين جدا بهذا التواصل المبهج، وهذه العقلية المتفتحة، فبارك الله فيك، وكثر من أمثالك.

ينقل المــوضوع لقسم المحاولات والمنقــولات...

أرق التحايا