معلومات غير معروفة عن البنوك .. يجهلها ( كثير من العملاء ) ..!!! - ::{ مجالس قبيلة هذيل }:: موقع يهتم بتراث القبيلة ومفاخرها

07-22-2010, 06:05 PM

1

كم مرة رحت للبنك عشان تفتح حساب ، وقال لك الموظف / ما أقدر افتح لك حساب إلا لازم تحط مبلغ معين ؟! وبعضهم يقولك أي مبلغ تقدر عليه ..!!

خذ النصيحة هذي مني ..
إذا قالك الموظف مثل ذا الكلام .. أضحك في وجه .. وخذ الامر ببساطة ، وقل له .. ممكن اعرف اسمك .. إذا كان مو حاط اسمه ، والا فالمفترض يكون الموظف اسمه مكتوب او حاط بطاقة على صدره فيها معلوماته .

إذا قال ليه ؟!
قل بس ابغاه ، وإذا انت ما تبغى تقول لي اسمك .. برضوا أنت حر .. وبرضوا ابتسم في وجهه ..!! عادة اذا طلبت اسمه يعرف الموظف انك راح تشتكيه وراح يتدارك الموضوع وراح يقولك اوكي .. راح يصرف الموضوع بأي طريقة وراح يفتح لك بأي طريقة بدون اي مبلغ .

إذا مسكت مع الموظف عناد وبدأ يسوق عليك العبط ... وأصر على المبلغ لفتح الحساب ..

أطلع لمدير الفرع ، وبلغه باللي حصل من الموظف ، وقله بكل بساطة انا جاي افتح حساب والموظف طلب مني مبلغ عشان افتح الحساب ..!!

وشف المدير .. وش راح يسوي في الموظف ..!!

بس لحظة ..؟!
ممكن يكون المدير صديق للموظف ولا يبغى يحرجه وممكن يتعاون مع الموظف .؟!
اذا وقف المدير مع الموظف ... برضوا اضحك .. وابتسم ... وخذ الامور ببساطة ...!!
لكن قبل ما تطلع من مكتب المدير قل ذا الجملة .. وشف كيف تكون ردة فعل المدير
قل له / اوكي ، إذا انتم مصرين على أني افتح حساب ولازم احط مبلغ ..
انا راح اتصل الآن على إدارة البنك ، وراح أكلم مؤسسة النقد .. بالكلام اللي قلته لي أنت و موظفك ...
وقتها ... شف مدير الفرع وش راح يسوي ..!!
راح يتغير لون وجهه ... ويختبص ... ويرتبك ... وراح يترجاك ان الموضوع ما يكبر ...!! لأن مدير الفرع اكثر واحد يعرف وش معنى العميل يشتكي على ذا الموضوع ( بالذات ) وهو موضوع فتح العميل لحساب ب مبلغ مالي ..!!

النظام يقول ، واللي موظفين البنك واحد واحد يعرفونه ، وهو من ( ابجديات العمل المصرفي ) ...
إن ( شروط فتح الحساب للسعوديين البالغين : هي البطاقة الشخصية فقط لا غير ، و يمنع منعاً باتاً طلب أي مبالغ مادية من العميل إذا اراد فتح حساب ) .
اذا اشتكي العميل لمؤسسة النقد ، ممكن يغرم البنك بمبلغ كبير ، وإذا اشتكى العميل لإدارة البنك عن طريق الرقم المجاني شكاوى العملاء ، راح تلعن الإدارة ابو خامس مدير الفرع والموظف ، والموضوع ابداً مافيه اي تساهل من اي ادارة بنك . لكن اكثر الناس ... ما يعرفون .

...........................

2

إذا رحت تلغي الفيزا ..
لا تكتفي بـــ الإجراء اللي يسويه الموظف .... وهي انه يأخذ البطاقة ويقصها او يخرمها قدامك ... وتوقع على نموذج الغاء البطاقة ...
بل .. يجب أن تطلب ( مخالصة نهائية ) من البنك ..
وهذي عادة تتأخر شوي لأنها تصدر من ( إدارة البنك ) مش من ( الفرع ) ... لكن مو مشكلة ..
لأنها في احيان كثيرة ... النموذج هذا اللي تعبية في ( الفرع ) ، غير كاف لإلغاء البطاقة ، وراح تكتشف بعد شهور إن البطاقة لازالت محسوبة عليك .. ويمكن يصدرون لك بطاقة جديدة ( مجددة ) بدون علمك ..!!
المخالصة تضمن عدم احتساب أي مبالغ على البطاقة وتضمن عدم تجديد البنك للبطاقة .

................

3

البرامج اللي تقدمها بعض البنوك ..
برامج ... للزواج .. برامج للابناء ... برامج أدخارية ومستقبليه و ما ادري إيش .. !!!
مهما حاول الموظف انه يقنعك فيها ... طنش ...!!
كلام فاضي ... والفائدة من ورائها ... شبه معدومة .. إن ما خسرت فيها .. ما راح يجيك الا راس مالك ... وإذا جاك ربح .. فهذا الربح .. مايسوى .. انك تتعلق مع البنك ... لسنوات وهم يخصمون من راتبك ..!! العملية كلها ببساطة ( هي ربط العميل مع رقبته ليكون اسير للبنك ( عملية تسويقيه بحته ) ، والفائدة الكبرى للبنك .
لكن الموظف مجبور انه يسوقها عليك كعميل ... لأنها محسوبة عليه ، فالتقييم الربع سنوي للموظف واللي ممكن تساعده في الترقية غير البونس ... فيه جزء كبير منه العمليات التسويقية اللي يقوم فيها الموظف ..!!!
إذا ما حقق الأهداف المطلوبة منه .. مثل تسويق هالبرامج او بطاقات الائتمان او القروض الشخصية ..او العقارية ... راح ينعدم في التقييم .. وبالتالي يأثر هالشيء على ترقياته ... وهذي من لعانة ادارة البنك اللي تجبر الموظفين على الكذب على العملاء وتزيين هالبرامج الخربوطية وزحلقتها على العملاء .

ودي ..

07-22-2010, 07:38 PM

يا كثر ضحايا بطاقات الائتمان !!
::
مشكورة يالغلا

07-22-2010, 08:23 PM

العفو
اسعدني مرورك
ودي ..

07-22-2010, 10:34 PM

كلام جميل اختنا دكتورة هذيل /

كمان ابي اسئل ليش البنك يخصم من رصيد العميل 10 ريال عن كل شهر اذا كان رصيده 1000 ريال واقل بأي حق اشوفها في كشف الحساب يأخذونها بدون اذن هل هي بالعقد عندما تفتح الحساب اولا ممكن تفتينا نها /

اخوكي موفق

07-23-2010, 12:13 AM

والله ما اقدر افتيك في شيء >> لأن الموضوع منقول
شاكرة لك مرورك
ودي ..

07-24-2010, 01:11 PM

الله المستعان البنوك شغلهم شغل لصاصة

موفق

07-25-2010, 03:12 PM


	المشاركة الأصلية كتبت بواسطة موفق


	كلام جميل اختنا دكتورة هذيل / كمان ابي اسئل ليش البنك يخصم من رصيد العميل 10 ريال عن كل شهر اذا كان رصيده 1000 ريال واقل بأي حق اشوفها في كشف الحساب يأخذونها بدون اذن هل هي بالعقد عندما تفتح الحساب اولا ممكن تفتينا نها / اخوكي موفق

هلآ أخوي موفق

أعتقد خصم 10 ريال من كل شهر أعتقد أنها مقابل خدمتك

يعطيـك العآفيه دكتورة هذيل .

07-26-2010, 01:45 AM

لكن عندما يكون رصيدك اكثر من خمسة آلآف ريال لايخصم من حسابك شيئ 0 أ يخدموك بلاش كيف هذه التفرقة يخصم علي الفقير ويعفي الغني كيف نفسرها من اي باب قد يقول قائل علشان البنك يستفيذ من الغني ويشغل اموال الغني وهنا يكون الربا العائد للبنك وبذا نحن ساعدنا البنك علي الاستمرار وشاركناه في الربا الله المستعان 0 طيب فين نودي فلوسنا وكيف نأمن عليها بمنازلنا اذا خرجنا نتمشي او سافرنا 0 الحل هو ايجاد بنوك اسلامية لاتستخدم اموالنا بالربا فمتي تفتحها الدولة ولاشك انها محاربة من البنوك الربوية الله المستعان ومتي يبدأ دور علماء المسلمين بدراسة انشاء البنوك الاسلامية وتفعيلها وتحديد عملها وكيف تستتمراموال هذه البنوك وما مصير الارباح حيث توزع علي الفقراء بعد حسم المصاريف هذا تصوري والله ولي التوفيق نقول يارب انصرنا علي البنوك الربوية وعافينا من الربا وساعدنا علي التخلص من الربا لآن الله سبحانه وتعالي حذرنا من الربا وسوف يحاربنا الله (قال تعالي فأذنوا بحرب من الله ويبدوا ان الله بدأ بحرب ضد الغرب والبنوك الربوية فأ لغرب الان يدرسون النظام الاسلامية المالي هكذا سمعت ولكن يريدون صياغته علي انه نظام اوربي جديد 0

موفق

07-28-2010, 10:54 PM

معلومه رائعه بس بعد أيه عرفتها بعد مامشوها على حسبي الله ونعم الوكيل عليهم
شكرررررآ......