لــــحـظة لقاء

أخواني الأعزاء:


السلام عليكم ورحمة الله وبركاته



أتمنى أن يحوز هذا النص المتواضع على إستحسانكم


جرح الغياب اللي برى حال هالبيد
أثر وزاد بساكن البيد لوعه

أكثر منه فقد الأمل والتصاديد
حتى نست وشلون شكله ونوعه

جاها على غره بليا مواعيد
ضيفٍ يضيّف والكرم من طبوعه

ناشي من القبله وللبرق تعقيد
من شاف حالتها تذارف دموعه

لحظة لقا وارهت جميع المواريد
واروى عروق اللي تيابس فروعه

لحظة فرح واشد من فرحة العيد
أقل وصف الوصف لاقلت روعه

من بعد طاح الخير مابه مقاعيد
وجدي على خوة رجالٍ بتوعه

ساع استوى المقناص ومطارد الصيد
في تختخٍ والسيل باقي نقوعه

في موترٍ بالكاش ماجا تقاصيد
جيبٍ من اليابان جمرك طلوعه

يزمي بنا ويويق مع عالي الحيد
في قنةٍ والبدر يجهر سطوعه

جلسه بها معك القروم الصناديد
تشرح لها صدرٍ تضايق ضلوعه

شفت الوصل فالبيد وشلون بيفيد
العشب يكسيها من أول سبوعه

واما الغياب اللي يزيد التناهيد
الله والا طاري يجي في رجوعه



وسلااااااااااامتكم