محاورة زياد السعيدي و عابد السعيدي

السلام عليكم ورحمة الله وبركاته
أنقل بين أيديكم هذه المحاورة التي جرت بيني وبين الشاعر / زياد مطلق السعيدي
في حفل معايدة الشيخ / مطلق بن سعد السعيدي ، أتمنى أن تحوز على رضاكم مع
العلم بأنها تحمل طرق جديد على الساحة الشعبية :

يقول / زياد السعيدي
العيد روّح وعابد ما درى كيف راح *** حالته حاله ونا ماني برب السماء
من منطلق خوّتي معكم وحب الصلاح *** باعث رساله ونا ماني برب السماء

عابد السعيدي
العيد بوجودكم صحيح ماهو مزاح *** صاحبك قاله ونا ماني برب السماء
يا جعل حالة خويك ما تزيد الجراح *** مرتاح باله ونا ماني برب السماء

زياد السعيدي
العيد لا شفتكم في نعمة.ن. ورتياح *** كبّ النذاله ونا ماني برب السماء
واقول لك كان شفتك سدّ خافيك باح *** هذي خباله ونا ماني برب السماء

عابد السعيدي
السمح يا صاحبي لازم يحب السماح *** ويطيب فاله ونا ماني برب السماء
ما باح سدّي ولابس فالملاقا وشاح *** وبوك ساله ونا ماني برب السماء

زياد السعيدي
في وجه صاحبك قمت توجهون السلاح *** ماهي رجاله ونا ماني برب السماء
الذيب لامن عدا تراك صيدة مراح *** يعني حلاله ونا ماني برب السماء

عابد السعيدي
إن كان ما يستحي ماهو معيّن فلاح *** لو جاب خاله ونا ماني برب السماء
الذيب يلقا الثميدي لا نزل فالبراح *** الموت ناله ونا ماني برب السماء

زياد السعيدي
قيفك خسارة من اللي في ذراه استراح *** قاصف ضلاله ونا ماني برب السماء
الذيب ياكل علامك ما سمعت الصياح *** عندك غياله ونا ماني برب السماء

عابد السعيدي
ياللي تربّح ورى اللي ما يجيب الرباح *** خلّك قباله ونا ماني برب السماء
صاحبك نوّخ جمال القوم وشعيل طاح *** زوّد عقاله ونا ماني برب السماء

زياد السعيدي
ما ينكب الشعب ويخليه ماله كفاح *** غير العماله ونا ماني برب السماء
عابد ليا جاء بيشرب من زلالٍ قراح *** تقصر حباله ونا ماني برب السماء

عابد السعيدي
الشعب ما ينكبه في ليل والا صباح *** غير الهباله ونا ماني برب السماء
ازياد لا جاء نهار.ن. فيه زرق الرماح *** تِكفى دلاله ونا ماني برب السماء

زياد السعيدي
عقلك مثل ريشة ٍ راحت مراح الرياح *** مالي وماله ونا ماني برب السماء
كلٍ يرى الناس بطبوعه يابو برق لاح *** شفنا خياله ونا ماني برب السماء

عابد السعيدي
عقلي وزن له جبل وانته تجر النياح *** ما عقل طاله ونا ماني برب السماء
من راح عنّا نقول إله المراح المراح *** نلقى بداله ونا ماني برب السماء

زياد السعيدي
رفرف علمنا السعيدي مثل رفّ الجناح *** وزياد شاله ونا ماني برب السماء
ما روح عنكم ونا لجروح ربعي لقاح *** عود وعياله ونا ماني برب السماء

عابد السعيدي
إن كان شلته لك الله تستحق النجاح *** صاحب جلاله ونا ماني برب السماء
الجيّد اللي بناها فوق صح وصحاح *** يوفي كياله ونا ماني برب السماء


وسلامة الجميع