صادق الفعل والقول

صـــادق الفعــــل والقــــول

انـا صـديقي صادق الفعـل والقول ,,,,,, وليـا نطــق لـــه كلمــةً يحــترمها

له منهــجً واحـد ولاهـوب مجهـول ,,,,, حـقيقتــه عــن كل شــكً خصمها

رجلً عـن البوقـات والغدر مكفول ,,,,,, وزلــة رفيقـه يـــوم تاتي هضمها

يصبرعلى عجفــاه لو جــاه بميول ,,,,,,, قبيلةً مــن شــان واحـد حشــمها

وليا نخيته صـار درعً عن الهـــول ,,,,, صعـب الشدايد عــن رفيقه لطمها

مثل البليهي يبرك لكايـد احمول ,,,,,,, يصبـر على جـــور الليـالي والمهـا

له مبدءً واحد كما السيف مسلول ,,,,,, وعـوايـده بالطيب كلــــن فهمـها

قـــرمً مضيفـــه للمناعيـر مـدهول ,,,,,, وليـا لفـاه الضيف قلــط شـحمها

هذاك نعمً به على الطاق مدبول ,,,,,,,, وكلن يشـيد ابخوته واحترمـــها

واللي مثل شرواه بالنعم مشمول ,,,,,, ومـدحه يجي بلسان ساير أممها

واليوم هــذا النوع نــادر ومقـــلول ,,,, قـلٌ ؟ الـذي يحفظ مبـادي اشيٌمها

أما الذي عن ما هرج غير مسئول ,,,,,, بالكذب كل الســــالفه يختـــتمها

تلقى اعلومه للأسف دون محصول ,,,,,,, نــوبً يســنعها ونوبً وشـمها

متــذبذبً مــابيـن واضــح ومجهـول ,,,,,,, قضاٌ حياتــه داجً فـي وهمـها

وقت الرخا يعجبك بلسان معسول ,,,,,,, بالهـرج ولاٌ غيـر نفسك صدمها

باللازمـــه قلبه عــن الخير مقفـول ,,,,,, ولا يعترف بالغانمه من عـدمها

وليا وعد يخلف عسى زوله ايزول ,,,,,,, صـرح الصداقه ما بناها هدمها

يفـــرح ليامــن جـاله العلــم منقول ,,,,,, السـالفه وان جاتـله مـا كتمــها

يبثـــها للناس بالعــرض والطـــــول ,,,,, ونار الفتــن كوبان قام وشعها

تلقاه باعراض المسلمين مشغول ,,,,,,, نمـام ؟ والغيٌــــاب ياكــل لحمـها

وليا نشــدته ينفي القـــول بالقــول ,,,,,, ذي خطته فــي كل مـره رسمها

ياتي ابعـــذرً غيــر مقنـــع ومقبــول ,,,,,, ويقسم بــذات اللي امشيٌد حرمها

ويالله عسى شرواه بالنار مغلول ,,,,,,, بوسـط جحيم يفــوح حتــى رضمها

يعرض مــع الفجٌــار صاغر ومذلول ,,,,,,,, فـي سـاعةً ما يفيد فيـها ندمها

وش ينبغي باللي عن الطيب مشلول ,,,,,, وبـادت اعضوده لين كلن شتمها

ماحــدً يبي طــرياه لــو حــل به قول ,,,,,, عفنن واساليب العـرب مـا فهمها

وابي اختصر والشرح وان طال مملول ,,,, ولاٌ تـــرا شــعري يغطــي قممها

محمـد بن سـوعان الربيٌـع

طير الشمال صح لسانك
قصيدة رائعة ومعبرة عن نفسها

صح لسانك ياطير الشمال

الله الله

نعم هذا الصديق الي ينومس

صح لسااانك وبيض الله وجهك

قصيده جزله من شاعر جزل

اخواني الاعزاء

احييكم بتحية الاسلام

السلام عليكم ورحمة الله وبركاته

اشكركم على الحضور المميز والرائع دائماً

تقبلوا فائق تقديري

مبدع وصح لسانك
لله درك

صح لسانك

قصيده رائعه تشكر عليها

صح لسان القائل وبيض الله وجه الناقل

قصيدة معبرة وفيها حكم عظيمة ووصف رائع مرغب فيه


شكرا أخوي طير الشمال

بارك الله فيك ياسلطان يالسويهري

اطربني حضورك ومرورك
واستمتعت بردك الرائع والطيب

ما عليك زود ولا هنت يالغالي

صح لسان قائلها قصيده راااااااااااااااااااااااا ااائعه


مدري هي من انتقائك ولا القصيده لك ؟

شكراً بن عادي

القصيده لي وبلا فخر ولا غرور

وانا احمد الله على ان جعلها تجوز لكم

وكل ما نحاول هو ارضاء ذائقتكم يابن عادي

تقبل فائق تقدري على اطرائك ومرورك الطيب

اخوك / محمد بن سوعان الربيٌع

طير الشمال / ياطير شلوى

	المشاركة الأصلية كتبت بواسطة طير الشمال

	شكراً بن عادي القصيده لي وبلا فخر ولا غرور وانا احمد الله على ان جعلها تجوز لكم وكل ما نحاول هو ارضاء ذائقتكم يابن عادي تقبل فائق تقدري على اطرائك ومرورك الطيب اخوك / محمد بن سوعان الربيٌع طير الشمال / ياطير شلوى

مرحبا بك يامحمد بن سوعان


يشرفنا تواجدك وحضورك مع اخوانك والله يحييك

مرحبا مليون ولا يكفون يابن عـــــادي

ما عليكم زود واتشرف ان اكون بينكم

تقبل فائق تقديري وجل احترامي

اخوك / محمد بن ربيٌع

جزله يابن صوعان ,,,صح الله لسانك