معاتبه صديق

السلام عليكم و رحمة الله و بركاته
اخواني الاعزاء .. اقدم لكم هذه القصيدة و ردها من الشاعر بندر الهذلي .
وكانت بسبب القطاعه عنا لعدة شهور .

[poem=font=",6,,normal,normal" bkcolor="transparent" bkimage="" border="none,4," type=2 line=0 align=center use=ex num="0,black""]
يا صاحبي طولت غيبتك بالحيل = تالي الليالي سرت مشغول عنا
معاد من يمك تجينا مراسيل = مدري وش اللي سار ياخو مهنا
دنياك ما تخلص من الحط و الشيل = ولا هي بجاية لك على ما تمنا
سود الليالي مقفيات و مقابيل = حتى بنص اعمارنا روحتنا
يا ما خذت في حبالها من حلاحيل = و حنا على الساقه ندرج ضعنا
لكن نبغى الوعد بعد التساهيل = ذيك الديار اللي بها الورق غنا
قفراً خلا ما داج فيه المهابيل = في ما مضى ما ينزله غير اهلنا
يازين شب النار والبن والهيل = و الدله الصفرا و نجرِ يدنا
في مجلسِ ما جاه راعي التهاويل = اللي يجيب علوم منا و منا
مجلس رياجيلِ و هرجة رياجيل = و أشعار تبنيها على كل فنا
ما راح معنى من تعبنا محاصيل = بكرة ليا حان الرحيل و رحلنا [/poem]

الرد من بندر الهذلي :

[poem=font=",6,,normal,normal" bkcolor="transparent" bkimage="" border="none,4," type=2 line=0 align=center use=ex num="0,black""]
ياللي تبي عن سبة البعد تحليل = حنا ترانا في الزمان انشغلنا
شاقين في وقت العنا و الغرابيل = و الله و اعلم وش مخبي زمنا
لو كان لاحقنا من ايامنا ميل = وعن ما نبي سود الليالي حدنا
ترى هقاوينا ورى الجدي و سهيل = وعزومنا دون العلا ما تثنا
لنا مع ابواب المراجل مداخيل = ومن مدخل اصحاب المراجل دخلنا
لو ان دنيانا تمتاع و تزيل = وفي قبورنا ما ينفع الا عملنا
نبغى الستيره يا مغني التماثيل = و نحيا حياه تسرنا في وطنا
نستد عن مدة اهل القال و القيل = ولا حتاجهم لو ما شربنا و أكلنا
هذي سبايب غيبتي بالتفاصيل = يوم ان ما جينا ولا حنا اتصلنا
لو ان ودي يا مطر بالتعاليل = وجلسه مع امثالك و هيلاً و بناً
في دار دوب أنه درج فوقه السيل = من نو برقه لاح و الرعد حنا
خضارها يشفي القلوب المعاليل = و تسر من جاها لو انه معنّا
ومجالسِ ما طبها بارد الحيل= هذاك لا فينا ولا هو منا
جلسه حشام و قوم وزعه و تكميل = واللي معه هاجوس بالقاف غنا
وبين النشاما دارجات الفناجيل = وان حان فرض نقوم له ما غفلنا
هذي طرات الروح يا سامع القيل = واللي بقي في وقتنا ما غبلنا[/poem]

صحت الالسن وبيض الله وجيهكم

تحياتي وتقديري

صح لسانك اخي مطر الهذلي

صوت وصدى ولا اروع وصح لسان خويك بندر


ســود الليـالـي مقفـيـات و مقابـيـل

حـتــى بـنــص اعـمـارنـا روحـتـنــا تقريبا هنا زياده مطبعيه



تحياتي

الاخ قرناس بني ياس صح بدنك ولاهنت

صح بدنك والله ياخ عمر ولا هنت = وزيادة حرف التا خطا مطبعي على قولتهم

صح لسانك وصح لسان عميلك

مراسل عليه الكلام

صحت الألسن ، والحيقة أن مشاغيل الناس ورى كل غياب

لك الله يعين

صح السنتكم وجعلكم على القوة


مراسلة جميلة وإبداع في التلاعب بالألفاظ


تحياتي لكم .......

الاخ ابورديد صح بدنك وبارك الله فيك

ياسلام ياسلام

صحت السنتكم وبيض الله وجيهكم

شعار مبدعيين وقصائد جزله

تسلم والله اخي مطر الهذلي على ماقدمتم لنا من ابداع منقطع النظير ,,

الاخ سلطان السويهري صح بدنك ولا هنت يالغالي

الاخ عابد صح بدنك ولاهنت يالغالي

صح لسانك وبارك الله فيك

صحت الالسن

قصيده جزله ورد رائع

تسلم اخي مطر على مااتحفتنا به

اطيب التحايا

الاخ ابن مغبش صح بدنك ولاهنت