المشاعر من غيابك

المشاعر من غيابك يا دفا إحساسي , جليد !
طحت من عيني لـ قلبي وما قدرت إنِّي أشيلك !
يشهد الله .. من رحلت وفي حياتي ،

لا جديد..
وكل ما ألمَح سرابك ..
أرتبك ،
الله وكيلك !

حالتي صعبه / بدونك ..
وكيف حالك يا بعيد ؟
أشتكي منِّك إليك ..
ومن جروحي , أشتكيلك !
والله ما قصرَّت فيني بس ..
ودِّي لو تزيد !
يعني " إذبحني " وكمِّل يا بعد قلبي / جميلك !

أدري غلطاتي كثيره .. وفوق كل هذا عنيد
وش تسوِّي هذا حظِّك رغم زلاتي [ خليلك ] ..!

أقتلك ..لا من خطيت ويا عسى عمرك مديد !
و أعذرك .. لو كنت قاتل لأنه يستاهل قتيلك .!

ويلي مـنـِّـك لو نسيتك والزعل طبعاً " شديد " ..
ولو أحس لحظه بـ أنِّك منشغل عنِّي ؟!
يا ويلك ..!

كل عاذل جاك بـَـعـدي .. وقالـ لك إنِّي : سعيــد- ما صِدَق !
وين السعادهـ !!
والحزن شـيـَّد رحيلك !!

وكل عاذل قال عنِّي شي ..
- إحساسه بليد !
ما قدر ياخذ كثيرك ..
- صار يطمح في قليلك !

وكل عاذل إن عطيته وجهـ ..
- ورّاك المزيد !
لو يقول إنَّهـ : يبيلك خير ...؟
والله ما يبيلك !

جيتهم طـيـِّب وأدري
في زماني ما يفيد !!
وش حصيل الطيب فيهم ؟
ومن فراقي , وش حصيلك !

بترك الدنيا عشانك !
دام هذا ما تريد ..
ويا عسى كلمة " عشانك " ..
تشفي يا روحي غليلك !!

الدليل إنِّي أحبك :
صرت أحسِّك بـ [ الوريد ] !
وأدري في قلبك يحبني دون ما أسمع دليلك !

في عيونك صرت ( شاعر ) واصل القمَّه / فريد !!
وصرت تسوى في عيوني كل بَني جنسك , وجيلك ..

مثل قلبك ما ألاقي ..!
ومثلي ما تلقى أكيد !
يعني ما عندك بديل ومستحيل ألقى بديلك ..!

ياللِّي شيَّعت المفارَق إشرَب وصالي و أزيد ..
خذ دفا إحساااسي و " إدفا " ..
كان بردك .. هد حيلك ..!