معلّقة الشاعر مبارك الأكلبي

[poem=font="Arial,5,#ffffff,normal,normal" bkcolor="" bkimage="backgrounds/13.gif" border="solid,2,#008080" type=0 line=0 align=center use=ex num="0,"]
برق ورعد والغيم مظلم وغدرا= والصيف مقفي وأبعدت به مطاياه
برد وشتاء والليل ما فيه قمرا= والخوف يا معبود في خافقي تاه
لفحة هواء يبّاسة العود غبرا= وبرادها جوفي من الستر عرّاه
تلوف سدرٍ من ظما الوقت ضمرا= تعرش جذوعه لين يبرى وتبراه
يوم أقبلت نسناس زيفٍ ومطرا= والسيل مثل الليل ما ينقرب ماه
صوت الغوارب له وشيبٍ وهدرا= يرعب جنينٍ ناعمٍ ظفر يمناه
تجرّ سيقان الشجر منه جرا= تحفر لقيعانه وتنهش لحاياه
بيت الشعر مبني على درب مجرا= والريح توميبه من أدناه لأقصاه
بيتٍ من ثياب الفرح ظهره أعرا= ما فوقه إلاّ فروة الحزن تكساه
بيتٍ على أمرار الزمن والمحقرا= مبني وريح الوقت تجري وتوطاه
تحته وحيدٍ شايب الرأس عثرا= حظّه تنكّس وأدبرت عنه دنياه
شيخٍ جعله الوقت للناس عِبرا= جارت عليه المظلمات المطمّاه

شيخٍ على قومه وله شان وأمرا=كم بنتٍ أجمل من سناء الشمس تهواه
لكن روحه عن هوى الغيد خضرا= يركض وراء عشق الفتاة المحناه
وين الفتاه و وين حبه وشِعرا= و وين الغرام اللّي له سنين يتلاه
يدّه على خدّه ومحتار فِكرا= لا بنت لا زوجه ولا ابن يرعاه
سبعين عام وكنّها لمح بصرا= لا والله اللّي غرّه الوقت وأنهاه
مثل البُراق اللّي عرج ليلة إسرا= يا سُرع جري خطاه في ليل مسراه
عنده خلوجٍ ترفع الحِس قهرا= على ولدها شالت الصوت تنعاه
قامت تجول الشِّعب وتحِنْ حسرا= وحوارها قد لفّه السيل وأخفاه
طاحت وراح العظم عشرين كسرا= لحقت ولدها عقب ما بانت أعضاه
وقام يتخبط تالي الليل و أزرا= شوفه ضعيفٍ والغرق جاه وأعماه
صفّق بـكفٍّ كفّ ويقول قدرا= راحت وراح الله يعوضني رضاه
من عقب مبركها معي وسط خِدرا= وحوارها يا ليت روحي تفدّاه
يا ليت وبلٍ خذهم يزيد مطرا= ويزيد سيلٍ شالهم لأجل نوطاه

وقام يتلفّت في زهابٍ تنثرا= الخِدر مايل والقواطير تغشاه
والطين موحل والبرد فيه زَبرا= والليل برد وسيل لا وعذاباه
وأخذ عصاه وقام منعاج ظهرا= وهلّل وكبّر مدبرٍ وسط ظلماه
وراح وتعلّى له طويلٍ وعسرا= عهده برأسه يوم بانت ثناياه
يجلس برأس الرجم عثراً وخطرا=ويصيح بأعلى الصوت ويقول ربّـاه
يذكر زمانٍ فات ويهلّ عبرا= ويـِنهج نهيج الطفل من هول ماجاه
ويذكر زمانٍ كانت الرّوح عذرا= واليوم شابت والزّمن شاب معناه
هذا أنت تسمع ما جرى له وتقرا=قلبك تأثر ساعةٍ ثم تناساه
إن كانك ابن آدم بشر فيك فِكرا= والدم الأحمر ما خذٍ فيك مجراه
وإن كان فيك إحساس عطفٍ وتدرا= ونسنس على قلبك نسيم المعاناه
تدعي جليل المُلك ربّ المغفرا= يغفر له ذنوبه ويدمح خطاياه
وتدعي عظيم الشأن يشفي ويبرا= جرحه وجرحك والجروح المخفّاه
أمّا جروحي خلّها لين تبرا= وإن ما برت فالموت مبري ومحلاه

جرحي قديمٍ ما برى طول دهرا= باموت وأفنى والألم ما برى داه
لي قصةٍ في الحب تفجع وقشرا=الله خلقني لأجلها أستغفر الله
قصّة غرامٍ طعمها سِم كدرا= قصّة غرامٍ طعمها حزن منساه
قصّة غرامٍ تِكره الطير وكرا= أو ترهنه في العش للدّود يبراه
أول حياتي تمطر العين قطرا=وأتلى حياتي جف دمعي من أقصاه
وأول حياتي أرفع الصوت جهرا=واليوم باح الصوت وأخشى المناداه
صفوة شبابي زايد الحظ زهرا= واثنينهم ضاعوا من العمر عزّاه

حظّي تعوّق والعُمر كان شهرا=أما شبابي جاه شيبي وسرّاه
بين الخلايق زاد همّي وكثرا= فجّ الخلاء عشقي بعيدٍ عن الآه
أمشي جسد والفكر تسعين شطرا= بين السماء والأرض صبحه وممساه
الله خلق جنسين أُنثٌ وذَكرا= والله خلق كل المخاليق ترجاه
لو تفتكر كم كائنٍ حي يطرا= كلٍ وهبه الله صوره وهيّاه
الله حماهم كُلّهم وأصدر أمرا= من قصتي واللّي جرالي وأنا أخشاه
اللّي جرالي ما جرى لجنٍّ وبشرا= الله خلق قلبي وحيدٍ وعنّاه
لو قصّتي يدري بها هتلر تبرّا=من مذبحة حرب الملايين وأسراه
يبني على العالم من السلم جدرا= ويقود شعب ألمانيا للمساواه
ولو قصّتي توضع على شكل ذِكرا= في مَتحفٍ يزداد دخله بمن جاه
ياتونه السوّاح برٍّ وبحرا= ويزيد دخل الدولة اللّي تبنّاه
ولو قصتي قيلت لقيصر وكِسرا= إن كان ضاع الملك والعزّ والجاه
قيس الملوّح لو درى وسط قبرا= جاني خجول وحُبّ ليلى تناساه
طفل المهد من قصّتي شاب شعرا= أبوه غنى قصتي وإثره أشقاه
الزير سالم لو درى ما تجرّا= في خوض حربٍ خوه في خوضها أوصاه
إن كان دلهم بين لهوٍ وخمرا= وخلّى كليب لدودة الأرض ترعاه
ولاّ رحل عن دار تُغلب وبكرا= ولا معه يا كود هنده وليلاه
ولو يدر ي الخبّاز ما شب جمرا= على دقيقٍ راعي الزرع يذراه
إن كان يبحث راعي البيت دهرا= على فُتات الخبز ما عاد يلقاه

نحل الخلايا لو درى كان فرّا= ومن شاف أعاصير النحل قال وش جاه
ومن ثم يُسحب بين نملٍ وذرّا= يموت جوع وجوري الورد ماجاه
قطرة عسل ما عاد حتّى تطرّا= يموت راعي السُّقم ما ذاقه بفاه
حتّى يُقال إن العسل كان يشرا= في وسط جيلٍ ما يعرفون مجناه
بنيت لي في الحُب مليون قصرا=وإن جيت بأسكن قصر ينهار مبناه
تاهت حياتي بين مدٍ وجزرا= يا شين حظّي يا مخاليق شيناه
ما عاد أميّز بين حلوٍ ومُرّا= مُرٍّ يزيده مُرّ والعُمر مجراه
يا بري حالي كَن يبراه مِبرا= بري الدبا نبنوب غُصنٍ تغثلاه
ويا وجد قلبي باح حيله وصبرا= كنّي نباتٍ صرصر الريح تسفاه
حظٍّ معي متخفّيٍ وسط حُفرا= الله كتب له حفرته يومه أرداه
في خافقي فجوَه وفي العين وقرا= لا وهنّي أحزان عمري هنيّاه
من لي دعاء ربّه يعوضني أجرا= ومن لي تأثر من (مبارك) وشكواه
حبّيت لي في ماضي العُمر عفرا= حسبي على اللّي شتّت الشمل وأشعاه

حبّـيتها وأعمارنا تسعٍ وعشرا= حبٍّ على الفطرة وعهدٍ رسمناه
حبّـيتها من غير فضلٍ وشُكرا= حبّ الطّهارة والنقاء والمراواه
حبٍّ وبازغ نجمة الصُّبح فجرا= ما ينذكر في الأرض مثله وشرواه
حبٍّ ومنزل سورة الكهف وإقرا= لأنسى جميع أحداث عمري ولا أنساه
يا قلبي أسكت ما مضى كان سِرّا= والسر بين اثنين وشلون تفشاه
إن كان تنوي تنشر السر نشرا=فأنا بريٍّ منك والعُمر ما أبغاه
بأعيش دونك خالي الهم حُرّا= لا قلب في جوفي ولا حزنٍ أخشاه
قد عشت دون اللّي له الشوق كبرا= واليأس دونه جعلك الدوم تفداه
عشرين قرن وعِقد فجرًٍ وعصرا= طافت وفيها أحداث حب ومناجاه
حطّمت فيها الرقم جُهداً وصبرا= ورفعت كأس أمجاد عشقٍ خسرناه
زاولت لعب الحب غصبٍ وجبرا= من سيدي قلبي رئيسي وطعناه
مثـّلت عشق الخلق خيرٍ وشرّا=وأنا عميد أهل القلوب المعنّاه
قصيدتي طالت على الآه والرّا= ومصيبتي أطول من الراء والآه

لكن حزني جرّها غصب جرّا=والقاف شاف الحزن صادق وجرّاه
يا لله يا للّي لا إله إلا أنت ذِكرا= يا لله يا للّي ما عبد وجهي سواه
يا لله يا للّي لك صيامي وفِطرا= يا لواحد الماجد رفيع المكاناه
يخرّ وجهي بين شفعٍ ووترا= لك أنت يا شافي خفوقي ويا دواه
من دون وجهك منبتر شرّ بترا= لا دين لا دنيا ولا خيرٍ ألقاه
آمنت بك يا رب وازددت كُفرا=بالّلات والعزّى وشمعون والشّاه
أسألك تقبل توبتي بعد وزرا= لأني تجاوزت الحدود المسوّاه
ولأني غداً ضيفك ومحتاج عُذرا = ولأني أخافك وأشرب الخوف و أرواه
ولأني طعام الموت لو طال عُمرا= ولأني غداً جُثّة على الأرض مُلقاه
برق ورعد وقت الدُّعاء والمغفرا=وأرفع يديني للسّماء أستغفر الله وأرفع يديني للسّماء أستغفر الله[/poem]

بالفعل معلقة


نقل رائع أختي بنت الخالدي


صح لسان الشاعر


وسلمت يمناك

السلام عليكم ورحمة الله وبركاته.
فعلا أختي الفاضلة معلقة وصح لسان الشاعر الأكلبي ..
ونقلك موفق لاشك
..تــــاهـــــت حـــيـــاتــــي بـــــيـــــن مــــــــــدٍ وجــــــــــزرا
يـــــــا شــــيــــن حــــظّــــي يــــــــا مــخــالــيــق شــيـــنـــاه
مــــــــا عــــــــاد أمــــيّــــز بــــيـــــن حــــلـــــوٍ ومُـــــــــرّا
مُـــــــــرٍّ يـــــزيـــــده مُــــــــــرّ والـــعُـــمــــر مـــــجـــــراه