شباب اليوم

لقينا شباب اليوم يبحث عن الفلة
لكن السعادة في الحيا مايحصلها
وانا اقول قهويني وقرب ليه الدلة
وانا افند الاحوال واعرف مشاكلها
صلاة الفجر محد ٍ يصلي صلاة الله
ولوهي بلوت يصير دايم مواصلها
وبعض البشر يبكي على الكم ويبله
على عشق فاني منيته ماتوصلها
ويكتب قصايد كلها ملح لابالله
يزيف شعوره والخريطة يفصلها
ترى الصدق منجاتك ليا ضاقت الحلة
ولاحجة ٍ تثبت بليا دلايلها
ليا كنت فاضي عندك الفرض قم صله
وبعد الفريضة جات حزة نوافلها
تنال الثواب وتوصل الدرب وتدله
وترتاح جدا ً بعد ما ضاع جاهلها
ورب الملا غفار يدمح لك الزلة
ولكن عقابه زلزل الناس زلزلها
تغانم زمانك وامش مسلم على الملة
وحذرى تنافق للوجيه وتمثلها
وخلك على الشدة كما السيف ابوسلة
عطيب المضارب والمواجيب كملها
ولاتصحب اللي في الشدايد لهم ذلة
ترى الخوف خصلة في البشر ماتجملها
كذا المرجلة يافلان ماهي كما الفلة
ولاني معزي قوم ضاعت مراجلها