مساجلة "بن مذيخر وعبد الله الطلحي"

هذي المساجلة جرت بيني وبين الشاعر القدير عبد الله الطلحي قبل ثلاث سنوات وحبيت ان اطلعكم عليها نامل ان تستمتعوبها

يانديبي من على حرا همام =يسبق الشيهان مايلحق مداه
خمسه اذرع بينعنقه والسنام=لامشى في الدرب مايرجع قفاه
خطوته مترين وجنوبه وسام =راكبه مرتاح مايشكي عناه
وجهته يم الرجاجيل الكرام =محتزينه بالتحيه في لقاه
ثم يامندوب بلغهم سلام=اعطهم علمي وماجرت خطاه
سلم الطلحي جوابي بالتمام = واتركه يقراه ويعذر خطاه
اعرفه قراي مافيها كلام=يعرف الكلمه ومادلت علاه
شاعر الحكمه رجل عالي مقام= وكل صعبا ينلقي عنده دواه
يابو ناصر كل ماحاولت انام=مايجيني النوم عيني في جفاه
من جمال صابها سقم الهيام=تارد الميراد وتعكر صفاه
ماتبى تروى ولوتغزاه عام =المرض في اعروقها ضيع حلاه
صافي الما لي جمالا ماتضام =تطعم الما طعم واتميز زكاه
والمعرفه ماتجي قسم الغشام =والغشيم لو يبيها ماتباه
ولا يغرك لو يكثر في الكلام =ماغير السانه يقاتل في جماه
رايكم نبغيه في هذا الكلام =وانت من قوم الفطانه والنباه
كلمتك لابديتها مثل الحسام =حجتك زينه ونقدك ماكماه
نقبل التوجيه منكم باحترام =رايكم في المعرفه نمشي وراه
والقمر في الليل جلاى الضلام=والكواكب مستفيده من ضياه
وياصلاة الله على الهادي الامام =عد مانادا المنادي للصلاه
************************************************** *
الردد من الشاعر عبد الله الطلحي أبو ناصر
استلمت الخط في البيت الحرام=من رسول جاب خط ولاقراه
سلمه واقفا كما قولة قوام=لاسمع ردي عيه ولااحتراه
ساعتين اليا مشى حسب النضام =ياصل الشرقه هواه ومنتهاه
والرساله من خلف فيها علام=زاد عندي بعد مكتوبه غلاه
مرحبا بالخط من عند الحشام=مثلهم لابد نسعى في رضاه
ياخلف يابن مذيخر ياسلام=منهجك في الشعر عالي مستواه
ياولد عودا لعله للرحام= ماكما طيبه ولا احلى من نباه
شاعرا لاجت مواقيف الزعام=يحمي الماقف ويبدع في بناه
ينقش ابياته كما نقش الوشام=ورث من كنز الجدود ورزق جاه
وانت وارث كنز مرحوم العضام =ومن ورث كنزا كما كنزك حماه
شق دربك ماعليك امن الزحام=لاتوقف في الزحام ولاسراه
واعرف ان اشعي مردوم السنام=الدليله كل دربا قد مشاه
كم ورد للعد يوم البل حيام =ماتصل للما وهويبرد ظماه
والعرب ماكل من قالوا غلام=ينجد اللي حزة الشده نخاه
كم غلاما لوتقول الدرب شام=مافهمك وضاع في كل اتجاه
خل شعرك يرفعك فوق الغمام=لين تصبح مثل نجما في سماه
ابتعد بالشعر عن درب الحرام = وان صلح معناه يتحقق مناه
لاتصف شئا يغطيه اللثام=ولاتبيح السد وتبين خفاه
مكسب الرجال اذا صلى وصام =وحج بيت الله ولا غل الزكاه
جيتلك بالرد من زود اهتمام=وان طلع به نقص من عندك وفاه
ومن بعدها نذكر الله في الختام =والصلاة اعلى النبي طول الحياه

ونعم ونعم والله يابن مذيخر فيك انت والشاعر الكبير عبدالله الطلحي


حقيقة استمتعت بقراءة القصيدتين

ومرحبا بك بين ابناء عمومتك


ولكن في القصيده الاولى على ما اعتقد خطا املائي :

	ماغير السانه يقاتل في جماه

صـــح لســـــــــآنكـ يـآبن مذيخـــر وجودكـ في المنتدى مكسـب ...

وصــح لســـآن الشــآعر عبــد الله الطــلحي الغائب الحـآظر ...

صحة أبدانكم يابن قاسي وياسهم هذيل

وصحيح ياخوي يابن قاسي

ماغر إلسانه يقاتل في جماه أي اللسان

السلام عليكم ورحمة الله وبركاته

صح لسانك ياخلف ولاهنت، شاعر وابن شاعر ،وسعداء بتواجدك معنا.

وصح لسان شاعر الحكمة، ولاهو غريب عليه هالتوجية .

تحية طيبة

السلام عليكم ورحمة الله وبركاته

ما أقول إلا ماشاء الله عليك ياخلف ..

اشهد بالله أنك قرم ..وشاعر ..لاهنت.
ثم يامندوب بلغهم سلام=اعطهم علمي وماجرت خطاه
سلم الطلحي جوابي بالتمام = واتركه يقراه ويعذر خطاه
اعرفه قراي مافيها كلام=يعرف الكلمه ومادلت علاه
..





وأبو ناصر شاعر معروف ..ماهو غريبة يصيد الهدف :

شق دربك ماعليك امن الزحام=لاتوقف في الزحام ولاسراه
واعرف ان اشعي مردوم السنام=الدليله كل دربا قد مشاه
كم ورد للعد يوم البل حيام =ماتصل للما وهويبرد ظماه

ننتظر جديدك أخوي الشاعر خلف ..

[قــمــيدان]

ياسلااااام



ابداع


مساجلة جميلة جدا



صح لسان الشاعرين الغاليين

أشكر الجميع على الاطراء واتمنى ان اكون عند حسن الضن

ونعم فيك وفي عبدالله الطلحي
وقصائد تسجل بمداد من ذهب
صحة الألسن والأبدان يابن مذيخر

السلام عليكم ورحمة الله وبركاته


ونعم فيك وفي عبدالله الطلحي

صح لسانك يا ابن مذيخر
ولسان شاعر الحكمه

خل شعرك يرفعك فوق الغمام
لين تصبح مثل نجما في سماه
ابتعد بالشعر عن درب الحرام
وان صلح معناه يتحقق مناه
لاتصف شئا يغطيه اللثام
ولاتبيح السد وتبين خفاه

نصايح من الواجب الأخذ بها من كل شاعر


تقبل مروري واعجابي