محمد المسعودي ومستور العصيمي

محاوره جمعت الشاعر العذب محمد المسعودي بالشاعر مستور

العصيمي




محمد المسعودي



هــلا يامرحـبـا ترحيـبـة منهاجـهـا منـهـاج
علـى سلـم الرجـال اللـي تشرفنـا مذاهبـهـا
تولم يالعصيمي واعرف المدخال والمخراج
لياهـانـت نـفـوس الـقـوم هيـنـةٍ مطالـبـهـا



العصيمي



يدوم الك البقا فالليلة اللي نورها وهـاج
بعد حملتها فوق الجمال اللي تقوم ابهـا
تهرّج يامحمد وانت ميرادك على هـدّاج
نبا نارد على الجمه ليا صفيت مشاربها



المسعودي



ليـا صفيـت معـي نيتـك يامستـور مايحتـاج
نبـا نرقـى جبـال طـويـق ونـعـدّي مراقبـهـا
سنين تقول يا دكتور يا مستور ماش علاج
وأنــا مـانـي مـصـدق فالعـلـوم ولا مكذبـهـا



العصيمي



وأنا لـي نيـةٍ ماتنعـوج فالوقـت لـو ينعـاج
وبعضات النوايا يا محمـد ماضريـت ابهـا
نبـا ندفعـك يابابـور ليـن تصـادم الآمـواج
عساك تجيبك امواج البحر ولا تروح ابها


المسعودي



تقنّعني بحلو لسان يالصاحب وضحك حجاج
وأنـا اشـد الركايـب كلـمـا شفـتـك وأتعبـهـا
تبا علـم الحقيقـه مانبـا لـك فالعلـوم احـراج
أنـا عايـش مـع الآيـام لـو كبـرت مصايبهـا


العصيمي



ابـا اشـوف الحقيقـه مـع محمـد وأخـر الانـتـاج
وابـا احـد السيـوف اللـي عطيـبـاتٍ مضاربـهـا
ليا منك عرفت الدرب صرت أسبق من الميراج
ولـن ضيعـت دربـك تحـرث الارض وعقاربهـا




المسعودي



ليـا منـه سريـبـك يالعصيـمـي جـابـك المـعـراج
سيوفـي مرهفـه وليـا وقفـت اعـرف مقاضبـهـا
اعرف الدرب الأفضل وابتعد عن زحمة الحجاج
أنــا لــي لحـيـة مبـعـد عــن الشـكّـه شواربـهـا


العصيمي



يقولون العرب ماينسري ليل بدون سراج
وهــذي حـجـة مابـيـن قاريـهـا وكاتـبـهـا
زمان فات وش سويت في بغداد يالحجـاج
تحملهـا عـلـى الـقـلاب والـقـلاب يقلبـهـا



المسعودي



عيون الذيب ماتعرف غرام ولا تعرف سهاج
تـدف الجـن فـي دربـه وعـن دربــه يجنبـهـا
تشب النار يامستـور وتحمـي علاهـا الصـاج
وتبنـي لـك بيـوت الله علـى راسـك مخربهـا


العصيمي



والا ياعسكري مااسرعك تاخذ نجمتين وتاج
اخـاف انـك مـن الايـام تغـدي فــي سبايبـهـا



المصدر منتديات عذب القصيد للشاعر محمد المسعودي الهذلي