غـــلا البنت عند أبوهـا.. فاجعة بن دويرج

جبنا لكم سالفه وقصيده عساها تعجبكم ان شاء الله

هالشاعر من شعراء السرمن أهل بلدة جفن توفي عام 1356 (عاد ما نيب قايله اسمه إلا في وسط القصة )

<<<<<<<< مسويه أسلوب تشويق

هالشاعر يوم كان شباب كان يشتغل في النخيل وبعد ما كبر صار يشتغل في البناء والطين هذا الشاعر عاش في

منطقة السر وتزوج في أول شبابه وجاه ولد ولا قعد عنده طير مثل هالعيال اللي يطيرون , راح واستقر في

المنطقة الشرقية , وجلس هالرجال فتره ما عنده أحد ولا عنده حرمه ولا هاك الحرمة الصالحة الدينه اللي

متوفي عنها رجلها تقدم لها وخذها وهو على كبر ويوم خذها ولاها حرمة ذربه وفيها دين وضفره بالحيل وبعد

فتره رزقه الله هاك البنية من هالمره . وبدت البنية تكبر ودائماَ البنت لها حنان خاص من أبوها والبنت دائماَ

الطف من الولد المهم كبرت البنت , والحاصل يالربع أن هالرجال في هالبيت عنده هالمره مدللته وماشاء الله

عليها ضفره وسنعه تسوي قرصان وجريش هالجريش اللي ما شاء الله تقول كأنه دماغ جربوع ( عاد من فيكم

شاف دماغ الجربوع ) هذولي الحريم الضفرات اللي يطبخن قبل كذا عاد وين تلقونهم الحين ( ما عاد فيه إلا بنات

يقلون برجر هذي السنعه فيهم الله يخلف بس ) المهم يالربع ما لكم بالطويلة البنت الحين كبرت وصار عمرها 13

مربيتها أمها على الضفاره والذرابه صارت هي اللي تقابل أبوها إذا جاء وهي اللي تقهويه ( سنعه مثل أمها )

ولا فيها جمال يهبل ما تقدر تناظرها أكثر من ثلاث دقايق هالك المبسم اللي يالله تدخل معه العنبه,عاد كثرو

العيال اللي يتسنعون ويتملحون عند أبوها ( حركاتكم يالعيال اذا حطيتو عينكم على أحد ) اللي يسلم عليه في

المسجد واللي يحب رأسه واللي يقول تأمر شي ياعم أنا ولدك اللي ما تعبت عليه ويا كثر هاللي يحببون رأسه

والله ياجبهته أنحفرت من التحبيب كلن قام يتكلم ما شاء الله تبارك الله يابنت عند عبدالله بن علي بن دويرج ( اللي

هو شاعرنا اليوم ) المهم يالربع كبرت البنت وصار عمرها 16 وصارت هي اللي تقهوي أبوها وطيبه اذا بغا

يروح المسجد وتولم بشته عاد صار أبوها معتمد عليها في كل شي , الحاصل يوم جاء يوم من الأيام الله لا يعيد

الشر ولاها أيام شتاء مثل وقتنا الحين جاء هو بعد صلاة العشاء ولا حرمته شابه الجمر وحاطه عليه مركب أبو

ثلاث رجلين جنبه الدله وبريق الحليب قالو تبي نصب لك قهوة وإلا حليب قال اللي تبون , قامت الأم وصبت له

حليب يوم رشف الحليب قال كأنه بارد قالت لا نسخنه الحين قال قومي وأنا أبوك روحي جيبي لنا حطب عويدات

رمث ولا تجيبين طوال مره جيبي عويدات تدخل تحت المركب قامت البنت وخذت السراج وراحت للحوش تبي

تلقط حطب وقامت تلقط عويدات على قول أبوها تدخل تحت المركب ولا توها ملقطه ثلاث أو أربع وتلقى هاك

العود طويل بالحيل جت تبي تكسره على ركبتها وطق السراج وينجعف وينكب قازه ويطفي قامت هي تلمس في

الحطب يوم تلمست يا دافع البلاء وتقرصها داب مع أصبعها وتجي معوده وتصبر وتألم ماتبي تبين الابوها وما

تبي تزعجهم ( والله لوها من بنات الحين كان تفضح الدنيا بالسانها ) المهم راح أول الليل ولا يوم كاد عليها

الوجع ودلت تقلب وتسدح مع الألم وتفزع الأم والجيران ويحطون هاك التمرة وعجين تمر ومدري ويش يبغونه

يفيد يوم يومين ويوم جاء نهار ثالث وهي توفي ولا يوم أنحشت كبد الأبو وقعد أربعة أشهر مثل الجرح قاطب

على صدره كل ما ذكرها يتزفر هاك التزفر الله يجيركم أن ناظر الباب هذا تذكرها يوم أنها واقفه عنده وتذكر

يومها تقلط له الغداء ويومها تقهويه .

عاد قال هالقصيده وهي من قصائد الرثاء ..

[poem=font="Simplified Arabic,5,white,bold,normal" bkcolor="transparent" bkimage="./images/backgrounds/21.gif" border="none,4,gray" type=2 line=0 align=center use=ex num="0,black"]
عفى الله عن عين(ن) حلى النوم جافيها = كراهــا قليل وذارف الدمـع محفيهــــا
إلى قلت الا ياعيـن هيــدي وهـــــــودي = جرى دمعها الصافي وهلت عباريهــا
تبين فــروع الصبــح ما ذاقت الكــــرى = ولا لوم عين(ن) فارقت شوف غاليها
ولا زل يـــــوم أو ليـــــله ما تعبــــــرت =على النـــوح أعزيها ولاني بقاويهــــا
وأنا في زجا جزل العطـــا عالم الخفـــى= يلطف بحـــال(ن) خافي الهم باريهـــا
على نـــور عينـي لب قلبـــي ومهجتــــي= تحن الضمــــايركل ما حل طاريهــــا
حنين الخلـــوج اللي عن الظــير فـــاختت = إلى غاب عنها ساعة(ن) ما يباريهـــا
وأنا كيف ما أبكي طفلة (ن) غضة الصبا = حورية(ن) سبحان رب(ن) مسويهـــا
نشت بالهـــدى والدين والحــــق والبهـــــا =فالــو طالت الأيــــام ما نيب ناسيهــــا
فيهــــا طــــبــوع (ن) كامـــلات حميــــده = حنون على الجيـــران وصار عانيهــا
عفيفــــة نظيفـــة جيب ما داست الخطـــــا = ولا هوجست بالمـذهب اللي يرديهــــا
حشـــــا ما بهـــا من خافــي العيــب ذارب= سـواء حشمــــة الوالد فهذا فهو فيهــــا
كمل عمرها ثنتـيــن مع عشــــر وأربـــــع = سـواء محترمهـا تسفهه لو يحاكيهـــــا
خذت هجنـــه(ن) فالبــيت عنــــدى قليــــله = أمانـــه وخذهـا الخيــر اللي عطانيهــا
فـــلا نيب جــــــزاع فـــــلا شك ولعـــــــه =أعرف الأمانــــة ما لها غير راعيهـــا
فايا ســامــع دعـــــواي في مظلم الدجـــــى= تمحــــي خطاياهـــا وتثبت حسانيهــــا
وتجعــــل لهـا في مجنـــة الخلـــد منـــــزل = وتقطــف جنا جنـــات طيبة وتجنيهــــا
وتعـــــوظها فيمـــــا قصــــر من شبابهــــا=برضــاك ياخــلاقهـــا وأنت واليهــــــا
ألهـــــــي ودودي دعـــوتـــي تستجيبهـــــا= على النـــفس كلها من غــلاها نبديهــــا
ألا وتـكــــدر خاطــــــري من فــراقهــــــا = ولــــو لا غــلاها ما تكلفــت راثيهــــــا
سمية دمــع المــــزن في غبــــــة البحـــــر= سواء البنــك ما يدرك ثمنهـا ويشريهـــا
صلــــو على من لافتـــرى سيد الـــــــورى =وأن مابــي إلايــــوم يطــــري سميهـــــا
صلـــو على من لافتــــرى سيد الـــــــورى= عدد ما جرى من رايح المزن ودايهـــــا

اللهم صلي على سيدنا ونبينا محمد وعلى اله وصحبه اجمعين وشكرا على النقل الرائع والضعيفه قعدولها بعين لين فقدت الحياه والجمال جمال النفس والزمن هذا ماكنه الا زمن أغراء والبنات ثلثينهم مايعرفون الا الأندومي

قصه مؤثره والله يعطيك العافيه على هذا النقل وتقبل مروري

.. يعطيك ألف عافيه ..

.. سهـــــــــــــــام الحــــــــــــب .

.. وحلو التسديد من خارج منطقة الجزاء ..

.. أمتعتينا وتقبلي مروري ..