قصيدة الشاعر خلف بن هذال في حج 1429

[poem=font="Simplified Arabic,4,,bold,normal" bkcolor="" bkimage="backgrounds/20.gif" border="groove,4," type=1 line=0 align=center use=ex num="0,"]
من فيافي ديرتي جيت أحث الرجل جيت=ممتطي مطية ما تخالطها الوسوم

في شداد الراحلة كم سرحت وكم سريت=أطرد الأيام طرد النعام مع الحزوم

وكم رضيت وكم زعلت وزعلت وكم رضيت=طاويٍ بطني وأسج عن الوجبة وأصوم

وكم بكيت وكم ضحكت وضحكت وكم بكيت=تدبر الدنيا بعض النواجذ فالبهوم

الزمان اللي كواني بناره واكتويت=ماحجبت الوجه بالقيظ عن لفح السموم

الولد دون الوطن والمعيشة يستميت=ما يخلي الواجب الي تخليه الرخوم

اقتلب وادور الرزق وبحظي رضيت=واقتطع مناكب الأرض ما اسمع من يلوم

اطلب الخيرة ليا اخترت فرجة وانتويت=ما يرد المنتوي صوت ذيب وحس بوم

كان ماجاك الولد يجتلد لو حي ميت=من حساب اللي مريف المقابر من اللحوم

عيب اردد ليت وانا ولد واقول ليت=منوة من قبلنا ما قضت لحدن لزوم

غبت عن داري مغرّب وعنها ما سليت=جيتها يوم الفرج لاح من روس الرجوم

والسلام مبارك العيد وانا لك فديت=ياحبيب الشعب وابرك من الايام يوم

يوم سقت القافية فيك والله ما غديت=مثل سوق القافلة للجدي بين النجوم

فيك يالقطب الشمالي بمسراي اهتديت=كل ما يممت يمك تعرضت اليموم

فيك يابن اليعربية وانا منك ابتديت=رايم العليا ولا غير عبد الله يروم

المواقف غالية كم عطيت وكم خذيت=الحياة لها ضريبة وتتبعها رسوم

اشهد انك نخوة المجد للمجد انتخيت=نخوة ماتارد ألا مواريد السهوم

واشهد انك في مسيرتك ولشعبك وفيت=منك واصلنا المسيرة وحققنا الحلوم

واشهد انك يوم خضت المناصب ثم وليت=كرسي التدبير بالفعل شتت الوهوم

واشهد انك صايب الراي بأفكارك سعيت=للتآلف والتكاتف وتسكيت الخصوم

في ميادين الديانات حاورت ومضيت=ومن يعارض في مساعيك جعله ما يقوم

ثور النايم وقله علامك ما صحيت=الأفاعي تدخل الناس من تحت الهدوم

ناس ما تدري عن اللي يدور وكيت كيت=خوض حوض ورجل خيل على الفارس تعوم

المخاطر واردة وأنت عنها قد دريت=كل طلعة شمس منها يبينن السلوم

ياعمر في رحلتك ماهدمت إلا بنيت=ما تعرضت لكنيسة ولا روعت قوم

معدلك فاروق وأعظم أخطاك اللي خطيت=كل من ودعك مستقبلك عند القدوم

وانت يا قايد وطنا مشينا اللي مشيت=المثابر بالصبر والغنايم بالعزوم

ارفع الراية وسل السلاح ليا غزيت=بالأماني كم قطع الايادي والخشوم

يستتب الامن وليا اهتنى الشعب اهتنيت=يسهر القبطان واللي على المركب ينوم

شاهر سيف العدالة وللمصحف قريت=تنقذ المظلوم من تحت لحيان الظلوم

انجبك صقر الجزيرة وفي حضنه ربيت=فيصليٍ مر كبده على كبده يزوم

حنكك حنكة بطل للمواجيب ارتكيت=من نصيبك يكبر القسم من بين القسوم

يا عريب الأصل والفصل للجوزا سميت=عن شومة الغدر والشك والشرك معصوم

بالمغارب والمشارق لك السمعة وصيت=ديدينك بالكون تحت السما فوق الغيوم

يابعيد الحوم ياللي على الرجم اعتليت=الطيور موقعة لا تطير ولا تحوم

شامخ الهامة حشا ما خضعت ولا انحنيت=يا صميدع من يعاندك مفلس ومهزوم

من تدخل في عقيدتك للحق اعتزيت=عزوة العوجا ولا زال للعوجا قروم

سطوة الجبار في المعتدي لا من سطيت=ورحمة الغفار جاتك من الرب الرحوم

يا زعيم العرب للعرب بالنية صفيت=الزعامة يازعيم العروبة لك تشوم

يا عزيز الجاه يا كثر من صنت وحميت=من يذود بجانبك يرقد آمن ومخدوم

يا كثر ما أصلحت من حال وأحوال ورعيت=من مشاريع تخليك مكرم ومحشوم

السياسة يا سياسي لها بعت وشريت =وين يالشراي في سوقها محد يسوم

وانت يا تاريخ سجل بعينك ما رأيت=زف عصر الملحمة للبشر لما لموم

في ولي العهد ابمدح وللمدح اهتويت=راعي الفزعات ضافي الشمايل والكروم

مبتسم وقت الشدايد ويعجبك ان نصيت=في عيونه يصغرن الكبار من العلوم

في المهمة يابو خالد على القمة رقيت=للدفاع مدافعي مستعد للهجوم

ردك الله بالسلامة ومن قلبي دعيت=مرتجي عودتك رجوة صحاري للسوم

والقصيدة تمت ابياتها خمسين بيت=والسموحة ياملكنا عسى عزك يدوم[/poem]

السلام عليكم ورحمة الله وبركاته


لاهنت اخي الحجاج على النقل المميز


تحية طيبة

سلمت يالحجاج

وقصائد خلف لاتحتاج تعليق ....فهي دائماً ماتكون سلسله في المعاني

وقوية في الالفاظ ...........حقاً هو شاعر الوطن .

نقل اكثر من رائع

اخي الحجاج يعطيك العافيه

تقبل مروري

نقل رائع ومميز
وجزاله تعودناها من شاعر الوطن

تواجدكم اسعدني اخوتي الأفاضل

لكم جل احترامي

الحجاج

المواقف غالية كـم عطيـت وكـم خذيـت
الحيـاة لهـا ضريبـة وتتبعهـا رســوم !!!

،

ياعمر فـي رحلتـك ماهدمـت إلا بنيـت
ما تعرضـت لكنيسـة ولا روعـت قـوم

معدلك فاروق وأعظم أخطاك اللـي خطيـت
كل من ودعـك مستقبلـك عنـد القـدوم

هنا يمكن اشارة إلى دعوة خادم الحرمين لحوار الأديان والتسامح

اشكرك على التوضيح اخي ابو مثلم

لقد انرت متصفحي بمرورك العطر

لك خالص الحب

اخوك

الحجاج

شكرا على النقل اخي الحجاج

قصيده ممتعه للغايه

من شاعر ممتع بكل ماتعنيه الكلمه

اشكرك اخي هذلي على المرور اللطيف والعطر

لك خالص الود

اخوك

الحجاج