أربع أيام من دون دخان ..

صباح الخيرر .... اااااااااخ يا راسي ...

انه اليوم الخامس ... ولهلئ مو مصدئ اني ما دخنت من اربع ايام ..

من اربع ايام خلصت علبة الدخان .... من كتر ما انزعجت لانو بنظري انو خانتني ... قمت رميت يمين طلاق عليها ..

طبعا كنت مفكر انو تاني نهار رح ارجع دخن ... بس ما دخنت ..
يوه ... والله تبطيل الدخان سهل ..!!!

في اليوم الاول ... ما اشتقتلا ... لاني ما لحقت ... من كتر ما دوبني الشوق للدخان قضيت نهاري نوم ..
في اليوم التاني ... خرطت خمس روس معسل تفاحتين ... والاركيلة عملتلها علاقة وعلقتها على خصري ...
يعني انا وعم اجلي عم أركل ,,...وطبعا نمت جنبها ( للأركيلة )

في اليوم السالس ... وما ادراكون ما اليوم السالس... طلعت من البيت .. وكنت لم اغادره في اليومين الماضيين ..
مجرد ما طلعت بالسيارة .. فرطت ... لان متعود دخن اول ما اطلع ... وكل شي اعملو اتزكر الدخان ...
وعلى قولة الشاعر ... كل شي حولي يزكرني بشي ... حتى صوتي وضحكتي لك فيها شي ...
ما شربت شاي ... لان بتزكرني بالسيجارة ... ولا قهوة ... ولا جهنم الحمرا ... كلشي بيزكرني فيها تركتو ..
المهم الطامة الكبرى ... انو رحت تعشيت بمطعم بعد ما اكلت ... (دسم ) ... ما يخطر على بالي شي غير المحبوبة ..(السيجارة ) اااااااااااااااااااه وينك يا ام علي ( هاد لقبها )
المهم من كتر ما صوصت ( مصطلح سوري) تقاتلت مع الكاشير لانو تاخرو عليي لجابو اللبن ...
وطلعت عم سب والعن بس مو الكاشير .... عم سب والعن ساعة تركت الدخان ..
المهم بوشي على اقرب مول اشتريت سيجار من النوع الفاخر ... شغلتو ... سحبت سحبتين ... وحسيت انو خيانة ... كبيتو ومشيت ..

بين اليوم الثالث والرابع عندي مداخلة : الشب اللي بدو يترك الدخان ويصير ياكل فصفص... انا بقلو دخن احسن ..
يعني ما احلى شكل الشب هو وقاعد عم ياكل فصفص ويتف كل النهار ..... يعععععععع او مثلا عم يطحن بهالعلكة ..


اليوم الرابع ( امبارح ) الوضعي طبيعي كتير ... بل اكسر من طبيعي ...اركلت مرة وحدة ..
وفي واحد دخن قدامي وازعجني بدخان سيجارتو ( النتن ) قلتلو انو يراعي اني مبطل ... وبكل لطافة طردتو من بيتي ..
اليوم ... استيقظت وانا العن المدخنين ...
لا ادري لربما غدا قد امسك مدخنا ... فاضربه لتدخينه في مكان عام ..


والله اعلم .....


صحي باركولي ... جد بطلت ...




وانشالله بكرا بصير بدخن حشيش ... وبترك الاركيلة ..
وبعدها بصير بتعاطى مخدرات مشان اترك الحشيش ... وبصير بشم وباخد ابر وحبوب ...
وبالاخر بيصيبني احباط شديد وبنتحر ....
وهيك بكون تخلصت من الدخان نهائيا ..

عم امزح ها ...