ردية الشيناني

اقدم لكم اخواني واحبابي هذه الردية بيني وبين الاخ الحبيب فهد بن خلف العوفي الثقفي وهي ليست من كلماته على حد قوله ولو اني اشك في ذلك عموما لم اعرف حين ارسلها عبر الجوال سبب لهذه الرسالة فقلت ارسلت اليه ويريد رد عليها مني فقمت بالرد بناءٍ على مااتاني في نصها كان هو البادع اوالمرسل ومني الرد


اتمنى ان تنال على رضاكم وترتقي الى حسكم الشعري

يقول ابو خلف


الله من قلبٍ همومه تقزيه

تدك به مثل الجراد التهامي


روابع قامت تصيبه وتخطيه

شاف الهوايل واختلاف الاسامي


هذا زمانٍ كاثرات بلاويه

الغيم يقلب فيه عج وكتامي


حي يوريك المذلة وتغليه

انا اشهد انك ميت القلب عامي


من لايودك لاتوده وترجيه

ارفع مقامك ياعزيز المقامي


يرضى المذلة من تردت هقاويه

والذل يجفل منه قلب العصامي


درب السلامة بينات مماشيه

ودرب العطب يرث عليك اللكامي



الرد من ماجد الشيناني



ياقلب من صيح ونادى بمافيه

افهم كلامي لاتضيع كلامي


العارفة عرفه يسده ويكفيه

عرفه يسده لانشب ف الزحامي


اوقاتنا هي ...هي كم هي وياهيه

العيب فينا والزمن مايلامي


لابان ف الرجال شينة تحليه

عشرة ولله البقا والتمامي


شوف الشجر في كل موسم ثماريه

ماضايقه عش الحنش والحمامي


اتكلم [ا]بمنطق مع اهله وخبيه

عن جاهلينه لايزيد الخصامي


العود الازرق ريحه الي محليه

والله لولا ريحته مايسامي


خلي يدك عُليا ومن عاف خليه

يرجع يعود .. لك فشك ف الحزامي


بقلمي / ماجد بن دخيل الشيناني الزيداني الهذلي

العارفة عرفه يسده ويكفيه

عرفه يسده لانشب ف الزحامي

صح لسانك و بيض الله وجهك يا بو دخيل

وصح لسان خويك

تقبل مروري

الله الله صح لسانك يازيداني ولسان خويك


خلي يدك عُليا ومن عاف خليه

يرجع يعود .. لك فشك ف الحزامي

صح لسان صاحبك ولسانك يابو دخيل


ابدعتوا


تحية طيبة

	المشاركة الأصلية كتبت بواسطة قرناس بني ياس

	العارفة عرفه يسده ويكفيه عرفه يسده لانشب ف الزحامي صح لسانك و بيض الله وجهك يا بو دخيل وصح لسان خويك تقبل مروري

يامرحبا يارايد شرفني واسعدني مرورك

صح بدنك ووجهك ابيض

كل الشرف لي بتعلقك وجل احترامي وامتناني لك على اطلاعك

دمت بخير

	المشاركة الأصلية كتبت بواسطة فتى الحجاز

	الله الله صح لسانك يازيداني ولسان خويك خلي يدك عُليا ومن عاف خليه يرجع يعود .. لك فشك ف الحزامي

اخوي الكريم فتى الحجاز صح بدنك اسعدني وشرفني كل الشرف اطلاعك وتعليقك

جل احترامي وموفور عرفاني

صح السانك يبن العم واعتلا شانك ولا هنت

لايختلف إثنا في شاعريتك الفده والمتمكنه

من النعاني والمفردات الشعرية الراقيه وردية

في غاية الروعة والجما وقل من يسطرها من

الشعراء (يردوها) لله درك يبن العم

لك ودي وحترامي وتقديري

صح لسانك يا ماجد

و بيض الله وجهك

جزل و لا تجيب الا الجزل

الابيات اللي مرسلها لك خويك من قصيدة للشاعر محمد الاحمد السديري رحمه الله

و منها البيت المشهور

سيل ٍ حدر من وادي ٍ غير واديه

مدري حلال ٍ ماه و الا حرام ِ

.
.

اطيب التحايا يا مبدع

	المشاركة الأصلية كتبت بواسطة عماد الهذلي

	صح لسان صاحبك ولسانك يابو دخيل ابدعتوا تحية طيبة

مرحبا ياعماد

صح بدنك


الابداع مرورك واطلاعك

جل امتناني

	المشاركة الأصلية كتبت بواسطة ابوجنوب

	صح السانك يبن العم واعتلا شانك ولا هنت لايختلف إثنا في شاعريتك الفده والمتمكنه من النعاني والمفردات الشعرية الراقيه وردية في غاية الروعة والجما وقل من يسطرها من الشعراء (يردوها) لله درك يبن العم لك ودي وحترامي وتقديري

اخي الفاضل المحترم ابو جنوب

صح بدنك رايك بعد اطلاعك وحتى مجرد مرورك على النص مكان افتخاري واعتزازي

وشاح مفخرة توشحته على صدري

دمت في حفظ الرحمن

	المشاركة الأصلية كتبت بواسطة عز الرفيق

	صح لسانك يا ماجد و بيض الله وجهك جزل و لا تجيب الا الجزل الابيات اللي مرسلها لك خويك من قصيدة للشاعر محمد الاحمد السديري رحمه الله و منها البيت المشهور سيل ٍ حدر من وادي ٍ غير واديه مدري حلال ٍ ماه و الا حرام ِ . . اطيب التحايا يا مبدع

يامرحبا اخوي عز الرفيق

الابداع هنا هو مرورك واطلاعك وتعليقك

تشرفت بماطرحته كثير

وكامل عرفاني وامتناني على التوضيح

وان دل هذا دل على اتساع مساحة اطلاعك وثقافتك المتقدمة



ممنون اخوي
عز الرفيق