حدايا حفل أبناء الشيخ / عبيد بن سند السعيدي

أقيم في 2/3/1431هـ حفل زواج أخي عبيدالله وأخي عبيدان بمكة المكرمة
وقد شهد الحفل لون الحداء والمحاوره بين نخبة من الشعراء ومن الحدايا التي شرفونا أهلها بها :

حداية ذوي غالي من ذوي منير من السعايد يتقدمهم الشيخ / مطلق بن سعد السعيدي



سلام وزنات الذهب حيث الذهب فالسوق غالي
مقداركم وزنه وكلٍ له قدر بلحيل غالي
جينا بمدراج الوفاء اللي يدرجوه الآد غالي
العزوه اللي فالمواقف ما تعيد أدراجها


دار الزمان وبانلي ما فالصدور من الخوافي
وش عذر راع العرف يوم يجيه منّا علم وافي
من قام في علمي هلا واللي رقد نوم العوافي
ما دام حطينا معاملته في جوف أدراجها


الردّ من أهل الحفل


يا مرحبا في مرحبا ترحيبةٍ والإسم غالي
وانته علامك محتمس يا صاحبي والصدر غالي
مدّ الوفاء منّا ومنكم مدّ ما فيها تغالي
حياكم الله فالقصور اللي رفيع أدراجها


يا بادع القيفان والأمثال من زين القوافي
حنّا نغلق علمنا ما عاد يقفانا قوافي
إن كان ما هو صح هذا العلم يلحقكم حوافي
حنّا سلوم أهل الوفاء ما غرّنا مدراجها


الحداية الثانية للشيخ خلف الله سرور الفياني وجماعته


سلام ونسلم عدد ما تصرف انقود الريالي
ينصا عريب الجد واللي من صناديد الرجالي
ساير من الجدان ما جينا بحيلة واحتيالي
ميراثنا والا المحيط الأطلسي مالي وماله


نوصل مواثيق الحبال ونترك ارموث الحبالي
الحر ما يحتاجله زهام في بيض الليالي
ما دامت الدنيا لمن هو قبلنا شدّ الرحالي
لو كان يودع في بنوك سويسرا ما فاد ماله


الرد من قبيلة السعايد


يا مرحبا في مرحبا عداد همّال الخيالي
رديةٍ تضفي على الأقصى ويسمعها الموالي
ما حطّ حيلة فاللزوم وكيلنا عزّ الكيالي
كبّ المحيط الأطلسي والبحر لا تنزل بجاله


لا تقترب للحبل وتدوربك دورات المحالي
والوقت يا رجّال فيه من العطاء مرٍّ وحالي
ما دامت الدنيا لابن غانم وابو زيد الهلالي
يا فاهم الدنيا لها دوره كما دور المحاله

الحداية الثالثة لقبيلة السواهره يتقدمهم الشاعر / سامي سعد السويهري


الأوله عداد ما تقرأ تبارك والمعارج
سلام منّا والعلوم إلها مداخيل ومخارج
والعاقل اللي فالزمان المختلف دوم يتخارج
وليا تخارج ينحسب مكسب ويحسب رأس مال


والثانيه ما دامت إنّ الحق بين الناس دارج
لازم يعود الحق لاصحابه ويقنع كل هارج
لكن أنا بقول يفرجها على أهل الصبر فارج
لولا المتون اللي تعزّ الرأس كان الرأس مال
********************************

البدل من قبيلة السعايد


يا مرحبا رحب الوفاء اللي بيننا واضح وسارج
ياصحابنا اللي حزّة الميقاف تبهج كل فارج
أنته تخيّر فالعلوم الطيّبه ولها مدارج
والخيل ما مالت عن المنهج لو الفـــ رّأس مال


الحق ما بين العرب ما يتركه غير الخوارج
اليا ثبت لك حق بيّن معتدل ماهو بعارج
حنا نغلق فاللزوم اليا بدا واضح وبارج
أنا تراني راس مالك وانت مثلي راس مال



الحداية الرابعة للقنانية من قبيلة المقطه


الأوله سلام يفرح من بناه وسامعينه
عداد من صلّى وصام وعداد من زار المدينه
لاهل الحفل واللي حضر قلنا سلام مقدّمينه
عادة عتيبه ما تأخّر عن هل العلم الجميل


والثانيه تقدير للاصحاب علمٍ خابرينه
نوفى الطلب ونخلّص الطالب وكلمتنا ثمينه
كلٍ على ردّ العلوم الطيّبه ربي يعينه
قال المثل ياهل الوفاء ما للجميل الا الجميل

الرد من قبيلة السعايد


يا مرحبا رحب الوفاء اللي للرجال مصرّفينه
راع الوفاء يلقى وفاء في ماقفه تسلم يمينه
حياكم الله عندنا والحرّ ما تعقل يدينه
ترى الوفاء بيّن على راعيه ملبوسٍ جميل


والثانيه حنا نغلق كل علم وحازمينه
نكوي على كبد العدا والاّ الصديق نسرّ عينه
واللي نصانا ما تسير المخطيه بيني وبينه
حنا نعامل من يعاملنا على المبدا الجميل

الحداية الخامسه لقبيلة الثبته من بني سعد يتقدمهم الاستاذ / فهد سليم الثبيتي


سلام لاهل النوب تسليمٍ يشرف من بدابه
واللي حضر فالحفل يسمع ما قصر عنه السلامي
يا هذيل ياللي فالمواقف عندكم عزم وصلابه
واهل العلوم اللي تنومس يا رفيعين المقامي
جينا نشارك فالفرح حسب المعزّه والقرابه
حقٍ علينا نكمل الموجوب والواجب لزامي
حنا عتيبه فالزعام أهل المواقيف الشهيره
من غير زود عن القبايل كل معمورة باهلها


والثانيه وش رجل بين الناس إله عز ومهابه
تضربّه الأمثال فالتاريخ عامٍ بعد عامي
اليا حضر مكشوف كل اللي حضر يحسب حسابه
ما يخرج إلاّ حزّة المرسام واوقات الزعامي
رجال لن جاء مع جويد الخال يفرق كل لابه
من جاء على جنبه حقيقه فالمواقف ما يضامي
يفرق الحيلات فالمحضار ويصدّ المغيره
قال المثل من قبلنا ما للحمول الاّ جملها


الرد من قبيلة السعايد


يا مرحبا في مرحبا ترحيب ما ينصك بابه
عداد ما لاحت بروق الغيث في شرقٍ وشامي
سبل الوفاء ممدود بين الناس من يوم الصحابه
حياكم الله والوفاء مقدار للربع الحشامي
جيتوا على التكميل وسلوم العرب ماهي غرابه
وانتم رياجيل الوفاء والناس تعرف بالأسامي
حنّا هذيل أهل الثلاث البيض وحصون الجزيره
من دون قاصر فالرجال الطيّبه نعطي بدلها


والثانيه يا بادع الالغاز أخذ جابه بجابه
اللغز حلّه عندنا والذيب عينه ما تنامي
الله يكفي شرّ يومه قبل ما يجرد نصابه
السيف أبو حدين يوم الفعل قصّاص العظامي
يحمي المواقف دون حق الرجل ما يغدي نهابه
واليوم شرع الله فوق الناس ما فيها كلامي
واللي يخالف عن طريق الحق معروفٍ مصيره
قال المثل من قبلنا من ينقض الأرياء فتلها


الحداية السادسة لذوي عاصي من قبيلة المقطه


سلام يا منهو دعانا ثم جينا في وجوبه
حشمه وتقدير ومعزّه فالزمن ماهي صعوبه
جينا بعد جتنا العزيمه من عبيد ومن ينوبه
سلام تسليم الوفاء في ليل ولاّ في نهار


والثانيه حنا عتيبه والوفاء ننهج دروبه
يشهد لنا التاريخ شرق وغرب وشمال وجنوبه
سلمٍ لمن سالم ولّلي معتدي نار وعقوبه
والناس دون حقوقها في سرّ ولاّ في جهار

البدل من قبيلة السعايد


يا مرحبا في مرحبا واهل الوفاء جونا وجوبه
عداد نو(ن) دام فالمنشأ وهبّته هبوبه
حياكم الله في حلال هذيل والطيب أبشروبه
يا مرحبا درب السلف ممدود ما فيه إنبهار


والثانيه حنّا هذيل ونارنا نارٍ شبوبه
يشهد لنا التاريخ واللي سجّله واللي قروبه
الخصم منّا يعتذر ونريّعه ويقول توبه
كسّابة الطالات فالماقف على قحص المهار
************************************************** **************************

الحداية السابعة لقبيلة المطارفه ويتقدمهم الشيخ / ماطرالرويزن ودكتور الحداء الشيخ / صالح بن رويجح المطرفي


سلام والفرحه كبيره واللقاء فرحه بذاته
يوم البناخي مع خواله يلتقي منية حياته
وانا سعيد وكاسب المعروف ما تشقر عصاته
افخر بخيلاني بعيد الدار والا فالقريب


الشيخ ماطر قالها وتقولها حتى عزاته
إنهج يابو بندر وحنا درع أبو بندر حماته
المطرفي وصليم مثل القصر شامخ في بناته
ما يختلف ويطيب للحسّاد والاّ ما يطيب

الرد من قبيلة السعايد


يا مرحبا عدّ المطر وعداد ما ينبت نباته
هذا بناخينا واقول السيف عزّه من شباته
عاش البناخي والرجال اللي على الطيّب سواته
ماطر وربعه يوم حزّات اللوازم ما تغيب


الساس واحد يوم حيد الضلع عزّه من حصاته
انتم هل الطيّب وراع الطيب فالميقاف هاته
عدّ الروى من جمّته معروف ما تنقص رواته
انتم بنيخينا وفزعتنا ولا فيكم حريب

بيض الله وجهك ياعابد حداء على مستوى والثمن على الحداء كان جزل

تحياتي .

وجهك أبيض يا مطرفي الدلم


أسعدني مرورك طال عمرك

سلمت اخي عابد الهذلي على هذا الحدا المعتبر من الوزن الثقيل .

شكرا لك

سلام وزنات الذهب حيث الذهب فالسوق غالي
مقداركم وزنه وكلٍ له قدر بلحيل غالي
ـــــــــــــــــــــــــ ـــــــــــــــــــــــــ ـــــــــــــــــــــــــ ــــــــــــــــ
شكرررررررررررا

الاخ الكريم / عابد الهذلي ..
نشكر لكم هذا المجهود العظيم في توثيق جميع حدايا هذا الحفل ..
ونتمنى من الجميع ان يحذوا حذوكم في توثيق الموروث الهذلي ، فلك الشكر كله من عموم قبائل هذيل ومني خاصه ودمت سالماً ،،،

وعليكم السلام ورحمة الله وبركاته

جزيت خيرا أخي الغالي الأستاذ عابد الهذلي

وجهد مشكور وتوثيق للتراث الأصيل

ودامت أفراحكم على طول السنين

تقبل مروري وتقديري وتقييمي للموضوع ولشخصك الكريم.

	المشاركة الأصلية كتبت بواسطة مشهور الطلحي

	سلمت اخي عابد الهذلي على هذا الحدا المعتبر من الوزن الثقيل . شكرا لك

سلمت ولا ندمت أخي مشهور
مشكور على المرور

	المشاركة الأصلية كتبت بواسطة ابوخالد الهذلي

	الاخ الكريم / عابد الهذلي .. نشكر لكم هذا المجهود العظيم في توثيق جميع حدايا هذا الحفل .. ونتمنى من الجميع ان يحذوا حذوكم في توثيق الموروث الهذلي ، فلك الشكر كله من عموم قبائل هذيل ومني خاصه ودمت سالماً ،،،

[align=justify]سلمت أخوي أبو خالد

تحياتي لكــ يالغالـــــي[/align]

	المشاركة الأصلية كتبت بواسطة حامد السالمي

	وعليكم السلام ورحمة الله وبركاته جزيت خيرا أخي الغالي الأستاذ عابد الهذلي وجهد مشكور وتوثيق للتراث الأصيل ودامت أفراحكم على طول السنين تقبل مروري وتقديري وتقييمي للموضوع ولشخصك الكريم.

مرحباً الف أخي الأستاذ القدير / حامد السالمي
سبق وتشرفت بالجلوس معكـ فهنيئاً لك أخي حامد بأخلاقك في كتاباتك أو في تعاملكـ

أسأل الله أن يكثر من أمثالكـ

ومشكور على المرور طال عمركــ ........