الشاعرين العملاقين حامد وعبيدالله القارحي ضد وصل وحمدان

هذي محاورة رباعية في حفلة الشاعر محمد العازمي
الشعراء : حمدان العصيمي و وصل العطياني وفي المقابل عبيدالله القارحي وحامد القارحي



حمدان العصيمي :
مرحبا بضيافة اللي عسا عمره طويل
الرفيق اللي ينومس بطيبه و كرمه

وصل العطياني :
يا محمد غيبتي عن لزومك مستحيل
حوف جدي يمشي اسم العتيبي في دمه

عبيدالله القارحي :
البقا والله يجمل رياجيل الجميل
والشجيع اللي رصاصه مشرف محزمه

حامد القارحي :
يا عتيبة وش تقولون لو جوكم هذيل
القضية حولوها لقاض المحكمة

حمدان العصيمي :
يا عميلي فالرخا فالشقا منت بعميل
كان عندك حل حِل الرموز المبهمة

وصل العطياني :
خيـّر الهذلان فالكيف والسيف الصقيل
وان بغيتوا حل طيّب خذوها بشحمة

عبيدالله القارحي :
لا تعجّل يالعصيمي ترى المسرى طويل
خادم الامجاد ياخوك حظّه يخدمه

حامد القارحي :
قالوا العراف قبلي ولا هو مستحيل
لو يموت الحر بالغبن في شبك رخمة

حمدان العصيمي :
انت تعرفنا عتيبة هل الشعر الاصيل
نفحم الشاعر وننشب لسانه في فمه

وصل العطياني :
ما استفدت من الحِكم لا كثير ولا قليل
تحسب ان الحر طارف تجيه و تلزمه

عبيدالله القارحي :
ما بقى الا تدّعي انك ابراهيم الخليل
وانت تخضع للصميدع ليا رف علمه

حامد القارحي :
لا تكلم وانت ما معك للحجة دليل
آه لو ان الشياخة بكبر الجمجمة

حمدان العصيمي :
ما تبين الزبدة الا بعد خض الصميل
والبدو من طاح قدامها ما ترحمه

وصل العطياني :
ليش نجرح واحدٍ عندنا مثل الدخيل
لو بغيت اعطيه كلمة تفطّر برطمه

عبيدالله القارحي :
الكلام بلاش وان جات للوزن الثقيل
المواقف لهلها والقوافي محكمة

حامد القارحي :
من بلادي في بلادي ماني عابرسبيل
قبل عشر سنين يا وصل جاتك مكرمة


سيطره تامه في هذا الطاروق من قبل شعراء اشعر العرب ولابأس بالخصمين