هذيلي في نيوزلندا

رجعت ودخلت المطار بانتظار السائق إلى أن وصل المطار وسأل عني السواقين اللي في المطار ودلوه علي ورحب فيني وقال لي انا جيت أمس وانتظرتك ولا جيت ! طيب الحين وش اقول اقوله اني غلطت ! صعبه تدري خلني اقوله تاخرت الرحله ، قالي اوكي .

ركبنا السياره وكانت السيارة ميني باص مثل الباصات اللي يودون المدرسات وانطلقنا متجهين الى مدينة هاملتون ، وطبعا الى الآن انا مابعد نمت النومه اللي هي ، راح علي يومين اثنين جو وواحد بر بدون مايونيز .

وانا في السياره ذبحني البرد قلت للسواق انا ابي البس لانه برد فممكن ألبس هنا والا توقف والبس ؟ قالي عادي البس هنا قلت طيب .
الآن انا جايب معي ثمان بجايم مادري وش تسمونها على العموم هي تجي طقم سروال طويل وفنيله قطن مثلا الاصيل او دروش او الدفه ويالله لقيتها لان الوقت عندنا كان صيف ، المهم لبست طقمين سروالين وفنيلتين ثم لبست فوق الفنيلتين بلوفر ثم لبست فوق البلوفر جكيت ، ولبست بنطلون فوق السراويل كأني سحيله أم الخلاقين !! وعلى قول المثل( دخانها ولا هبت شمالها) ومع ذلك لازال برد !!!! لكن أخف من الأول

وصلنا للمدينة والسواق معه عنوان العائلة اللي راح أسكن عندها لذلك اتجه مباشرة الى بيت العائلة .
وقف عند بيت بصراحه بيت جميل ومرتب يتألف من دور واحد فقط وطبعا طريقة بيوتهم كلها كذا تتألف من دور واحد الا بعض البيوت .
كل بيت تلقى معاه حديقة صغيره ومدخل سيارة والبيت مسور بسور خشبي قصير مو طويل ، بعد ماوقفنا نزل السواق ودق الباب بعدين رجع للسيارة ، قلت له انزل أغراضي قال لا اصبر نتأكد من البيت قلت طيب ، شوي وطلع ولد عمرها تقريبا 15 سنه على ما أظن قلت في نفسي أنا المعلومات اللي عندي أن العائلة ماعندهم ولد ! يمكن يكون هذا ولد جيرانهم !
رجع السواق قلت انزل التفت علي وقال لي زلزلت ركبك بلا زلزلت ركبك تراك أشغلتني كل ما أوقف تبي تنزل أنت حدك بعير ويخب عليك بعد !! أمزح معكم لا تصدقون بس هذا فاصل إعلاني وسط القصة .
صار البيت هذا مو بيت العائلة صار في الشارع الثاني والسواق لخبط المهم رجع السواق وراح للشارع الثاني ووقف عند بيت بصراحه بيت شين حتى السواق استغرب وشلون المعهد تعاقد مع هالبيت !! طبعا هو شين قياساً على اللي قبله والشين فيه ان زرع الحديقه نصفه ميت ونصفه مصفر والسور الخشبي قديم شوي والبيت يحتاج تجديد بويه وإلا هو نفس التصميم اللي قبله وحجمه اكبر بعد المهم نزل السواق ودق الباب شوي طلع واحد طويل الساقين عريض المنكبين يعني طويل وعريض شوي .
كلمه السواق وانا اقول يارب يكون البيت غلط ، لكن صار صح وهذا هو بيت العائلة واللي طلع هو الزوج وتقريبا عمره خمسه وثلاثين سنه .
نزلت وودعت السواق ثم دخلني البيت وقام يشرح لي البيت ، هذا هو المطبخ وهاذي الصالة وهاذي غرفتك والعشاء الساعة كذا والفطور الساعة كذا والغداء مانتغدى لأننا نتغدى في العمل والمدام مو موجوده وراح تجي بعد شوي قلت طيب
الوقت كان العصر فقلت خلني اواصل للعشاء ثم أتعشى وأنام لان بكره بيكون أول يوم دراسة لي في المعهد .
طبعاً الزوجه هي الكل في الكل يعني هي اللي تعاقدت مع المعهد وهي اللي مسؤله عني اما الزوج واللي هو برازيلي فماله دخل في شي .
صليت العصر والظهر ثم رحت للمطبخ وصلحت لي شاهي لان البرازيلي قالي خذ راحتك اخدم نفسك بنفسك وكل شي عادي .
اخذت الشاي ورحت للغرفه شوي وجت الزوجه ودقت علي باب الغرفه وسلمت وقالت اعتقد ان الزوج اللي اسمه اندرو شرح لك كل شي قلت ايه ، قالت شوف النظام عندي اني كل يوم الصباح اخذ دش الساعه سبعه فما احب احد يشغل الحمام في هالوقت ، وانا اقول في نفسي والله ماتدخلينه قبلي يالعلجه وتشوفين انا واللي انتي ( الله من الشطانه في هالراس) طبعا انا قلت كذا لاني راح اقوم قبلها .

أكمل إن شاء الله في الحلقة القادمة

اعتذر عن التأخر لكن اذا بغيتو يوم بعد يوم فممكن اكتب اقصر من المعتاد اعتقد كذا بيكون احسن وانتم لكم الخيار .

العائله مكون منه زوج جنسيته برازيلي وما ادري اذا اخذ الجنسيه والا مابعد ، ويشتغل في شركه في مجال الكمبيوتر .

الزوجه نيوزلنديه قريبه من عمر البرازيلي يعني يمكن خمسه وثلاثين مثله او اقل .

البيت شارينه بالاقساط ويستقبلون طلاب عندهم علشان يستفيدون مادياً منهم .
الأجره بالاسبوع يعني ياخذون مني خمسمية ريال اسبوعياً يعني في الشهر 2000ريال ، بالاضافه الى اني لقيت عندهم صيني ساكن معهم موظف مو طالب بس مستأجر منهم الغرفه بدون الأكل وعنده في غرفته مايكرويف يطبخ فيه ، انا مادخلت غرفته بس شفته من بعيد ، وشفته بالصدفه يعني انا مو قاعد اقزقز ، كان باب غرفته مفتوح .
طلعت من غرفتي ورحت للصاله اجلس معهم ، وجلست وقعدت ادور شي في الصاله مفقود !!!!

بيتهم مافيه تلفزيون وقاعدين يشوفون القنوات عن طريق الكمبيوتر !!! نعنبو اصلهم كل هذا توفير !!!!

بالله عليكم تخيلو ثلاثه بيتابعون برنامج على شاشة لاب توب !! كأننا ثلاثة ورعان حاجرين جربوع في جحره !

صلحت لي شاهي ثاني وقلت لهم ابطلع اتمشى شوي اشوف الحاره
وطلعت اشوف الحي علشان مااضيع بكره وانا راجع من المعهد وقمت اطالع ولقيت محطة بنزين ومطعم وبقاله ونادي نسائي لبناء الاجسام

بس ممنوع دخول الرجال بس نساء وين العلمانيين عنهم هاللي مايستحون فاصلين الرجال عن النساء وين حقوق المرأه عنهم .

رجعت للبيت وجلست اسولف شوي معهم وقالت لي ام العائله بكره الصبح بنطلع بدري علشان اقص لك مفتاح للبيت و أوريك الباص اللي راح تركبه والباص اللي بيرجعك ، قلت طيب وجلسنا الى وقت العشاء وتعشينا ثم رحت انام .
بما ان الجو برد سألتني ام العائله شغلت الدفايه ؟ قلت وش دفايته مافي الغرفه دفايات ضحكت قالت تعال اوريك الدفايه وراحت للسرير ثم رفعت الشرشف والبطانيه واشرت على حاجه زي اللباده يعني تخيلها بطول سجادة الصلاة واعرض منها شوي طالع منها سلك موصل بالكهرب !
ققالت شفت هذا قلت ايه قالت هاذي هي الدفايه تشغلها قبل ماتنام وتطفيها اذا جيت تنام او تخليها شغاله بكيفك ، قلت طيب شكرا .

هالدفايه تنحط تحت البطانيه مو تحت جسمك على طول يعني لازم فوقها شي والحراره بتوصلك ، وهالدفايه مثل المروحه لها زر بدرجات مختلفه من واحد الى ثلاثه وتختار الدرجه اللي تناسبك ، انا حطيتها على اثنين .

وسميت بالله ونمت وكان الوقت بدري يعني يمكن تسعه الا ربع او حول هالوقت ، وقمت الساعه سته ونصف طبعاً انا اذكر هالوقت لاني استمريت عليه اسبوعين انام تسع واقوم قبل شروق الشمس .
وبكذا تمكنت من تخليص موية الحمام الحاره قبل العلجه لمدة اسبوعين كاملين ، كل ماقامت الساعه سبع وجت لقت الحمام مليان بخار والمويه الحاره صارت دافيه ، جتني وقالت لي فهد اذا جيت تاخذ دش افتح الشبك علشان البخار يطلع قلت طيب ولايهمك نفتح الشباك ، ولما جيت اعمل بنصيحتها وفتحت الشباك ههههههه مااقدر اوصف لكم !! هواء باااااااااااااااااااارد مع مويه حاره على جسمي قسم بالله صار جسمي ملون بسبت حار بارد حار بارد حار بارد وانا اللي اسكر الشباك وانا انتفض من البرد وقلت والله لو انوم في الشارع مافتح الشباك نعنبوها شكلها تبي تذبحني وخل اللي يصير يصير انا رجال جاي من الصحراء يعني يكون عندها شوية تقدير للظروف المناخيه المختلفه ايش اللي افتح الشباك مانيب فاتحه والله لو اتذابح انا وياها
صرت اسكر الشباك واخذ دش ثم اذا لبست فتحت الشباك وخليت الباب مفتوح ، وشكلها ماحست .

افطرت وطلعت انا و ام العائله الساعه تقريبا ثمانيه الصبح وشغلت سيارتها ورجعت للبيت وجابت مويه بارده تصبه على قزازة السياره لانها مثلجه ولو صبت مويه حاره تنكسر القزازه على طول ، ثم مشينا وا اول ماطلعنا وقفت عند نقطة توقف الباص جنب البيت وقالت من هنا تركب الباص يوديك للمكان الى محطة الباصات بتشوفه بعد شوي ، ثم طلعت لمكز تجاري مثل محلات ساكو ونزلنا وقصت لي المفتاح وقالت هذا مفتاح البيت ، ثم رحنا لمحطة الباص وقالت هنا راح يوقف الباص اللي راح تركبه من البيت قلت طيب وبعدين وين اروح ؟ قالت المعهد قريب منه مره اصبر خلنا اول ندخل المحطه علشان تشتري بطاقة الباص ، ودخلنا وشرين بطاقة الباص.
بطاقة الباص اول ماتشتريها فاضيه وانت تعبيها بالمبلغ اللي تبيه وكل ماخلصت تعبيها مره ثانيه بالقيمه اللي تبغاها ، انا عبيت بعشرين دولار يعني بخمسين ريال بالتمام لان الدولار ريالين ونصف
وبعد كذا اعطوني خريطه وسألوني في اي حي ساكن ؟ لأن كل حي له باص وعلى اساس الحي يحددون لي الباص فقالو لي انت باصك تلقاه في الموقف رقم 16 وهو يمشي كل نصف ساعه واخر باص راح يكون المغرب يعني الساعه سته ونصف تقريباً ، قلت طيب .

ثم طلعنا من المحطه وأشرت على مبنى عالي وقالت شفت هالمبنى قلت ايه ! قالت معهدك فيه تلقاه في الدور الخامس وقالت انا الحين لازم اروح العمل قلت طيب روحي انا ابروح للمعهد خلاص واضح .

شكل القصه ماعجبتكم مااشوف احد يعلق ترى انا قاعد اقولها بس اوسع صدوركم .

شكل القصه ماعجبتكم مااشوف احد يعلق ترى انا قاعد اقولها بس اوسع صدوركم .


لا فهد بالعكس والله عاجبتنا ومستمتعين بقوووه بعد
بس بنخليك على راحتك متى ماتكون فاضي تنزل حلقه

الله يعطيك العافيه