ألفية رحال هذيل: ألفٍ أولّف ياهلي من كلامي

ألفٍ أولّف ياهلي من كلامي
في الصاحب اللي طال لجله صيامي
اللي غرامه في حياتي لزامي
كنّه جوازي ياهلي والهويّه

والباء بدمّي مختلط حب خلّي
يمشي معي طيفه وأحسّبه ظلّي
أنا أشهد انه ساكنٍ كل كلّي
ساكن قصورٍ في الحشا داخليّه

والتاء ترى ما شافت النوم عيني
وغيري تهنّى نوم طول السنيني
ما غير اصفّق راحتي مع يديني
لولا الأمل شدّيت حبل المنيّه

والثاء ثلاث أيام ما أفارق الباب
وأصبحت طايح كن بي قرصة الداب
فارقت خلاني وفارقت الاصحاب
من بعد عزّي ما بقى مقدريّه

والحاء حرام انّ الهوى سم هاري
أسقاني العلقم عذاب ومراري
عزّي لمن قلبه بحبّ القماري
قد انشبك والعين صارت شقيّه

والخاء خبيتك بداخل فؤادي
ارجوك لا يشمت علينا الأعادي
نصبح فضيحه بين حضر وبوادي
خلك معي لا تلتوي مثل حيّه

والجيم جاوبني اذا رحت او جيت
ما ينفع المحزون ترديد يا ليت
خِلّك غدى لا هو بحيٍّ ولا ميت
ياكيف يالمجمول تقسى عليّه

والداء درب الزين أنا سراجه
انا اليا عانى الطبيب وعلاجه
أنا ترى حاجته في كل حاجه
هذا كلامي قول ان شفت زيّه

والذال ذاب القلب من كثرة الصد
ياكامل الأوصاف يا ناعم القد
انته حبيب اليوم والأمس والغد
تكفون طفّوا النار يهل الحميّه

والراء رماني في بحورٍ غزيره
من بالهوى مثلي و اجي استشيره
عطفك علي يا شيخ كل العشيره
القلب ماله غير حالي الثنيّه

والزاء زمان اليوم مابه فساحه
كلٍّ شهر في وجه حبي سلاحه
حتى حبيبي في عذابي ارتياحه
محدن معايه غير رب البريّه

والسين سيفي ما طرحه العواذل
اللي يجي منهم هموم ومشاكل
عدّى علي أيام مشرب ولا آكل
كلّه بسبّة هرجهم والوشيّه

والشين شان الحال يا قايد الحور
يا منبع الاحساس يا مصدر النور
انا مريض بحبكم وانت دكتور
وهذي جروحك في فؤادي طريّه

والطاء طلوع الشمس يشبه خدودك
والسحر كلّه في ثنايا ردودك
يا حظ منهو تقبله في حدودك
تصبح حياته تحت حكمك هنيّه

والضاء ضاقت بي جميع الميادين
والصبر جاوز يا حلو كل تخمين
وأمر ربي من على الراس والعين
رب الخلايق كلها والبريّه

والعين عمّي يا عيون المخاليق
اللي سعوا بيني وبينك بتفريق
يبيحرموني منك يا حالي الريق
بدعي عليهم كل صبح وعشيّه

والغين غامرت بشبابي وطبّيت
درب الهوى مدري انا ويش سوّيت
يا وردة اللبلاب يا شعلة البيت
ياللي مكانك بين راحة يديّه

والفاء فيك الله ربي رماني
يمكن احقق في وصالك اماني
لا شك باذخ بالعطا يا زماني
هديّتك ما مثلها من هديّه

والقاف قلنا لك شعور ومعاني
جوابها مدفون بين المحاني
يحفظك ربي يا عظيم الحناني
من يفهم الأبيات يبرق عليّه

واللام لا تقتل زمان السعاده
إجلس معي واليد تحتك وساده
وألبسّك في الحب احلى قلاده
اسمي واسمك وسطها بالسّويّه

والكاف كانك يا مدلل تبيني
تكرم وارسل رساله لعيني
واترك كلام العذل والحاسديني
البخل شين ولنتي ابحضرميّه

والميم مروني ولو بالسنه يوم
واشرح فؤادي اللي به الهم مضروم
يمكن اذا شفتك يعوّد لي النوم
ترى فؤادي به ثلاثين كيّه

والنون نفسي أتعبتني بقوّه
والله لولا انّي بقابي مروّه
شقيت جيبي كل ما شفت ضوّه
يا لعنبو حيّه على حيّ حيّه

والواو واثق في الهوى كل الاحيان
وأقطف ورود الحب من كل بستان
سدّي كتمته ما درى عنه شيطان
والله يعلم بالعلوم الخفيّه

والياء يمين الله آخر كلامي
لا عز نفسي عن عيال الحرامي
اللي صداقتهم تزيل احترامي
لو النهاية صوب حوض المنيّه

اتمنى تعجبكم وعذرا على ترتيب الحروف...اهم شي كل الحروف موجوده...