جميل بن حاسن المطرفي وشاعر أخر محاوره طريفه جدا

جيت لكم بهذه المحاوره الطريفه لشاعر جميل بن حاسن المطرفي عليه رحمة الله

مع شاعر غير معروف ** الله الله بالردود ياربعي


يقول الشاعر :
أنا ماريت مثل واحد يقرش العيدان
ليا جار الدهر قاموا على اليابس يحطبونه

وهم ماهم فقارا عندهم معزى وبل وضان
عساهم بالزمان اللي يجيهم رافع قرونه


جميل المطرفي :
تمدح ياعميل الخير وانته قاصر الجنحان
ليا ماصبح مديد البدو ضوك ماتشبونه

تحمد لربي اللي حت منك القمل والصيبان
بعد ماظلا يسير في علو الثوب وردونه


الشاعر المجهول :
عسى ربي يجينا بالمطر من رايح الأمزان
على نجد العذا اللي مايجيها منتقل شونه

ديار المرجله ماهي كما ديرتك يالفقران
واهلها يركبون الخيل والعايل يضدونه


جميل المطرفي :
ليا جانا المطر سالت ضواحي نجد والشعبان
وقمتوا تقنصون الفار والضفدع تصيدونه

وحشت الورع والحرمه تلم الفقع فالزملان
على المرقوق لضيوفك تحطونه


الشاعر :
أنا ماني سواتك ياجميل أبقنص الوبران
ليا منه جحر في الغار عودتوا تحفرونه

واهليكم يبيعون اللبن والغزل واليدمان
وتشري به من الأبطح وليتك جزت من دونه


جميل المطرفي :
ترى بيع اليديم أشرف من اللي يخرز الحذيان
يخرز الصمط من داخل ويجر السير بسنونه

ترى بعض الصنايع ياعميلي دونها التركان
كما اللي يشرب الدخان واهل العلم ينهونه


قال الشاعر :
تراني مستحي من شيخكم واللي حضر ماهان
لكنك ياولد حاسن تجر الشوك بغصونه

أشوفك ياجميل مجود الخوصه كما السرقان
وثوبك ثوب قوماني وبه ناس يعرفونه


قال جميل :
كلامك زين وانته زين يامطيبك يالويحان
لكنك ياعميل الخير تنظر كاحل عونه

انا ماني سواتك في القرايا تنقز الحيطان
ليا صاحوا عليك انحشت واهل الغرب يوكونه


قال الشاعر :
أنا ادخل على الله من كلام الزور والبهتان
نباها طيبه والصبح كل راح في شطونه

انا شايب واحب اللعب ياحاسن مع الشيبان
لكنك ليش ترسل فوقي اللي ينفض جنونه


قال جميل :
انا عمي وعمك خادم للملك والسلطان
وابوي ابوي ولامني حضرت أسد من دونه

ليا منك عدلت يجيك مني عدل فالميزان
ليا عمت البحر تلقى رياجيل يعومونه


قال الشاعر :
كمنك ياولد حاسن قعد الدرب في يدعان
لمن هوحج بيت الله وربك ماتخافونه

ترى السارق ليا منه سرق يصلب على العمدان
يجره خادم بن سعود والعسكر يقودونه


قال جميل :
قعدت الدرب يوم انك تبات مع المره طيان
وأخذت ريال جمرك فوقكم وانتم تخبرونه

ومولانا جمعنا لين سرنا كل ابونا اخوان
وطاك اللي وطاني والله أعطى الحكم مامونه


قال الشاعر :
علامك ما نطحت البارق اللي جاء مع الريعان
علامك ما نطحت البارق المفتن تحربونه

عطيتوا ضلع كبكب تنقلون الزاد والورعان
تبون الجيّد اللي كان اهاليكم يعبدونه

جميل :
علامك ما حربت الباشه اللي قبله العثمان
يسيّر في عنيزه تنكره ولا تقرّونه

نصيحه لا تعرّض لاأمر من هو كل يون بشان
وحنا ما عبدنا غير معبود تعبدونه








هذه المحاوره هناك من يقول انها مع لويحان الأزوري الشاعر المعروف

والبعض يقول بأن الشاعر من قبيلة اخرى


انتظرو القادم من مواضيعي

محاورات حاسن المطرفي مع بعض الشعراء مثل لويحان

وشاعر يدعى بلال ولافي الحربي وشاعر اسمه سهل الروقي وشاعر اخر اسمه بنيه العبد