شياخة نياق

مع كامل تقديري للرجال الأوفياء


( تعبر عن نفســـهـــا )

ياهاجسي والشعر زانت قوافيه
هيض وتخير من خيار المعاني
الشعر له منبع وانا اعرف مجانيه
اخذ جزيله يوم اعرف المجاني
البارحه يوم ان فكري مصفيه
صافي ولا يبغى العلوم الهواني
يابندر اسمع ويش اقوله وتوحيه
يا اخوك ميز هرجتي من لساني
ذكرت انا رجل تكابر هقاويه
تكبر به الهقوه وهو في طماني
عكر مزاجي جعل ربي يجازيه
من سوء ماقدم بعد مادعاني
رجل لبس له بشت ماهو مزاهيه
والبشت مايعطى قليل الحساني
البشت له رجل يعرفه ويشريه
ماهو بعارية فلان وفلاني
والمشيخه للي نظيفه مباديه
ماهي شياخة ذود والا حصاني
اللي يحسب الذود شيخه وتكفيه
ليته يبدل ذوده بعشر ظاني
الذود لو يهرج نطق قال مابيه
ينطق يقول الله بصير وبلاني
الذود يبغى قرم تاجر ويقنيه
يعرف تدابيره في قسو ولياني
واللي كذا لابد تقصر لياليه
مادام مايعرف عشر من ثماني
والعاقل اللي يعرفه لا يخليه
راحت علومه بين قاصي وداني
يقول له (شيخ) كبيره ترى فيه
لا يغش نفسه يالله المستعاني
الله يعز الذود ويعز اهاليه
عن مثل شرواه الضعوف المهاني
يابندر الرخمه حذاري تماشيه
ابعد عنه خلك رفيع المكاني
دور رجل ربي عن الناس مغنيه
صامل قوي البأس حسبة خواني
هذاك مشعل من نحبه ونغليه
انا اشهد انه من طوال اليماني
هذاك ابو يوسف قليل المشاريه
له وقفة يوم الضعيف نساني
زيزوم مايعرف دروب المسافيه
وهذا كلام الصدق واخذ الضماني
لا قلت مشعل قال لبيه لبيه
ويلج صوته فالضلوع المحاني
يقضي لزومك لا نصيته وتنخيه
وافي ويذبح من كبار السماني
ويا اخوك هذا الحق من دون تشويه
من بعد مابانت حقايق زماني