كيف تصبح بزنس مان ؟؟ تجارب من أرض الواقع

السلام عليكم ورحمة الله وبركاته

نريد أن نتشارك بالآراء في هذا الموضوع حول تجاربكم أو معلوماتكم التجارية أو الإدارية أو التنظيمية أو القانونية , ومو بالضرورة انك تصرح بأسرار شغلك ولكن نريد التجربة كتجربة أو المعلومة كمعلومة بحيث تكون المعلومات عملية أكثر بدلاً من أن تكون تنظيرية. وليس بالضرورة أن تكون التجربة خاصة فيك فمن الممكن أن تكون وقفت على تجربة معينة أو سمعت بها.




وسأبدأ مستعيناً بالله بنفسي مع أنني لست بزنس مان ولا سوبر مان بس حبيت أعرض تجربتي:


تقبلت مقهى في أحد الطرق الرئيسية بعد أن أسسه صاحبه بشهرين تقريباً وكان إيراد المحل في ذاك الوقت ضعيف وكان الزباين ماهم كثير وأنا جديد على شغلة المقاهي, وكان المعلم من بلاد المغرب بس كان حراااامي وكان يشاركني بالإيراد وأنا يا غافل لك الله مادري عنه بس حسيت فيه. فخليت العامل اللي معاه يراقبه بدون ما يدري ويسجل كل طلب عشان أتأكد وبنفس الوقت أشوف كم المبلغ اللي يسرقه. وتأكدت أنه يسرق في بعض الأحيان بمقدار النصف (طبعاً الإيراد ضعيف ذاك الوقت والنص يعني ماحيكون كثير).


طيب وش الحل ؟؟ أطيّره وأجلس بدون معلم وبالتالي أقفل المحل ؟؟ هذا مو حل

أو أخليه على بلاه وأسوي مادري الين أشوف غيره ؟؟ برضو مو حل

رحت لمديري في الشركة اللي كنت أشتغل فيها والرجال خبرته في إدارة سلسلة فنادق عالمية وقلت له وش رايك يابو نور.. الوضع كيت وكيت وش تنصحني فيه ؟؟

قالي (يابني.. المال السايب يعلم السرقة ولازم يكون عندك نظام محاسبي يعني لازم يكون عندك فواتير من ثلاث نسخ... نسخة للزبون ونسخة للمعلم اللي يسوي الطلب ونسخة تبقى في الدفتر واللي يسجل الطلبات لازم ما يكون المعلم يكون شخص آخر.. وفي نهاية كل يوم تجي وتطابق نسخة المعلم مع نسخة الدفتر مع الإيراد اللي في الدرج)

قلت خليني خلال الفترة هذي أضبط الوضع وبعدين أطبع فواتير على راحتي خصوصاً إني ما كنت فاضي للمحل في ذاك الوقت وانتقل عملي لمدينة ثانية, فوظفت شخص مهمته فقط على الصندوق ما يشتغل ولا يسوي شيء بس يعرف ايش الطلب ويسجله في الدفتر ويسجل قيمته مع ان دخل المحل في ذاك الوقت ما يسمح إني أوظف شخص ثالث بس قلت اللي بيسرقه المعلم خليني أحطه راتب للموظف هذا... وبنفس الوقت قلت للمعلم يدرب العامل البنقالي.

وخلال فترة بسيطة يمكن أسبوعين حس المعلم إنه انكشف وان الهدف من توظيف المحاسب هو ضبط الحسابات فانسحب ولا عاد جاء من نفسه والحمد لله كان العامل قد تدرب على العمل وإن كان ماهو باتقان زي المعلم واشتغل إلين ما لقيت معلم ثاني وأول شيء نقلت كفالته وهذا أمر مهم اللي هو نقل الكفالة لأن العامل بيكون تحت سيطرتك مو زي اللي لو سوى شي أو حصل وظيفة ثانية تركك من ثاني يوم.

ما يستفاد من التجربة:

1- إن خير من استأجرت القوي الأمين فمطلوب المعرفة والأمانة.

2- يجب وضع نظام مالي من خلال الفواتير والسندات ونماذج للشراء وطلب عروض الأسعار.... الخ ومن المهم أيضاً وضع نظام محاسبي عن طريق الكمبيوتر أو ما يعرف بـ erp

3- تدريب أكبر قدر من العمالة وعدم ترك المهمة الرئيسية بيد شخص واحد فقط لأنه ممكن يلوي ذراعك.

4- استقدام العمالة المدربة أو تدريبهم أو نقل كفالتهم وعدم تركهم يعملون عندك وهم على كفالة أناس آخرين لأنه في أي لحظة يتركك.

أتمنى أن تكون التجربة مفيدة لكم وأتمنى انكم تحطون تجاربكم